Zogam nuntak gim namta ~ Pu Thangboi

Zogam nuntak gim namta ~ Pu Thangboi

Zan ni (Oct 15 ni) Tedim nitak nai 5:00 in na tung ing. Meikhuamte hoih sa ing. Nitak teh innte ah mei apai loh hang lammei tangsak uh ahih man in nuam tuam hi. Khuapi vai mahmah ta a mawtaw hoih nono zong kilehleh mai hi. Zan kim zankhang dong mah saikel gin kiza hi.

Khuamial khit ciang in sangnaupangte’n lai sim ziahziah uh hi. Hymnal lak ah ngaih kasak mahmah khat ahi “Near The Cross” la mikang la in akisa ziahziah khat zong kaza a, ka lung hong lengsak peuhmah hi. Bang bang aizong khantoh gim nam kasa hi.

Lampi

Kawlpi pan Thaang dawn dong lampi hoih ta hi. Tedim khuasung zong lampi hoih gawp hi. Tedim pan Zalui dong lampi hoih mahmah hi. Vialcian pan Tonzang kikal zong hoih gawp hi. Lampi hoihta gawp ahih man in mawtaw te tungbaih tuam mahmah hi. Kawlpi pan a Tonzang pai bus te bang zingsang nai 11:00 bang in tungta hi. Kawlpi – Cikha zong kal khat in 3 vei bang direct in pai a nitun lianlian ta hi.

Van Kizuak

Nektheih leh vanzat tuamtuam zong Kawlpi pan in mawtaw saikel tawh hong zuakto tam mahmah hi. Singtang hong kivakta suak hi. Lol mahmah uh a Tonzang pen zingsang nai 8:00 bang in tungzo uh ahih man in zing an lap uh hi.

Gas Kizangh

An huanna ding in gas zong baihtak in kithun thei ta hi. Tedim ah thun khat tul 30 pan 35 bei a Tonzang ah tul 40 bei hi. Thun khat kha 2 bang kikhom ci hi. An sing pen Tonzang ah ton khat teng 1 nuai om lo hi. Tedim ah bel tammanh zaw in ka um hi.

Gas tu a sang in akimanh zaw lai ding in ngah theihna ding in vaihawmzo hi leng ih gam cidam tuam mahmah ding hi. Tu mahmah in zong Tedim leh Tonzang ah gas tawh an huan tampi omta ahih man in sing phatuam mahmah ding hi. Sing sat tawm tektek leng ih gam cidam tektek ding a nuntak nuam tektek ding hi.

Zogam nuntak gimnam ta hi. Zogam hong pia Pasian’ Min thang hen ! Hong pia Pa’n hong piaksa hi a akem ding eite ih ginat kul hi. Lungdam, (Mung Laan Thang) Tawmvei, Zogam