Zogam makai kiteelna ~ Pu Go Sawm Khup

Zogam makai kiteelna ~ Pu Go Sawm Khup

Kongzing Thuthang – Zogam ah NLD Party min tawh MP Candidates kiteelna akibawl zawh kha khat bang cing dekta hi mahleh ZCD Party lam pan MP Candidates kiteelna thu kiza nailo ahih manin akua mahpeuh in kilunglutlawh bilbel hi. NLD Party in CEC Pawl lamlahna zui in, Democracy dan tawh Township Level ciat ah kiteelna bawl uh a, abeisa hun a Kiteelpite tawh etkakna in kilawm kisa in, kilungkim mahmah hi. ZCD Party in MP Candidates ding bangci bangin hong teel uhtam cihpen a lunglut huai thu khat hi takpi hi.

Tupi galkhat pan Zogam ngaihna tawh ZCD Party in MP Candidates bangci teel ding cih thu ka kan kawikawi aleh, Kongzing pan in anuai a thuteng ka za a, lungkim huai mahmah, thangah huai ka sa mahmah hi.

A masa in CEC Pawl in ZCD Party min tawh Kuanglui nuam (MP Candidates ding a ut) mi khempauh in azat ding Ngetna Laipi (Form) khat bawlin, Ngetna Sum (Application Fee) Ks.100,000 tawh Laipi phah theih dingin geel uh a, June 30 ni a nunung ni ciang kong hong hi.

Ngetna Laipi aphah, Kuanglui nuam mimal (17) pha a, Kongzing pan thuzakna bangin a Minkhumna anung lam ah kong behlap hi.

Zogam ah Kuanglui nuam mimal (17) sung pan ZCD Party min tawh Kuanglui ding makai (9) akiteel ding ahi hi.

Kuanglui ding kiteelna tawh kisai NLD Party in asep danin Township Committee leh Upa (5) tengin ateel dan sangin a tangzai zaw dingin, ZCD Party in Township sung a Khua tuamtuam pan ZCD Party Makai/ Tangmi/ Delegates (2)-ta kaikhawm in, Tangmi tengin Vote tawh ZCD Party MP Candidates teel dingin geel uhhi.

COVID-19 hangin Township khat sung pan Tangmite kikaikhawm in mun khat ah Vote piakna kibawl theilo ahih manin, Vote-Lai (Mail-in Ballot) bawlin, khua tuamtuam pan a Tangmite/Makaite in MP Candidates teel dingin vaihawm uhhi. Mail-in Ballot pen Party Kiteel Tanupawl in khuakim sikin hawmkhia uh a, Tangmite/Makaite in Vote apiakkhit uhciangin lai-ip sung ah kilh in Tanute ap uhhi.

Tua Mail-in Ballots teng a kikaihkhop khitciang in, July kha abeima in CEC Pawl mai ah hongkhia in, Vote sim ding uhhi.

MP Candidates dingin Vote tam angah pen teng sung panin, Township khatciat a MP panmun phazah tawh akituak teelcing Makai tengbek ZCD Party MP Candidates dingin kikipsak ding hi ci uhhi.

Tuni ciangciang, Kongzing pan ka thuzakna ah, Tonzang Gamhuam sungteng panin Mail-in Ballots kikaikhawm zo a, Tedim Gamhuam sungteng zong tu kaal sungin kikaikhawm zo ding hi cih thu, Makai khat tungpan in muanhuai takin ka za hi.

ZCD Party in MP Candidates dingin kuakua ateel zongin, Zogam ah Party Candidates ding kiteel dan pen International Level bang in Primary Election kician takin ahong bawl theih uhbel lungkim huai sa mahmah ing. Kawl Gambup ah hibang kiteel dan azang Party a masa pen hipahphial dingin ngaihsun ing. Mailam ah Party dang teng inzong hibang a sep dan hong zui thei ding uhhi. Ih Minam ading in angtan huai kalsuan zia khat hi ci ing.

More: ZNC pan ZCD nasepna leh Pu Chin Sian Thang naingangyi sepna tomkim

Kuateng in ZCD Party Candidates hong hiding hiam cihbel asawtlo in kitheita dingin lam-en ing. Tutung a Kiteelpi pen a Mimal dinmun tung ah a kingakna thu tampi a om bangin, alang khat ah, Minam picing khat hihna tawh, Minam Party dinmun panin Kivaipuakzia leh Kalsuanzia kician takin a kineih himhim dingmah, keima mimal deihsakna khat ahi hi. Tua khitciang, a Mimal dinmun tung ah thu leh la tampi hong kingalai ding hi cihpen Kongzing ah thu tampi ih zazo hi. Tutung hiteng cining. Hih ka thuzakte Official hilo ahimaw. GSKhup – Zogam, Tuipi Galkhat