Zogam dinmun etkikna

Zogam dinmun etkikna

1. NLD kumpi sem ZCD tawh (alliance) Tedim in tu ciangciang DC maban kizom theilo hong suak hi. A hang pen Pu LianLuai in Union ah Lai hong puaksak nuamlo ahihi. Lam khat pan en leng Pi Cing ( ASSK) in Pu LuanLuai kiangah Tedim DC Lai te Union hong tinin ci leh lem ding hi. A nih un hong gelsak semsem nuamlo uh hi leh kilawm hi.

Tua ahih leh Tedim DC maban pen Chin State CM ki laih masiah ngahlo ding maw? A kilaih zo bang hi leh Union ah ih awk lai diam? NLD zawh na mun hi leng ee ih ngah khin diam? Gelna kiciam sep huaite sep ding kisam hi.

2. Tonzang Zato pen Chin State Myone 9 lakah lupna 25 ahi lai Tonzang bek hi. Tedim Zato lupna 100 zong van gina hetlo ci ih hih leh lupna 25 bek apha Tonzang bel gen vetloh hi. Zato lam vaisai Pu Pau Lun in gelna limci hong neih ding kisam hi.

3.Tedim Sangpi pen ih muhtek ahihi. Siat cih takin sia hi. Myone dangte in Univ. College, GTI, Nursing sang thak lamlam uha, ih Tedim sang innpi en puah zolo hi hang. Union huhna maw? India huhna? Laitin ciang hilo in phutphut ding kisam mahmah hi.

4. Tonzang ah Pi Cing hong pailai in Khuanu khuapa te in ko kisil na ding tui mahmah zong om kei acih teh Tui piak ding gela, tun tui bul ding amun ki zongzong lai hi. Tedim tui nek ding VP in gelpih aa, ahih hangin thu nennen alung khamhuai natam mahmah mawk hi.

5. Tedim Mahadatline vai ahih leh MOU ciang ki tungta hi. Gamdang vai ahih manin hong khawlkik ding leh hong ziakai khathei ding hi. Union sum tawh hong sepsak mengmeng le uh e? Tonzang ading bel Tedim khit ci toto lai hi ven. !

6. Myo behlap ding vaite ei lam hong daicip phot hi. Thu neite in hong deihsak lo maw? En kan zolo maw? Ei ki haza den maw? Ohsuh behlap ding vai Pu Kam Lianin thu gen ngeia tu ciangciang lem thei nailo hi.

7. Vanleng tual, College, Bus Station, Bazar, Trade Road, gamgi vai, Gullu mual, lennupa, etc hite alung hi mawh MP kisam mahmah a, asem zo ding MP zong kideih hi.

Note:

• 1. ZCD te thu sun limlim NLD ten hong nawl khin maw?
• 2. Ei lampan ki maiet siamlo maw?
• 3. Gelna kician neilo maw?
• 4. Khantoh na ding sang thukhunpi leh Federal tawh buai zaw ih hi hiam?
• 5. Federal ih cih kawmkawm in khantohna lam zong sawk zek leng ee?
• 6. Zomi makaite in mipi te koiciang ah hongtun ta?
• 7. 2020-2025 sungteng hi danmah in kalsuan lai zen ding maw? Penglam