Vondeih Kep Ding – 126 (Dimno’ Pa)
Tawngno,
Inn omna, na sepna, sang kahna, gamvakna leh i hihna khempeuh ah Pasian hong kepna lo tawh a kikalsuan thei lo ahih lam phawk pahpah ing. Zanni na sepna pan ciah kawm in FM Radio ka hon leh tua panin ka kiim ka paam aom mawtaw accidents te hong gen khia datdat a, mun 10 val bangah om mawk hi. Pasian in hong kem hi kei leh mawtaw i hawl bek zong luangkham mah hi gige mawk hi.
Ka zakngei thu khat hong gen ning!
Khatvei nungakno khat a lawmngaih pa tawh date dingin inn panin mawtaw tuang in a lawmte tawh hong pai khia hi. A pai ding ciangin a nu in, “ Ka tanu aw, Pasian tawh tuangkhawm in maw,” ci-in hong vaikha hi.
Tua leh a tanu in, “Nu, Pasian aom takpi leh a sung ah lah tut nading om nawn lo ahih ciang a nunga trunk sungah hong tuang leh aive,” ci-in hong dawng hi.
A sawt lo khat in tua mawtaw tuahsia in a sunga tuang teng a nunta khat zong omlo hi. Ahi zongin a trunk bangmah ci lo-in, Palik te in a hon leh a trunk sunga a kikoih aktui te a kitam khat zong om lo-in, a kikoih dan lian in na om sitset lai hi, ci hi.
Ka zakcil in lamdang ding tawh kibang ka sa a, ahi zongin ka lungngiah kikkik ciang a lamdang dingin ngaihsun nawn keng. Pasian hong kepna bekbek tawh a nungta i hi-a, Amah’n hong keem peuh leh sihna ding mun na ngawn pan in a kisi lo hi a, Amah’n hong ci peuh leh i si zongin a kitho kik ding hilai hi.
Pasian in, “Ka min zangkhai ngaihsut kei un,” hong ci ahih manin gualnopna khat peuhpeuh ahih a, ciamnui in na omna mun khat peuhpeuh ahi zongin Pasian min peuhmah gualnopna ding leh mi nuih theih nadingin zang in tua bang danin om kei le cin hong deih ing.
Thu-um mi pawlkhatte in mi nuihzakna ding ci-in mi tampite mai ah thungen khawng kineih in, Pasian min leh Pasian pen ciamnuih bawlna in nei uh a, mi tampite gilvul na liang, ciltui kai sak liangin nui sak zaizai uh hi. Tuabang ka muh hangin na pa ka nuihza het lo hi. Pasian zong lungdam dingin um lo hing.
Na Pa
August 10, 2017
Columbus, OH
Comment piaknop aomleh...