Philippines gamsung ah kumthak muakna in losan kinaklotlua in mi 191 in liamlawh

Philippines gamsung ah kumthak muakna in losan kinaklotlua in mi 191 in liamlawh

Philippines gamsung ah kumthak muakna in kep leh losan “Fireworks, Firecrakers” cihte ki limzatlua ahih manin, mi 191 takin liamlawh uh cih AFP pan kiza hi. Philippines President Rodrigo Duterte in Firecracker zatpen khiamding ci’n thu apiaksa himahleh New Year muakna in aginngaih theithei kilawn ziahziah veve hi.

Abeisa kumte ahzong kumsim in hihbangdan pawithupi aom ciangin Firecracker kilimzat mahmah a, asi leh aliam zong tampipi omtheizel hi.

Tuabang in akisamlopi in Firecracker akizatpen phattuamna omhetlo ahih manin, abeisa June khasung in President Rodrigo Duterte in Community Fireworks Display te zatlohding, khuasung vengsung gamlumsak loding ci’n khamcipna letmat athuh ahihi.

Philippines gamsung pen atamzawtham Christian vive ahi uhhi. Ahi zongin Chinese te ngeina pawlkhat leh tangtawn in akizang ngeina pawlkhat ki gawmkhawm in, kumthak ciangin Firecracker agin ngaih theithei in lawnziahziah uhhi. Tuapen abeisa ahoihlo, dawigilo te taikhiahen cihbangdan in ngaihsutna tawh alawn uh ahihi.

Philippines Health Secretary Francisco Duque in agenna ah 2018 kumthak New Year muakna in Firecrackers akilotna hangin mi 191 takin liamlawh uh cihi. Tuazah aliampen abeisa kum 5 sungtawh tehkak ciangin mi tawm aliamzaw cisawnsawn hi. Abeisa kumte sangin aliampen 77% bangin kiamzaw cihi. Ahi zongin hihbangdan Firecracker hangin sihna leh liamna te aomvetloh nadingin Health Department in Firecracker zatding khamcipsawm hi ci’n genbeh hi.

Chinese te’nzong Chinese New Year ciangin losan, Firecracker leh Firework tuamtuam puakdamdam in lonziahziah uhhi. Hindu te’nzong Deepavali hunciangin losan naklohthei mahmah uhhi.

Ahi zongin Singapore gamsung leuleu ah losan Firecracker, Firework cihte pen khuasungah mawklotsak hetlo uhhi. Singapore gamsung ah Firework, Firecracker cihte pen National Day, New Year, Chinese New Year leh Christmas cihte ahzong aki ciangtanna munbek ah sawlna ngah thunei te bekin lawnthei uhhi.

Malaysia gamsung leuleu ah Firecracker pen utbangbang vengsung ah kilawn ziahziah hi. Chinese New Year ciangin Sen te’n lawnziahziah, Deepavali cianglah Hindu te’n lawnziahziahzel, Malaysia National Day cianglah gambuk in lawn, Tamil te’n atuam, Christmas leh New Year cihte atuam, amau thangah hunhun in agin ngaihtheithei kidem in lawndamdam uhhi.

More: Singapore ah pasal khatin losan “Firecracker” lawn ahih manin kiman

Kawlgam sungahzong nung meivakpawi sungin losan kinaklot mahmah cih kiza kawikawi hi. Hih losan Firecracker tepen adiakdiak in naupangngek leh piteek puteek te’n thuaklah, agin ngaihlua, agimzong katgim himawk ahih manin, ki thuaklah mahmah hi.

Zogam ahzong nidanglai in losan akilot ciangin ak pulnuam kici a, khuasung ah losan lotpen kizadah mahmah hi. Phattuamna omlua hetlo himahleh pawlkhat in sum tampipi bei in, losan “Firecracker” lawhpuak ziahziah veve uhhi. Sawltak #zomidaily