Na lau ngei nai hiam? ~ Evan. Suangh Dal

Na lau ngei nai hiam? ~ Evan. Suangh Dal

1. Martin Luther zong kekin deng lum dektak ngei-a tua panin si mawk leng gupna ka ngah mah ding hiam ci-in hong lausan pan-a, tua hun panin Lungdamnathu a kici taktak bang hiam cih hong lunglut pan hi.

2. Zwingli zong 1519 kum-in Europe gamah pulnatna tungin a sanggampa Andrew hong si-in amah zong ong nat teh Pasian’ launa taktak khat a sungah lut pan ahih manin Lungdamnathu (the gospel) le Pawlpi puahpha pupite’ thuhilhna hong awlmawh taktak zo pan hi.

3. Adonairam Judson zong a college kahpih a lawm it mahmah pa, ama ii khaan (room) zom-ah a lum khat a zing ciangin na si beba mawk ahih manin, a kisi thei hiveh e, ci-in lau gawp-a tua hun panin leitung vaite sangin Lungdamnathu a thupit zawkna le Pasian’ thu mah a senh (standard) sang pen ahihna thu hong phawksan kik pan hi.

4., John Wesley zong Pasian thu gen dingin Atlantic tuipi kantan-in a zinna ah, huihpi guahsia Paul ii tuahzah lang dektak khawng tuak gawp-in sih ding a mai ngat laitakin, aw kei khamangthang vei-a crusade bawl dinga kuankhia pa a hawmpi hi lai mawk veng e ci-in gup ngah a kiciat nai het loh lam kithei-in hong lau mahmah-a, ahi zongin a tembaw tuan pih Moravian thu-umte Paul bangin lauhet loin Pasian muang tak leh gup ngah kician, sih ding lau het lo, daai takin a om hithiat theih lam uh a muh teh Wesley in lamdang sa-in eng mahmah ci mawk hi.

Gennop thu: Pasian’ mite in zong sihna taktak i mai-ngat takpi teh Pasian’ kilau panin Lungdamnathu kikin pan-in a taktak thute ki-awlmawh pan thei hi. Pasian thu um lote in bel bangbang a tuah hang un kikhelna mel launa mel-in neituan lo uh-a git loh pihna in nei semsem zawsop thei uhi. I nuntakna ah Pasian lau theih ding kisam hi. Launa in hong kingaihsun phasakin, hong awlmawh sak, hong kin takpi sak thei pan mawk hi.

Horace Bushnell a kici pa in bel naupangte Pasian thu i genna ah hell thu gen lo ding. Pasian hehna thu gen lo ding. Pasian a lau huai, a kihtak huai suah ngei lo ding ci-in Pasian hoihna – Topa hoih hi, kei’ tung ah cihdante pawl le Pasian itna – itna nei pa in hell bawl lo ding hi cih lam bekin a theology kai hi.

Naupangte khawng na pam ah si kha ci-a lausak ding hi lo mah hi. LST zia ahi khol lo tawh kilausak gawp nam pen zat loh ding hi mah hi. Hunkhenna (Dispensationalism) khawng tawh tintaan pia-a kilausak gawpte pawl kisam lo mah hi.

Ahi zongin, tua a lauhuai hell hong tun i mawhna kiphawk loh khak ding a lauhuaina, i mawhna hanga Pasian heh gige cih a lauhuaina, tua Pasian hehna a damsak Jesuh Khrih sihna thu thudon loin om lehang bangzah-in lauhuai hiam cihte, i lau theih ding kisam hi. Lau na mel theih kul hi. Na lau ngei nai hiam? Evan. Suangh Dal