ZIUSA pan Lungdam Thuphapuak: Happy Thanksgiving!

ZIUSA pan Lungdam Thuphapuak: Happy Thanksgiving!

Thanksgiving Lungdam Thuphapuak

United States gam sung a om, Zomi laizom, u le nau, nu le pa, lawm le gualte aw,

“Happy Thanksgiving Day” muak kawm-in, Zomi Innkuan USA in “Lungdam Thupha” kong puak uh hi.

US gam a teng mite in kumsim in abawl, ngeina hoih mahmah khat ahi, Lungdam Kohna Ni, Thanksgiving Day nilian ni hong tungkik ding hita ahih manin, ei tuipi galkai Zomite mimal khatciat inzong hih ngeina hoih lungdam kohna sungah cidam lungnuam leh daupai tak-in, ih zatsiamkim theihciatna ding in ih biak a nungta Topa Pasian in Thupha hong piakimciat tahen!

Leitung ah lungdamna a thei minamte in mi thupi, a citak minam leh mi hampha, Thupha ngah minamte ahi uhhi. Mi lungdam khat in a lungdamna kua tung ah om hiam ci-in zong-aa, a lungdamna kokik tangtang hi. Tua bang minamte Pasian in Thupha pia bek hilo in, Leitung Thupha Namcinte tawhzong piakhawm hi, ci hi. Tua ahih man-in, ei Zomite zong hih lungdam kohna pawipi, Thanksgiving Nipi (Lungdam’ Kohna Nilian Ni) hi sak ni ci-in, tha ih kipia nuam hi.

US gam atung masa galtai thu-um mite zong a kipat lam-in, hamsatna tampi naphukha uh himah leh a thuphate simkawm in, ih biak a kibang ahi, a nungta Pasian tungah lungdamna pawipi bawl in lungdamna thu nako tangtang uh a, “Thanksgiving Day” cih a napatkhai uh ahihna ih theihsatek ahi hi. Tua mah bang-in ei, Zomite zong Pasian ompihna tawh kum khat khit kum khat hamsatna, lunglen khuangaihna tampi ih tuakkhamah ding hi. Tua bang dinmun tungmah tale hang, ih biak a nungta Pasian in hong nusia hetlo-aa, tu-in ei Zomite zong US gam State tuamtuam ah nasep silbawlna, pilna siamna sin theihnate a kipan US leitang tung ah, Zomite Nautual ahong kaisak zo ih biak Pasian tungah lungdam koh huai tampi om ding hi.

Ei, Zomite ih biak Topa Pasian in hong ompihna leh hong it hong ngaihnate lian mahmah hi cih phawkkawm in, Lungdam Kohna Ni pen ih innkuan ciat-in ahi zong, ih khua leh tui buppi in ahi zong, ih Zomi Innkuan kipawlna ciat-in ahi zong, cidam lungnuam takin amuak thei ding-in, Anungta Pasian in thupha hong pia tahen!

Kumsim, hibang in azat huai ni thupite ahong tun simin, ih san’sa thuphate simkhawm a, Anungta Pasian tung ah lungdam ako tawntung thei dingin US gam sung a om Zomi khempeuh tung ah ih Topa Pasian in athak in thupha hong pialai henla, cidamna, khansauna leh ki-itna, kikhualna, kipumkhatna, kithutuahna thuphate hong guanbeh tahen ci-in, Zomi Innkuan USA kipawlna min tawh Lungdam Thupha kong puak uhhi.

Executive Committee
Zomi Innkuan USA

Tang’in;

Pa Thang Tul Mung Suantak
Vice President
Tel. 817-787-5010
Email. [email protected]

Fort Worth, Texas
November 25, 2014