ZIUSA pan dahna pulakna: Mangpha Sia Tua Tuang, kum (31)

ZIUSA pan dahna pulakna: Mangpha Sia Tua Tuang, kum (31)

USA gam, Oregon State, Portland khuapi ah Sangkah a ongpai Sia Khen Sawm Tuang @ Tua Tuang, Tawmbing Beh, Kum (31) in abeisa July 28, 2016 ni-in Portland, Oregon panin lamet hetloh laitak Motor tuahsiatna hangin mulkimhuai leh dipkuathuaitakin mual ong liamsanta cihthu izakmanin Zomi Innkuan USA kipawlna in nakpitakin kidahpih, kilainatpih mahmah hi.

Sia Tua Tuang pen Yangon ateng Rev. Dr. Sian Za Lal leh Nu Lam Za Cing ten Tapasal 2 tanumei 2 a neihnalakah a upen hi-in May 26, 1985 kumin Tedim khuapi ah suak hi. 2001 kumin tan 10 zo aa, 2006 kumin Bethel Bible Seminary panin B.Th., 2009 kumin FBTS panin M.Div. ongngahhi. Sia Stephen Mang makaihna in Stephen Vocal Band cihmintawh Pasianla, gamngaihna la tampi sa, DVD,CD tampi khawmkhia uhhi. Singapore, England gam cihte ah Gospel pai-in zinkawikawi uhhi.

2013 kumin a itmahmah Lia Vung Sian Huai tawh pumkhatsuahna ongnei uha Pasian thupha tanu Lia Cing Sian Zem ong nei uhhi. 2015 kum July kha ciangin Pilna sangkan sinnopna tawh USA ong tungin Oregon Portland khuapi sunga sang minthang mahmah Multnomah University ah Global Development and Justice subject tawh Master ong zomthei hi. Nungdeuh mahmahin azi nu Vung Sian Huai leh a tanu Lia Cing Sian Zem zong a pasal/ apa uh omna USA ah onghawh thei uh hi. Innkuana Pasian minphatkhawm, Pasian hoihna, Pasian thupha simsim ding cihkawmkalah hicibanga dipkuathuai, Lipkhaphuaitaka ong nusiat vatmawkpen leitungbup a om Zomi khempeuh kidah, kilinglawng mahmahhi. Ama ong nusiatna pen a innkuanpih tengbek hilo-in Zomi bup supna lianpi khat in Zomi Innkuan USA in kiciamteh hi.

I sanggampa Sia Tua Tuang pen USA leitang tunga ong nusia Zomi khat ahihna tawh kizui-in Zomi Innkuan USA kipawlna in Zomi sungah unausanggam khat, laizomkhat sikhat sakhat hihnahanga lainatpihna, dahpihna lahna in Paakkual khattawh Mangpha khakna kineiding hi. i sanggampa Sia Tua Tuang tawh a nunungpen hunzatkhopding pen ongtungding August 08, 2016 (Monday) ni-in Gresham Memorial Chapel Hall 257, SE Roberts Ave, Portland, OR 97080 ah 12:00pm hun-in Zomi Bethel Church pawlpite makaihna tawh anunungpen hunzatkhopna, kineidinga tuakhitciang Forest Lawn Cemetery & Mausoleum 400 SW Walters Dr, Gresham, OR 97080 ah vuina/ daitansakna kineiding hi.

I sanggampa Sia Tua Tuang ongnusiatna hanga adah akap Inn leh gam muntuamtuam pana alunglengkhuangai pianna nulehpa sanggam laizomteng leh khuapihtuipih tanaumeltheih behlehphung, Pawipimi a kuamapeuh leh a diakin a itmahmah a zi Nu Huai leh a tanu Zemzem te tungah ibiak Vanglian Pasianin amakiangpana ongpai a khasiangtho hehnepna bucing ongpiaksak henla aluang khituite ong nulsakin lungnoptawldamna ongguan kimciat tahen cih Zomi Innkuan USA kipawlna in thu kongngetsak uhhi.

Dahpihna lianpitawh,

Executive Committee
Zomi Innkuan USA, Inc.
August 06, 2016