A logical vetlo Zomite philosophy ka zakngei thuthum

1. Zomite kipumkhat theihna dingin, “min deihna hong om kei limlim leh”

Hih min deihna cih pen, leitung mihing ngeina khat hi aa, kikham theih thu hilo hi. Tanglai in, khangluite in, gal le sa amatte uh ai in minsialin, tonguh hi. Mualsuang phut in, a mau hihnate limin suai in mualsuanglai gelh uh hi. Tuhun ciangin, mipilte in, amau pilnate laibu in bawl hi. Tua khempeuh pen a min uh a mang nawn lo ding, khangthakte in amau thu a muhkikna ding deihna vive ahi hi.

Min deihna om kei leh, cih pen lamkhat pan ” kei cihcih hong zui phot un la, no min hong deih nai se kei phot un, kei bek min nei hong hisak phot un” a ci gigete ahi hi. Min deih man bekin nasem kei un kicih theihna ding thu om lo hi. Eite vantung gam i tung teh kham lukhu deih sawm laite ihi hi. Min deihin i hanciam ciat ding hizaw a, tua hanciamnate kisan’ siam in, kipahtawi ciat ding hi zaw hi. “Min deihna tawh gamta ken” i cih leh mihingte ii rights a khaktansak ihi hi.

2. Leadership tam leh kipawl thei khang, “kipawl kei leng kipawl zaw hang”

Hi kammal pen ahi ding bang dektakin, a hi het lo ahi hi. Zomite sungah principle kician le thukhun zuih ding kician tawh a kiphut Leadership tampi kisam lai hi hang. Ei makaihna, kipawlna ciat ah hanciamin, Zomite a ding sem zaihzaih ding hi hang. Leadership tampi i neih pen Zomite kikaikhop theihna dinga chance hoih mahmah ahi hi. Zomi pen tuipi bang hi dinga, minam kipawlna tuamtuamte pen luituiluang le guntuiluang bang hi ding hi. I luan na khempeuh Zomi a hi tuipi sungah a kigawmtuah ding ahi hi.

3. A hoih, a hoih kei zongin kipawlna khat ah “kipawl khawm photphot leng”

Mihingte in lungsim khat tek kinei a, ukdan zong atuam ciat kinei hi. I muhna kibang lo hi. I theihna zong kikim lo hi. I sin pilna zong kibang lo hi. Tua bangteng kipawl meumou ding cih pen matut vai lo hi. Ei kivakna ciat ah kipawlin, ei lawpna ciat ah kihel ding hang aa, khat le khat a Bo zawdeuh om lo-in, kizahtaak bawl, kithusim bawl ciat ding ahi hi.

Sik le sing, lei le suang gawmtuah siamte’n inn le lo hong lam ding hi. Zatui zaha siamte’n cinate hong damsak ding hi. Lai hilh siamte’n lai theihna hong guan ding hi. Lai siangtho thusin te’n Pasian thu hong hilh ding hi. Gal hangte’n i gam le minam hong huu ding hi. Lasa siam music siamte’n, amau mun ciat ah han ciam ding hi. Law pilna, philosophy pilna neite in, gam le lei kiuk zia ding thukhunte hong bawl ding hi. Business siamte’n a huatna uh gam le minam sungah hong zeek ding hi. Tua bangin, ei mun ciat ah mapang tek thei hi le hang, khat le khat kizahtaakna hong om dingin, leplep, gawmgawm kul loin, pumkhat suaksa hong hi ding hi.

A kibanglo tumging khau gawmtuah i siam hang, a kibanglo mihing lungsiam gawmtuah kisiam lo hi. A kibanglo, sik le sing, suang le lei gawmtuah i siam hang, a kibanglo mihing lungsim kigawm tuah siam lo hi. Zogam le Zomi khantohna ding, kipawlna khat sungah kihen meumou ding pen a hi thei lopi khat ahi hi. Ei thahatna ciat ah kihelin han ciam tek ding ahi hi. Zomi sungah a kipumkhat, a kigawm khinsate ihi hi.

Zomi itna sungah,
Tg. Khat Thang
*mimal khat peuh kikapna hilo zawin, thu kuppihna le thumaan zonna hizaw hi.*