Thai, Nonthaburi ah mawtaw tuahsia, Myanmar gammi 3 si, adang mi 6 liam

Thai, Nonthaburi ah mawtaw tuahsia, Myanmar gammi 3 si, adang mi 6 liam

Thai gamsung Nonthaburi ah Wednesday nitaklam in mawtaw tuahsia ahih manin, Myanmar gammi 3 sipah in adangzong mi 6 liamgawp cih The Nation pan kiza hi. Tua aliam te lakahzong mi 5 pen Quick Paint Co Ltd ah nasem in aom Myanmar gammi vive mah hi uh a, adang khatpa pen Thai gammi mawtawhawl ahihi.

Police te genkhiatna ah Bang Kruay District, Tambon Bang Khunkhong vengsung aom Nakhon In Road kici lamzikpi tungah Wednesday nitaklam 9:30pm hunpawl in atuahsia cihi.

Tua atuahsia mawtaw pen Pickup mawtaw te khat hi a, tua mawtaw sungah atuangte pen ahawlpa lobuang Myanmar gammi vive ahi uhhi.

Tua Pickup mawtaw pen Rama V Road lamzuanin atai laitak hi a, ahawlpa in hoihtak lenkip theilo “Lost Control” ahih manin, singkung khatleh meikhuam “lamp pole” khat taihmasa hi. Tuakhit ciangin lamzikpi ii alanglam ah kilawnkhia in, Sedan mawtaw khat taihphei sawnsawn hi.

Hih mawtaw tuahsiatna hangin asi Myanmar gammi tepen Sai Hongpai, Simira, Saimika cihciangbek kitheiphot hi. Adang aliam mi 6 tepen Phra Nangklao Hospital ah zatui bawlding in kipuak uhhi.

Hih Pickpu mawtaw in lamzikpi alanglam ah aphutkhak Sedan Driver pen kum 50 aphakhin Kwanyuen Laowaraphan kicikhat hi a, amahpen bangmah liamna omlo, tua Sedan Car tungah atuang Passenger tezong aliam kuamah omlo uhhi.

Thai Police te upmawhna ah atuahsia Pickup mawtaw pen apei kitam masa hiding ci uh a, tuaciangin Driver pa’n hoihtak Control theinawnlo ahih manin, atuahsia hiding ci uhhi.

More: Myanmar gampan in vankham agilsung ah apua pasal khat kiman

Lamzikpi tungahzong mawtaw Brake asik ciangin ataalna “Skid Marks” pawlkhat kimuthei ahih manin, mawtawhawlpa in Brake sikgawp hiding cihi. Pickup Driver pazong zato kipuakphot ahih manin, Police te’n bangmah thudotna neithei nailo uhhi. Sawltak #zomidaily