ZCD MP ding te vai ~ Gin Kam Lian

ZCD MP ding te vai ~ Gin Kam Lian

Zomi it teng; July 16, 2015 ni in ZCD kuanglui thei ding te min ong kisuah khin hi. March 18,2015 FBBC hall ah Conference kinei in Party kosale 165 val te thu kimna kila hi. Tua lai ah Myone ciat ah Conference nei ding in, komiti phuat nasa khua ciat pan makai te deihna tawh Kuanglui ding te min sazian la ding,tua teng kai khawm in gambuppi conference nei in Myone ciat pan apuak Kuanglui ding teng Aungnaizi leh CEC in kip sak ding cih thu kimna om khin hi.

A hih hang in UEC pan kitel ding vai hun tom khat sung in ong suah khiat vat ciang Myone zui in Conference ki nei zolo ong suak hi. Tedim, Kalay EC teng in a hun lap in State, Division EC teng ki kai khawm in, a ut teng sazian kila pah hi,tutung khawmpi ah ki puak pah hi, Tozang a hih leh EC sam man lo dan hi. July 16, khawmpi ah kuanglui nuam te Myone ciat pan ki puak in tua ban ah mipi ong pai te’n zong a mau hoih sak te ong pulak ban ah kuanglui nuam te’n zong ut ing a ci teng sazian kila phot hi.

Kalay pan a kisam lutna ding mun nih hi in mi 4, Tedim ah a kisam mun 5 hi in ong ki puak mi 8 ,Tonzang a ki sam mun 4, ong ki puak mi 9 hi. Tua hi in March 18, 2015 Conference thu khen satna tawh ki zui in Aungnaizi Komiti mi 11 te’n kip sakna july 30, ma in neih ding cih hi. MP ding te tawh komiti te zong kimu in kam kupna kinei ding a, ZCD CEC te ngaih sut masak ding, Zomi pom taktak maw, ki dem pih te zawh theihna ding om maw om lo, cih te tung in mipi mandate ong piak na tungtawn in kikip sak ding hi. HAKA ah ngah leh ngah loh hilo in ZCD min tawh a lui nuam khat om hi in, kikip sak pah hi.

Tutung pen kuanglui nuam up mawh zah sang ong tam in lungdam huai hi. Galkap kumpi gitloh lai bang lo in ong ki hon teh a ut zong ong tam bilbel cih ding hi. Chin Party zong Party 4, bang in kitelna ah ong dem ding dan hi.

A hun ong tom in,Democracy dan tak mah in a hi thei zahzah in a ki sem hi.MP ding te pen a mun ding kipsak khit teh Party ALan leh Laisiangtho tawh kiciam sak in, Zomi te ngimna palsat lo ding cih kamciamna ki nei sak ding in Pastor te sam in TOPA tung ah ki apna ki nei ding hi.

Sanggam te aw; Ki cin lahna tampi om kha ding hi in hih theih zah tawh kisem hi in hehpihna tawh tua ci zaw leh cih te ong tam sak lo in a ki seh te ngah zawhna ding, Zomi maban zom ding Zomi vai a gen thei ding ZCD bek om ahih teh ong panpih ciat ta un cih ong thum ing. Lungdam, Gin Kam Lian