Zawnna Zo, Hauhna Lel ~ Sia Kung Mung

Zawnna Zo, Hauhna Lel ~ Sia Kung Mung

Pu le pa hun lai in lokhawh ganvulh tawh na kivaak uhi. Sik malkhat zongzang loin sing, gua, bi tawh inn na lam uhi. Naangkhau peuh veihnam khau peuh na zang uhi. Naungekte zuha na muam uhi. Zozu, zuning cihte na limzat uhi. Vaimim le gatui anpi in na nei uh a, sa le sathau na tam nek lo uhi. Nikten puansilh zong zummawh selna khop ciang hi lel a, a haulua a zawnglua cih bang zong om khollo hi.

Ahau i cihte zong khawhsa mim le tang peuh khawisa bawng le sial peuh hau cihna hi lel hi. Pumpi tha saan in nisim nasem uh a cidam in khansau uhi. Tulai hauhnate tawh tehkak lehang hehpihhuai a bat hangin amau hun tawh kizui in kuamah na eng tuan lo uhi. Natna satna gilo tuamtuam zong tuhun bangin om se lo a, zawnna pen kithuak zo mahmah lel hi.

Hun thak sungah kizop khualzinna hong ol in muhna theihna hong tam ciangin minam dangte mah bangin anne tuidawn in i teng i silh ta hi. Sum le paai deihlua in luang kham liangin sep theih sep mawh i sem a, ahiciang khat zong i nei hi. Tua ciangin i zawnna thuak zo napi hauhna lelh hong kipan ta hi. Ei hunlai genthei kisa lua ihih manin i tate ei a bat ding utlo, milak ah a maizum ding uh ut lo ihih manin sum hogn nget zahzah uh piakna pan hauhna lelhna hong kipan hi. Ko hunlai tua bang hi ci-in tate thu i hilh hangin a bil sungah lut theilo in no hun tawh tuhun kibang nawnlo hong cih san uhi.

Pa in tuilu tuitaw ah sidek mangdek liangin sum zong hi. Inn ah nu le tate bek om hi. Nupilte phadawm lai hi. Nu haite in pasal’ zonsate tate tawh kidem bawl in a zatteh bei hak khollo hi. Nute gina phial leh zong tate in pate zahin kihta lo lel mawk hi. Innngakte in nusiat zah zah a beisak ciang a zongpa zong hong khasia pian hi. I nekkhak sun teng bek mah a meet hi cihdan lungsim hong nei a, akhualzinna ah nektheih nek mawh hong mal zihziah ta hi. Inn a tut zahzah a bei loh nading,sum a kikhol zawh nadingin tampipi a meet ding hong sem ta hi. Tuate meet mahmah napi, hong ukte leh Pasian in a deih hetlonasepte hita mawk hi.

Amah zong Pasian’ tung leh pawlpi tungah kisuang sam ahih manin gan go in lungdamkoh kikhop la a, siate letsong tampi a piak teh upa bullam bang ngah lawh bilbel hi. Ahi zongin Pasian” piak hauhna hilo ahih manin innkuan sungah lungkhamna hong tung ta hi. Tate zong hilh loh khal loh in khangto ahih manin khamtheih guih theih tawh a sikhin ee a si kuan kuan ee hong hi ngeingai hi.

Nupate zong natna hoih lo ngah in a nupa un nang nong lawh hi kici tuak uhi. Hong man thei dingte thoih thoihna tawh bei thei dinga i up loh neihsa lamsate zong hong bei hithit ta hi. Innkuan buppi in a gamtang zo nangawn om nawnlo in sihni ding khutme sepa ngak kul ta hi. Cihtheih lai a tanaute, pawlpi mite koilam tung mang khin hiam muh zawh hi nawnlo ta hi.

Ni dang in khamtungah tai tampipi khe tawh pai zo napi tu in siksakol nangawn tuang nuam nawn loin setsakol (motor cycle) vive i zang hi. Nuam zauzau lua ahih manin i inn bang kheng liangin zato peuh han peuh hong tung sak ziau mawk hi. A lim a al ne zo lua kisa in naupangno nangawn thau kiahkuah in sikhang, zunkhum cih mah i ngah lawh liang hi.

Satellite TV vive thuah in a hoihlo lam teng etteh kha ihih manin ngongtatna, paktatna hong khang hi. A hilo teng tawh hun bei ahih manin tate in biakinn koi lam cih zong thei nawnlo hi. Tan 8 tan 9 tungto napi bangmah hong theihloh ciang a tan 10 kum bawda i puak a, zekai luata hi. A theihna niamlua, zui zolo ahih manin hong taisim lel hi.

Zomite in thu ngaihsut huai ta hi. Tulai in pilna khangto lua ahih manin ahoih asia khang lua hi. Pilna tawh kop in Pasian’ thuman thutak tawh kituak in nek zon ding kilawm hi. Pasian in a hauhsakte lunggimna tawh piakhawm lo ci hi. Pasian’ piak a hilopi hauhna tawh zan nangawn ihmut nuam omlo, lunggim a om ding pen thupha hilo hi. Thuakzawh ding zong hilo hi. Pasian’ mai le mite’ muhna ah kisuanna a omlo nasep hoih vive tawh Zomi khempeuh hau in, hauhna thuak zo dingin Topa’n thupha hong pia hen! Sia Kung Mung (Ciimnuai)