Zawhngeu khat temta tawh satgawp ahih manin, kum 7 thong kiading

Zawhngeu khat temta tawh satgawp ahih manin, kum 7 thong kiading

Singapore gamsung ah pasal khatin avengte zawhngeu khat temta tawh satsakgawp ahih manin, tuapa pen thong kum 7 akiading in thu kipia cih CNA pan kiza hi. Tuapa pen kum 67 aphakhin khat hi a, tuni Tuesday (Sep 26) ni in zawhngeu thahna hangtawh thongkiading in thu akipia ahihi.

Tuapa minpen Tan Pwee Sin kici a, thongsung pan suaktakhin leh alutkikzel khat ahihi. 1996 kumsung inzong mithatvai tawh thong akia ngei hi a, 2010 kum ciangin asuaktakik ahihi.

Tukum kipatlam in avengte zawhngeu “Russian Blue Cat” akici zawhngeu namkhat thahlupsak hi. Singapore, Spooner Road vengsung aom Block 1 Flat ah avengte zawhngeu leh ama zawhngeu aomkhawm “Mate” amuh ciangin temta tawh asatgawp ahihi.

Tua asatgawp avengte zawhngeu pen limliam mahmah in, agilzang khawng apualam ah suakkhialiang hi. Avengpa’n a zawhngeu akisatgawp amuh ciangin Police te zasakpah hi. Tua zawhngeu pen aliamma tawh azingciang in sisuakpah hi.

Hih zawhngeu satlumpa Tan Pwee Sin pen avengpa tawhzong abeisa in tamveipi kinial, kitawng zelzel uh cihi. Mithat in thongsung alut ngeipa hi’ng ci’n avengpa phintheizel cihi.

Hih zawhngeu athahlup khitzawh asawtlo inzong avengpa tupa khat “na ngawn hong tansak ningin, na pumpi innnuai ah hong lawnsuk ning” ci’n vou ngei cimawk hi.

Hihbang in ganhing te tungah tatsiatna, gitloh kheltat gamtatna “animal cruelty” tawh thu akibawl ahihi. Adiakdiak in gamkhangto gamthupi te ah ganhing pen itbawl mahmah uh a, ganhing te tungah atatsia te thu kibawl tangtang hi.

Gamdang ah atungsa te’n uikhawng, zawhngeu khawng nekding in mawkgawhlup ziauziau pen gammi te’n hong muhding lauhuai mahmah hi. Gamdang munkhatpeuh ah ihom ciangin tua gamsung ah bangthukhun, bangthukham kizanghiam cih kantel masakding zong thupi mahmah hi.

More: Thailand leh Malaysia Express Train tungah gul 181 kiman

Gam khatlekhat thukhun kibanglo thei a, ganhing gamsa nekding akiphallo, zuakding akiphallo cihkhawngzong omthei hi. Muh khempeuh, matkhak khempeuh aki netheilo, aki zuaktheilo omthei hi. Gentehna: Australia gamsung Kangaroo aki kaplum theimah hiam? India gamsung ah utong “Peacock” aki bengthei hiam? Christmas Island ah aisa “Red Crab” aki nethei hiam? cihbang in ihomna gamtawh kizui in thukhun, thukham te kanhuai, theihhuai hi. Adiakdiak in “Endangered Species” kici gamsung ganhing gamsa te. Sawltak #zomidaily