Malaysia gamsung aom Driving Licence neilo te ki limmat

Malaysia gamsung aom Driving Licence neilo te ki limmat

Malaysia gamsung khuasung lampi thusai te ahi Road Transport Department (RTD) panin gamdangmi mawtaw hawlna Driving Licence neilo te limsit mahmah uhhi. Malaysia gamsung ah gamdangmi bekbek 60,000 val bangin Licence neilo in mawtaw hawlhawl uh cih mukhia uhhi. Adiakdiak in UNHCR (United Nations High Commissioner for Refugees) Card tawite limsit mahmah cih Malay Mail pan kiza hi.

Mawtaw hawlna Licence ahi Commercial Driving Licence (CDL) neilopi in gamdangmi te’n Lorries leh Buses khawng mawk hawlgawp uh a, Public Transportation atuamtuam kihawl ziahziah hi.

Tuabang in amawk hawlgawp te akimat leh “Section 64 (1) Road Transport Act 1987” thukhun tawh kituak in a mawtaw zong kimacip sakding cihi. Tuaban ah a mawtaw neite, Boss te zong liau tuaksakding cihi.

City RTD director Datuk Md Ziki A. Rahman in agenkhiatna ah Public Transportation ahawlsak Company te ii Operators phalna letmat zong ki laksakkik ding cihi. 2014 kumsung bekbek inzong Driving Licence neilo in akiman Case 136,437 bang om a, nungkum 2015 kumsung inzong Case 55,262 bang kimankhia hi.

Malaysia gamsung ah Zomi tampitak in khuasung khuapua muntuamtuam ah mawtaw ki limhawl mahmah a, mawtaw hawlte zong adang nasep te sangin khasum hoihzaw simtham hi. Tua hi a, Malaysia gamsung aom mawtaw hawl Zomi akua mapeuh khuasung ahi zongin gamsung ahi zongin kumpi thunei te’n ahunhun in Checking honglut zeuhzeuh theiding cih phawk gigesa in ih omding ihki deihsak hi.

Nungdiak in gamsung mawtaw hawlna pawlkhat te ah Operasi lut cihkhawngzong kizatheizel hi. Kidop siamni, ahunhun in thukhat lakhat aomciang kizaksaksawm pahpah ni. Lungdam, ZD Sawltak #zomidaily