“Nu” le Nunnuam ~ Rev. Fr. Damian Dal

“Nu” le Nunnuam ~ Rev. Fr. Damian Dal

“Nu” cih kammal in athupi leh athuthuk ahi, mihingte nuntakna sungkhempeuh hong mapi “pilna” honglak hi. Banghanghiam ihcih leh “Nu” cih kammal in thu namthum hongphawksan den hi: (i) Kei thu a apianghi lo. Hongpaai, hongsuak khiasak, hongkeem, hongmakaih, hongkhoi, hong uap, hong cing, hong vak mithupi penpen khat kei ading om a tua pen “Nu” ihci hi. (ii) Kei thu apiang hilo kahih man in, keithu leh kei uutbang bek in kanungta thei ngeikei dinghi, cih thu leh (iii) “Nu” cih kammal in “Pa” cih kammal ii aphel lang hi in, “Nu” ihcih theihna in, “Pa” cihtheih nading kongki honna ahihi.

“Nu” tungah “Nu aw” kacih ciangin, kei hongpaai numei, kei hongsuakkhia sak numei, hongvak numei, hongkhoi numei, hongnungta sak numei, hong khangcingsak numei, hong lamsangto numei, hong mapiden numei, hongkeem honghuai den numei, hong lungnuamsak pen numei, hong lung kimsak pen numei, hong itpen numei, kei suahkhiat nading in sihna athuak ngam galhangpen numei, kei nuntakna dingin zumna daina, duhna kialna, natna satna te thuumlo taulo a athuakngam, leitungah kei ading galhangpen numei cihna ahihi. Hih thuhangin, Topa Jesu in anu pen “Nu mei aw” ci in, zahtakna lianpen pia in Singlamteh tungpan nasam ngeeungeeu liang hi.

Hicingbang in alamdang ‘numei’ pen eite in “Nu aw” i ci hi. Hi cibang “Numei” pen “Nu aw” cihtheih nading in, aphellang kammal ahi “Pa” lo tawh kicing ngeilo hi. Hi alamdang numei ii hansanna, cihtakna, thupitna in ama pumphellang ahi “Pasal” pen “Pa aw” hongci theisak ahihi. Tua Pasal in tua numei pen “I Nu” suaksak in, tua numei in tua pasal pen “I Pa” suaksak hi. Hih thu hangin, Pasian in Pasal nakguh pan Numei bawlkhia in, Numei hangin tua pasal nuntakna picing lungnuam sak ahihi (Piancil 2).

“Nu” cih kammal in thuthum hongphawksak mahbang in mithum hongphawk sakden hi. Tua mithum in: Nu, Pa, Ta/Tanu cih thumte ahihi. “Nu” kammal sungah “Pa” cih kammal kisel in omtawn tunga, “Pa” cih kammal sungah zong “Nu” cih kammal kisel in omtawntung hi. Hihthu hangin, “Nu le Pa” cih minih in kikhen khia thei lo in, anih un atawntung in omkhawm den hi. “Nu aw,” “Pa aw,” nacih sialsial in, nanuntak na khempeuh ah amau nih pen amasa hiden in, nang amau nungah athumna na hihlam nakiphawkden ding ahihi.

Ta te, tanu te in atawntung in athumna ihi a, akhatna leh anihna pen Nu le Pa ahi tawntung hi. Hih thu in banghongphawk sakhiam ihcih ciangin, mihing te khatkia a kipiang khia lo in, khat kia aiding bek inzong kinungta theilo hi cih thulianpi hongthei sak tawntung hi.

Hih thu hangmah in mihing khat ii nuntakna in kizopna nuntakna hi a, kizopna hoih ihneih zawh leh nuntakhoih anei ihihi. Ahi zongin leitungthu, leitungvai, leitungdeihna, leitungpilna, leitung ah ngahding lametna, leitung sum le paai te in nuntakna anuamsak kizopna hoih hongpia zolo ahih man in, Pa Pasian in khatbek aneih sun a Tapa hongpia in, tua a Tapa hangin, tua Topa sungah, tua Topa minin, tua Topa hoihna tawh khat le khat kizomsiam in nungta a, tua Topa hangmah in amah tawh akizomsiam a, amah tawh kizopna khauhsak in, vantunggam tundong kizopna khau atatlo dingin ei mihing te hongdeih ahihi. Rev. Fr. Damian Dal