ZAM Thupuak :: 02 Jan 20 (Coronavirus pan bangci kidalding)

Wuhan Coronavirus (nCoV) natna pan bangci kidalding

Tulaitak leitung bup ah hong kizel in a lauhuai leh a kilawh baih Wuhan Coronavirus (nCoV) natna pen Zomi tampi te omna Malaysia leitang tungah zong hong om ta ahih manin mipih a kua maciat kidawm in I om ding kisam mahmah hi.

Hih natna pen sengam pan in hong kimu khia hi a, ganhing te tung pan in hong kilawh natna nam khat ahi hi. Mihing leh mihing tungtawn in manlang takin kilawh thei ahih manin gam tuamtuam te in zong hih natna kidal na ding nasia tak in na sem a, leitung bup cidamna lam kipawlna World Health Organization (WHO) in zong bang ci kidal ding cih tangko na nei hi.

Hih natna pen anuai lampi te tawn in kilawh thei hi.

• 1. Huih dikna lampi te pan in kilawh baih penpen hi. Gentehna : Nak, kam cih te pan.
• 2. A siangtho lo ahih kei leh natna lungno a om sa vante I lawn na pan in zong kilawh thei hi.

Hih anuai a dan in pumpi tungah hong kilah leh aman langin zato ah pai in kivel sak pah ding thupi mahmah hi.

• 1. Cisa in pumpi satna 38◦C nuai a kiat theih kei leh
• 2. Bukhuh in huih dik ding hamsa sa a, I tha hong bei hanhan leh

Hih natna pan in I kidal theih na dingin

• 1. Tuap lam damlo te tawh kinai tak in om khawm lo ding
• 2. Na khut siangtak in sil pahpah lecin hoih pen hi.
• 3. Na bukkhuh ciang leh hatchai (Sneezing) ciang in na nak leh na kam hoih takin hum ding (Tissue ai kei leh dial tawh hoihtak in hum hamtangin)
• 4. Na bukkhuh ciang leh na hatchai (Sneezing) ciangin na kidalna tissue te hoih tak in tun in ninbung ah pai in. Na ut na peuh ah thangpaih kei in.
• 5. Tua tissue ahi a, na kidalna khat peuh na lawn khit sim in na khut siangtak in sil kik pah in.
• 6. Na pumpi siangtho na hahkat in tha om ding ann te ne in ih mut ciim sak mahmah in.
• 7. Ganhing tuamtuam te tawh kisukha, kisawk kha lodingin om in.
• 8. Sa a min siang loin ne kei hamtangin.
• 9. Sasan na zat leh zong a minsa atna leh a sial atna khen hamtangin.
• 10. Mitamna mun te ah pai ding kidawm inla napai leh zong na muk leh na kam tuam hamtangin.

Zomi te mimal kim Topa’n hong kem in hih natna tawh hong kipelh sak tahen.

ZOMI CUP NUAMTAK KIZO THEI

Kumsim in Zomi Nam Ni muakna in I bawl ahih Zomi Cup 2020 pen January 25-27, 2020 sungin Padang Bola E RRI tualpi ah nuamtak in kizo thei hi. Zomi Cup 2020 ah khua 13 pan team 14 kipha hi. Zomi Cup 2020 ah Champion New Darkhai FC in hong ngah in First Runner Up Ngalzang leh Second Runner up Ngente in hong ngah thei uh hi.

Kimawlna tawh kizui in a hoih vive sungpan a hoih phadiak, a team phattuam na ding a bawl zo phadiak te zong pahtawi na kipia a,

• Best Goalkeeper – No. (1) Pau Sian Khai (Ngalzang)
• Best Defender – No. (3) Thang Suan Lian (Tuipi)
• Best Midfielder – No. (23) Pau Kam Cin (Ngente)
• Best Striker – No. (11) Thang Sian Sang (New Darkhai)
• Top Scorer – No. (21) Hau Lian (New Darkhai)
• Best Player – No. (88) Rolawmaa (New Darkhai) te in hong ngah uh hi. Best Player hong ngah ahih Rolawmaa pen Zomi Manchester United Fan te in zong pahtawina RM100 hong piak sak uh a, kilungdam mahmah hi.

ZOMI NAM NI AH PANKHOP DING NGETNA

Malaysia a om Zomi ten kumsim a i bawl den ahi i minam ni a sawtlo in hong tung ding hita hi. Abeisa kumte mah bangin tukum zong thupitak leh picing takin bawl theih na dingin 06 January 2020 in ZAM zumpi ah kimuh khopna kinei hi. Zomi te in minam picing leh minam kician I hih na kician takin I lah na leh I minam I pahtawina tawh in 2020 Zomi Nam Ni zong nopcitak leh picingtak a i bawl zawh na’ng sum leh pai tampi mah hong kisam ding ahihmanin muanna leh lametna lianpi tawh Zomi Nam Ni Committee in anuai a bangin ma i pankhopding kong zawn uhhi. Mi khat peuh ahih kei leh kipawlna khat peuh I pawi hi loin Zomi te I minam ni pawi ahih manin mikim in mawhpuak la in pang khawm in I sep khop ding zong I kizawn hi.

Zomi Nam Ni adingin sum leh paai tampi mah kisam a I pan khop ngeina bangmah in tutung zong Khua ki pawl nate panin RM 200 leh biakna Pawlpite panin RM 300 tawh mapang khawm dingin I kizawn hi. Khua kipawlna, Pawlpi bek hi loin mimal mahmah in zong ka minam ni pawi ading kihel nuam ing a ci te zong lungdam takin kisang hi. Nang kihelna hangin I minam pawipi lawhcing tuam ding hi. 2020 ZOMI NAMNI Committee

ZOMI NAM NI ADING PANKHOPNA HONG PIASA TE

• 1. ZEM Pawlpi RM-300
• 2. MLPP Pawlpi RM-300
• 3. Phaiza Innkuan- Malaysia RM-200
• 4. ZCF-Kajang Pawlpi RM-200
• 5. MBF Pawlpi RM300
• 6. Ngalbual Khua Kipawlna RM200
• 7. Cikha Khua Kipawlna RM200
• 8. Lezang Khua Kipawlna RM100
• 9. Haupi Khua Kipawlna RM100
• 10. MZCC Pawlpi RM300
• 11. Tauleng Khua Kipawlna RM150

UN AH APPOINTMENT KILA THEI

UNHCR zum ah mithak san na a lunggulh te in online pan in appointment kigen thei hi. Hih pen ei mimal tek in I om na mun pan in lak theih ding in hong gelsak uh hi a, ahi zongin ei leh ei lak ding lem a salo te in I kipawlna zum te pan zong ki hih sak thei ding hi.

Tua ban ah hih appointment ngetna ah I zat Phone No. te pen khel thimthum loin hoih tak I zat ding kisam hi. Ei Zomite sungah phone No. a nawh khel mahmah om a, tua bangin I khel leh UN pan appointment hong pia in hong sap ciang contact ngahloin om leng mi dang supna hilo in ei mahmah I supna pi suak ding hi. Tua ahih manin zum ah I piak sa contact No. te it in kemcing ding zong thupi hi. Hih online pan appointme -nt lakna ei leh ei a la nuamtein ; http://www.refugee-malaysia.org ci-in Google ah at leng hong suak pah ding hi.

Innkuan lutpih nuam a ngah thei nailo te zong online pan in appointment kila thei hi. Ei leh ei a hih thei lote in zong kipawlna zumte pan zong nisim in kihih sak den hi.

2020 ZSM LAIBU KINGAH TA HI

Malaysia zomi Genvai Kipawlna (ZSM) 2020 ading ki lutthei ta a, ZSM laibu te zong kila thei ta hi. ZSM lut man mi khat ciang kum khat ai RM 20 hi a, hih na lutna hang tawh ahamsa a dong tuak I mipihte a panpih, adah akap hun ah a khitui anulsak na hi gige hi. Hih ZSM ah member na lut na in nang a ding a pia na hikei a, panpihna akisamte a panpihna hizaw hi. A kisam khat I panpih na in Pasian deihna zong ahi hi. 2019 sungin zong tu ciangciang Zomi pih te luang (29) bang lei ah I

tuh theihna in nang leh kei I pankhopna ahih bang mah in mailam ah zong mapang khawm lai dingin zong kong zawn phapha uhhi.

ZSM ADING PANPIHNA HONG PIA TE

• 1. MBF Pawlpi RM300
• 2. Taaklam Khua Kipawlna RM200
• 3. ZEM Pawlpi RM1500
• 4. Phunom Khua Kipawlna RM-200
• 5. Phaiza Innkuan – Malaysia RM-200
• 6. ZCF-Kajang Pawlpi RM-200
• 7. Agape Puchong Pawlpi RM-300
• 8. Ngalbual Khua Kipawlna RM200
• 9. Haupi Khua Kipawlna RM200
• 10. MZCC Pawlpi RM500
• 11. ZCF-Bethany Pawlpi RM200

PILVANG TAK IN OM SAWM NI

Tuhun laitakin kimat kihen hong tam mahmah a, Malaysia kumpite in a gam sungah phalnalo tawh om mi tampi tak siangsak nuam ahih manin kimat kihenna hong tam to semsem ding hi ci gen khia khin uh hi. Mun tampi ah Oparasi lut kawi kawi ahih manin I omna ciat ah kidawm tak, pilvang tak in om ding hanciam ni. A thukin lua mahmah ahih kei leh vakvak kei zaw ni. A diakdiakin Immigration te leh CID te uniform silh loin vakvak uh a, tua tungtawn in pawl khat in sum zon na in

hong nei beh lai uh a, hong pang kawikawi in tampi pi tawh hong kitan sak uh hi. I vak suk vaktohna ah kiim leh pam zong hoih takin I et theih ding hong thupi mah mah hi. I omna veng kim veng pam ah zong gam tat zia om zia te hoih tak kidawm ciat ni. Mite mitdong ding leh midangte a nawngkaisak lo dingin kidawm ciat ni. Kimat kihen bek hiloin migilo zong tam ahih manin I kim I pam om zia hoihtak telpha in gamta ciat ni.

Na sepna ah thunei te in sitna khat hong neih leh kei pen UNHCR ah gambel in hong san ding ngak in a om hi ing/UNHCR card tawi gambelmi ka hihi. Ka nuntak nading hih teng ah part time tawh na a sem pak hi ing ci-in I gen theih ding thupi ding hi. Malaysia om Zomipih a kuamaciat I omna gam huihnun zia tawh kizui in kidawm ciatni cih hong zasak phapha ung. A zenzen in kimat kihenna khat natuak leh ZAM zum ah hong zasak pah in. Nang ading in a ready sa in om den uh hi.

WELCOME TO ZAM

Kawlgam, Vaigam, tuipigal leh gam tuamtuam pan Zomi tampi omna Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah hong hawh/phak hamtang in thapiakna leh idea tuam tuam piakna nong neih nadingun kong zawn phapha uh hi.

ZATO LAM TAWH KISAI

Zato lam tawh kisai-in vai khat peuh na neih leh ZAM zum ah hong ko in. Contact :Sia Mungpi 018 3122 957

TUKAL SUNG THONG LAM BUAIPIH

• 1. Langh Khan Pau (Tuivial) Sunway Mentari Court pan kiman palik zum ah kikan pih
• 2. Pau Khan Cin Sunway Mentari Court pan kiman palik zum ah kikan pih
• 3. Thang Lian Mung (Phunom) Sunway Mentari Court pan kiman palik zum ah kikan pih
• 4. Cin Lam Khual (Phunom) Sunway Mentari Court pan kiman palik zum ah kikan pih
• 5. Sian Khan Thang (Phunom) Sunway Mentari Court pan kiman palik zum ah kikan pih
• 6. Thang Lam Muan (Ngalbual) Sungai Buloh thong ah kikan pih
• 7. Zam Ngaih Sang (Ngalbual) Sungai Buloh thongah kikan pih
• 8. Khup Suan Pian (Ngalbual) Sungai Buloh thong ah kikanpih
• 9. Cin Suan Dal (Tongsial) Kawlgam ciah na ding kivai hawm pih
• 10. Gin Muan Sang (Tongsial) Kawlgam ciah na ding kivai hawmpih

KIMAT KIHEN NA TUAK LEH :Zomite kimat kihen na tuak zenzen uh leh hih phone no. te ah na hopih pah in. Nang adingin atawn tungin kiging sa in om den uh hi.

• Sia Tuang Pu : 016 254 4093
• Sia Zo Mung : 017 663 6087
• Sia Maa Mang : 018 231 1365
• ZAM Hotline : 016 293 9027

ZOMI TE ADING NASEP : Malaysia gam sung om Zomite nasepneilo in nasem nuam mahmah napi nasep zon nang a lemlote in ZAM zum ah hong dawp un. Zomite ading man ngenloin na sep kizon sak den hi. Contact – Sia Mamang – 018 231 1365

LUNGDAM KOHNA

1. Sia Khampeek (Norway) RM200

Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi bangin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hong pia tahen.