A melhoih penpen ka Nu
Khuakhal huihkhi langin, tuk thualguah hong zu in, phalbi daidam hun hong tungzelzel mimbang piankum ki dangmahleh ka nu melh mah hoih penpen…
A kumte hong tam semsem in, a sam te kang, a ha te om nawnlo in, a vunte a ton zongin ka nu’ melmah hoih sa pen ingh.
Anhuanna pan belmang baangin, a lu tungah vutkhu vaikhu baang mahleh ka nu’ melmah hoih penpen lai hi.
Mi zatam lai ah ka nu’n na sem in, vontawi khat le nih te a’dingin guhtui kang liangin na hongsep manin- a aw te lingin, a khawng kawi ta maleh ka nu’ melhoihna kiam nai lo hi.
A tut kawm in puansawp in, ‘tawl mahmah ta ingh’ ci lo hong nuihsan/hong maitai hiuhiau ka nu mel hoihna kiamthei kei.
Tuni dong zingsang tho in, tate a’ding an hong huansak, zing vai hong hawmsak, nitak ciah ciang hong dawn in hong hopih ka nu mahmah a melhoih sa ngaungau ingh.
A tha kiam in, a vun bek a omlai zongin a khangno lai mahbangin ka nu melhoihna khang semsem sa ingh.
Puanhoih silhlo in, ki zepna manpha te a zatloh hang ka nu hoih veve hi.
Pasian kiangah thu hong ngetsakna te, tate a’ding a piakkhatna te in ka nu melhoihna kemcing hi.
Kum tam mahmah taleh moisuah in, liapaal zatam sang a melhoih zaw, a it huai zaw, a ngaih bang zaw, a moi suah zaw ka nu hi. Ka nu mahmah a melhoihsa ingh.
A melhoihpen, ka nu aw, nangmah na hi aa, ka it ka ngaihpen zong, ka nu, nangmah na hihi. Siamsin Library
Comment piaknop aomleh...