Lungkiatna ~ Dr. Ngul Khan Pau

Lungkiatna ~ Dr. Ngul Khan Pau

“…vangik pua-in a gim mite khempeuh aw, ka kiangah hong paita un, lungsim tawldamna ka hong pia ding hi. (Matthai 11:28)

US ah Doctor of Missiology ka sin sung, kum 1993-95, ka lawm it mahmah khat American Chinese tawh ka kithuah thei tawntung hi. Amah mi piangthak, kha mangthang vei mahmah khat hi. Lai Siangtho sim thanuam bek hiloin Nipini nitak simin Vineyard Fellowship ah ka kikhawm thei tawntung uh hi. Ka Lai Siangtho sangkahna ah Master of Divinity hong sin a, lai zong siam mahmah hi. Ka kikholh uh ciangin thungetna ka neikhawm tawntung uh hi. Sawt kong kikholh uh ciangin buaina nei ahih lam hong gen hi. Ama buaipih ahih leh ‘depressive mood’ lungkiat maisuah nei hi. Zatang a nek loh ciangin sih ding bekbek gen thei zel hi. Khatvei zong, “Pau, na kithat leng bang ngaihsutna na nei diam?” hong ci hi. Pianthakna thu-ah buaina nei het lo napi, ama leitung lungsim in natna nei hi.

1982 kum Union Biblical Seminary, Yavatmal, India ah ka sangkahpih i sanggam Mizo pastor khat in, “Pau, ka dam het kei a, zato ah nong paipih kisam ka hi,” hong ci hi. Tua nitak lamin Sanginn mawtaw tawh zato ah kilak dingin ka pai uh hi. Tua mawtaw sung bangah thum in tau ngakngak hi. Ken zong ka lawmpa hih bangin hong dam loh mawk pen lungkhamhuai, zato ah tuzan lum leh hoihzaw ding cih bangin ka ngaihsun hi. Amah pen zi leh ta neisa hi a, a zi leh a tate tawh a kikhen zawh uh kha thum bang a pha pan hi. A lai zong bel zo pha lo hi. Mikang kam zong a gelh theih hangin paukhiat ding haksa sa mahmah ahih manin lungkiatna lianpi nei hi. Ama’n, “Hih bangin kong cinat ciangin inn lam ciah ding bekbek ka ngaihsun hi,” ci mawk hi.

Zato ka tun uh ciangin doctor in a khutdawh domin a blood pressure en masa a, tua khit ciang a pumpi hong vel a, tawl khat zawh ciangin luna damna ding ci-in zatang tang sawm hong pia in, “Bangmah lungkham kei hen, dam mahmah hi,” hong ci hi. Tua kammal ka lawmpa’n a zak ciangin hong khuadak to a, “Kei dam hong ci maw, kei dam takpi maw, lungdam lua ing,” ci hi. Ka kuan lam uh mawtaw tawh a pai pen, ka ciah lam uh ciang mawtaw kisam nawn lo in sumbuk ah van lei dingin ka paisuak uh hi. Ama pumpi nopmawhna sangin a lungkiatna gimpihzaw na himawk hi.

Tua lo a beisa kum 38 khawng hi dingin ka um hi, ka theih ngei papi khat tawlkhat sung la tomno bekbek sa-in khuasungah vak kawikawi a, thungetna zong a neih ciangin a kammal zatte hoih mahmah hi. Tua hun lai-in pianthakna kilim gen mahmah ahih manin amah zong pianthak lungdamna hi dingin a ngaihsun pawl zong om uh hi. “Jesu’n hong domto kei ka lungdam lua hi,” cih bang a sak ciangin tawlnga thei lo ahih manin khawl phot in i cih dongmah sasa hi.

Ama buaina ahih leh a nasepna panin mite’n kam tawh na lausak uh ahih manin, tua lauhna tawh hong om ciangin khuamial peuh leh kei hong that ding mi hong paisawm hi, cih bangin ui ham leh, mi kiho za leh hong kuan ta uh ei, ci-in patau mahmah hi. Tua hun lai-in “piangthak” peuh leh buaina kinei nawn lo, cih tawh thuhilhna kiza tawntung ahih manin tua bang lauhna tawh nungtate a piangthak lo hi dingin kingaihsun hi.
Lungsim lauhna sawtpi hong kidiah ciangin “puak zawhloh lunggimna” suak ahih lam kithei kha lo hi. Tua papi ka gen pen zong a sawtna ciangin amah leh amah kithat hi. A kipat tu’ngin limtak kigenpih henla, a nasepna a lausakte bang zong tawh kimu in amau kam mahmah panin bangmah kong lawhsawm kei uh hi, cih bang za leh a hoih tuam ta’m cih ka ngaihsun hi. Tua bek hi loin, ama buaina damna dingin thungetna kineihsak a, ama lunghihmawhna limtakin kigensak ngei lo hi. Mite’n counseling a cih uh ciangin lungsim buaina, lunggim puakzawh lohna khawng zong a hilh thei dingte kiangah na pai uh hi. Hih lungsim buaite pen Pasian nasemte’n i huh theihna ciang a om hangin “clinical depression” mite bang zatang khawng mah zat lohin hi thei nawnlo hi.

Abeisa hun a i thuak gimna leh maizumnate i tawldam ciangin hong kipanin “lungkiatna” natna hong neisak thei hi. Gal kidona, gal omna munah mi a liamte cih loh buang cina tawm mahmah hi. Ahi zongin gal hong ven khit ciangin natna nei ahih lam uh hong kithei uh a, misi hong tam mahmah thei zel hi. Tua mah bangin a beisa lungsim gimna khempeuh a bei na hi loin i lungsim koi lai hiam khat ah na om hi. Vai gik khempeuh a bei ciangin tuate hong kipanin natna nam tuamtuam hong tun hi.

LUNGKIATNA BANG CIH DING

Lungkiatna i gen ciangin lungkia ngeilo mi omlo ding hi. Ahi zongin tua lungkiatna sungah om loin a pusuak a paisan theite hampha uh a, tua sunga teng dente in haksatna nam tuamtuam tuakin a tawpna ah sihpih thei uh hi. Tuni in a kicinga ka gen khit theih loh hangin tam lo kikup ding kong gelh hi.

1. Lungkiat hong kipatna a bul mah theih ding kisam: A kipatna panin i siansak loh manin dam theilo cih na tam mahmah hi. Tuate pulakkhiat theihna mah nei leng kidam baihzaw hamtang hi. A kigawm toto ahih hangin a kipatna a hang pen pholhkhia in maisak ding ahih leh maisakpah in maisak nget ding ahih leh zong ngenpah leng i dampih ding hi.

2. Nang leh nang kimaisak in: Mi tampi amau leh amau kimawhsak den, “ka tua cih manin tua ci kha hi ing,” ciin a piang khinsa hangin amau kimawhsakin kimaisak theilo uh hi. Midangte maisak baih kisa zaw a, ei leh ei kimaisak ding haksa kisa thei hi. Topa Pasian in na mawhna khempeuh hong maisak leh nang zong ‘nang leh nang’ kimaisak pah in.

3. Pasian kiangah pulak in: Pasian in i haksatnate a theilo hiloin ama’n mu tawntung hi. Ama mai ah kipulak leng damna kingah hi. Khatvei pulak ziau cih hi loin eima lungkim zah kipulaklak ding hi.

4. Mi tawh na kikholh loh man zong hithei hi: Mi tawh kikhawlte lungkia ngei lo cihna hi lo hi. Lungkiatna hong kipatna zong kikholhpihte hang hithei hi. Ahi zongin a damna ding zong mi hoih i muan lawmte tung pan hi thei hi. Amah bek om a kingaihsunsunte lungkiatna buannawi sungah kia baih uh hi. Mi hong simmawhna a kipan nu leh pate’n hong kepkhialhnate zong i sungah om den hi. Tuate in i nuntakna sungah hunkhat ciangin hong buaisak thei uh hi.

5. Na hoih sem inla midangte huh in: Lungkia mite amau kibuapihte ahi uh hi. Tua hangin nang kingaihsun loin midang huh ding, a hoih a pha khat peuh sep ding na hanciam leh tua in damna lampi hong hi ding hi. Nuntakna man nei na hih theihna dingin nahoih napha sep ding hi. Hih sepkhiatnate hangin lungkimna hong piang in, a nungta bek hi loin napha sem dingin a nungta i hih hamphathuai penpen hi.

6. Sungkhia in: I gensate tawh kinaih mahmah ahih hangin lungkiatna ding thu leh late in i sungah zungkha hi. Tuate sunkhiatna ding mi muanhuai kisam hi. Catholic Pawlpi in siampite kiangah kipulakna a neih uh manpha mahmah ahihna om hi. Protestant Pawlpi sungah zong i haksatna leh khialhnate a nen a si a gen ngamna ding i kisam hi. Mite’ theih in khami mahmah zong na hi mai thei hi. Ahi zongin uplohpi-in nang sunglam ah buaina tawh nungta na hi gige thei hi. Kipulakna in damna tampi piangsak hi. Nang mahmah in zong Pasian kiangah pulak in amah tungah sungkhia lecin na puak van hong zang ding hi. Rev. Dr. JM Ngul Khan Pau