ZAM Thupuak :: 27 July 2014

Kipawlna Picing 5 Teng Kimuhkhop Kikna

July 19 ni nitak nai 5pm pan 9pm ciang CRC, ACR, ZAM, FRO leh DAAI makaite kimuhkhop kikna DAAI zumah ki nei kik thei leuleu hi.

Abeisa May leh June kha sung kimuh khopna panin hih kipawlna 5 teng zum seal ngiat tumin UNHCR ulian penpa Mr. Richard Towle leh a lawmte 6 tawh kimuh khop ding ngetna kineihna tungtawnin June 18 ni-in atung a kipawlna 5 teng tawh holimna kinei thei khin a, mipi te ading min manlo tawh kisai dotcianna leh atuak kha te daan a tawm theithei hong piak sakna dingun ngetna kinei khin a tampi takin phattuamna ngah hi.

Tutung kimuh khopna ah anuai ateng kikum khawm thei-in ulian te zong kimuh khop kik ding geelna kinei hi.

• Min kibat vai sapna angah te amau UN card ngahna kipawlna zumah pai masa thei leh hoih.
• Innkuan lutpih thei nailo te aman lang a hong sap theih na ding hih kipawlna 5 in huhna nget ding.
• Innkuan lutpih khin thei napi-in gamtel leh a dang maban a kisam pah theilo te a ding hih kipawlna 5 in huhna nget ding.
• P3 vai tawh kisai MY No. ngah khinsa UN ngah nailo te UN min sanna ngah mengmeng theihna ding ngetsak ding.
• Australia 842 form vai tawh kisai in atawm pen a beisa kumte zah mah la ding cih thu kiza.
• 93 Visa vai tawh kisai thuthak omteng kikum khawm.
• Kimat le kihen vai tawh kisai in thongkia khempeuh Body No. leh thong min ngah khiat zawhna ding leh OPI ah tensak ding.
• 2013 UN min sanna ngah ding a sazian lutsa, a sapsa tuni ciang dong a kikhinto te ading nget sak kik ding.

Hunman ciangin DAAI kipawlna in nitak an lim mahmah hong nekpih hi. September 20 ni ciangin ZAM in inntek semin kimuh kikna om ding hi.

Visa 93 a ngakte theihding thukin

US gampan in Visa 93 tawh sapding a ngak peuhmah in na pumngak kei un. Na Case uh Malaysia US Embassy hongtungkhin honkhat om a, ahi zongin US Embassy pan hong Contact theilo uhhi. A buaihuai khatah Malaysia US Embassy pan Phone tawh hongsap uhciang in a Phone Number avek in suaklo a, Missed Call ihmuphial zongin sapkiktheih omlo hi. Pawlkhat te’n nasepna ah Phone lenmanlo cihtengtawh Contact ki ngahzolo honkhat om hi.

Tua Contact ki ngahzolo te US pan hongsam te kiangah Email tawh ki zasakkik a, pawlkhat in a Email enmanlo hiam, ahih keileh a Email laihhiam ki thuzakna kitat hi. (theihding: Email pawlkhat pen “Spam” Box sungahzong lutthei ahih manin hoihtak Spam Box zong Check ding thupi hi)

Tukha July 23 ni in hih Visa 93 vaitawh akisam pawlkhat US Embassy ah Interview ki paipih a, apaithei sunsunte avai siangpah suak ahih manin lungdam huaihi. Ahi zongin Contact aki ngahzo tuanlo honkhatmah omlai veve ahih manin, August khasung khatvei hong samkikding uhhi. Tuahunbeek alapzo dingin na meltheih tanau te sungah Visa 93 tawh a ngak aomleh na zasaksawn un. US pan asamding te kiangah na hopih unla, a Lawyer ahih keileh a Agency te kiangah na kansak un. Tua hileh August khasung in Interview ki luttheipah khadinghi. Tua ahih manin hih Visa 93 vai tawh aki sawhkha limlim in navai uh pumngakcip lo a, kanzelzel ding kisam hi. Visa vai tawh kizopna ding: Mangsen 016 374 9423

ZWO pan Report

UNHCR-CDUki sapna tawh kizui in Numei makai teng July 24 ni-inMeeting UNHCR Conference hall ah kikah thei hi.

• Department (4) pan in thugenna hong nei uh hi. A masa pen in, IAD (Individual Assistance Desk)in koici danin sum-leh-paai tawh kihuh thei cih hong tangko khia hi.
• Sum leh paai tawh koici te kihuh:
• Dongtuak nasem zolote kha 2 sung kihuh thei.
• Deih loh pen in akiman/accident tuak ding,zi nasem theilo, a tate neulai/sangkah cih bangleh kihuh thei.
• Bang daninIADtheisak ding:
• IAD laikhak ding.
• Siavuan laidamlohna lai pua hamtang ding.

Naupaai te theih ding:

Naupaai te leh MCH ahih kei leh UNHCR tawh a kizom Clinic te ah pai hamtang ding. Nagil agol khit bek teh napai leh nanau pen kha (4,6) bang na cing khinta ahih manin damlo khat hi leh zong kibawl ding haksata hi. Gentehna in na naupaai sung na si tawm mahmah, nang lah ki-en sak ngei selo ding, tuahileteh nau nasuah ding ciang nasi tawm dinga nausuak theilo in om ding hi teh. Ahih kei leh nau nasuak phial zongin nau pendam suaklo ding hi cih thu zong hong thei sak uh hi.

EDU panin amau ngimna hong gen uh hi. June, 2014 ciang pasalno 16910 leh numeino 13939 om hi. Tua pen ei Refugee te kiciaptehna tawh hi leh kum 18 cing nailo te cihna hi.

PrimarySecondary in hong khen uh a,Primarytheikum 6-13 in ciamteh uh a, naupang 9210 om lakah 4552 bek sangkah uh hi.Secondarythei ciang pen Kum 14-17ciamteh uh a, naupang 6355 om lakah 864 bek sangkah uh. Adang teng koiah om? Na sem maw or khutdawhngen sak? ci-in dotna hong bawl uh hi.ah UNHCR sang, (120) val ki nei-in Volunteers sia 300 val kinei hi.

EDUnasep bulpi:

• Sangsia te’n naupang te koici lai hilh ding.
• Naupang khat amau family file leh sang registration sungah min kibang lote sit.
• Naupang khat ahih leh sangkah hamtang.
• Naupang sangkah lo, Nu leh pan sum nei lo ahih leh Sangsia te’nah nu leh pa haksatna va genpih ding.
• Laisimbu kicinglo ahih manin kumcin simin laibute apkim hamtang ding.
• Sangah van bang teng kisam? Naupangte bang kisam? cih teng zong ki-en koikoi hi.Sum tawh lei ding hileng (tein 5) bang ki sam ahih manin kilei zolo hi.

OPI: Immigration te’n hongmat leh ni (14) sung kem uh a, ki lakhia thei nawnlo uh hi. Pasal kimanzi in UN card nei khat ahih leh a nambat ciamteh sitset in UN interview naneihkazi/kapsal Card number hi cithei leh amau ading in lem pen hi.

17 August 2010 khitzawh UN ngahte

Kipawlna makaite UN tawh kimuh khopna pan hita leh USRAP khutletbu sungpan hita leh ZAM-ECM kimuh khopna te pan ahun zui a i gengensa ahi 17 August 2010 khit a UN ngahte US kumpi in lakna ding sazian sungah tuni ciang a kihelzo nailo phot hong suak hi.
17 August 2010 khit UN ngah te i cih ciangin damlohna tawh ngahte, thong pan ngahte a tamzaw hong ding uh a, 354 tawh kipan ding a, UN zumpi pan ngah te cihna hi. 2013 a Mobile Registration (MR) UN kipiak lai a ngah 791 tawh kipan te hong hi nailo hi.

Sepnasa om mah bangin 17 August 2010 khit a UN ngah 354 te ZAM zumpi pan amau lung-gulhna tawh kizui-in lai ki gelhsak den hi. Thuthak hi panpan nawnlo hi.

Lungdam – Ryan Emmanuel Cher

Kaalnih sung sitset ZEC-M&T sangah deihsakna tak tawh ih sang naupangte lai hong hilhsak khit ciangin ama sum mah bei-in sangsia teng, sang naupang teng leh ZAM palaai khempeuh July 25 ni-in sun-an (Lunch) hong nekpih lai hi. ZEC sang adingin Science vangil te zong hong pia khia hi.

ZEC Sports Day nuamtak kizo

July 19 ni-in Malaysia gamsung mun tuamtuam a om Zomi Education Center te ahi theizah kigawm khawmin SMK Raja Ali sang huangpi sungah kimawlna kibawl pih hi. ZEC sang 10 lakah sang 6 kihel thei-in naupangte thangah in nuamsa thei mahmah uh hi. Sang naupang kigawm 250 bangin hih kimawlna ah kihel thei uh hi.

Ahih theih leh kimuhkholh hoih penpen

Tulaitak pen UN in min kibang te anak sap mahmah laitak hi-in Zomi sungah tua dan a tuak kha a om leh bang mah launa ding omlo hi. UN zumpi na paima in kamlette ahih kei leh zum asem palaai te tawh kimu khol thei le teh hoih penpen.

ZSM pan dahpihna

Tonzang khuamiPaLam Piang lehSian Vung’ tapaTg. Sian Kop Mung/7/2014 ni in Kajang Zato pan asuahzawh asawtlo khat teh anuntakna beikik a hih manin ZSM zumpi pan vai khempeuh kibuaipih in nu leh pa lunggulhna ombangin Sg-Buloh hanmual ah kivui thei a, ZSM thukhun omsa bangmah in sumbei khempeuh zong zumpi panin kisik sakkhin hi. Adah akap Nu leh Pa tungah Topa’ hehnep na hong tung tahen. ZSM panin amau te tawh ih dahkhawm na ih pulak hi.

Tuipi khuami Tg. Thang Kap Lian Thang (Kum 25)pen Kawlgam pan lei lam zui in hong pai hi aa, Malaysia gamsung hong lutkhit 16/6/2014 ni in Pahang State sung ah Mawtaw accident na hangin a nuntak na hong beisan hi. Lamkal tuah siatna thu ahih manin ZSM zumpi hong kikoh ciang in ZSM zumpipan Sia Tuangpu in vadelh pah hi. Kipawlna leh UN vai puak te bangmah gen ding omthei nailo ahih manin zumvai hamsat na lianpi hong om a, zumvai teng khakhat val sung kibuai pih hi, asih zawh ni (33) khit 18/7/2014 Friday ni-in ZSM zumpi pan makai te (3) leh Tuipi khua pan ahi thei teng Kuala Lumpur panin Bus khat tawh kikuan kik a, Pahang State, Temaloh khua zato pi pan siluang pua khia in Temeloh khua RC pawlpi han ah lungkim huaitak in kivui thei hi. Hi bangin leitang ngah theih na’ng hong panpih Sia Francis Khampi (ZSM thudot pi, ZCCM President) leh Temeloh khua innteek RC Pawlpi te tungah lungdam na lian mah mah hi. Adah akap Nu leh Pa, sanggam, khuapihte tawh kibangin ZSM zumpi pan’ ih dah na ih pulak hi.

Gamngai KhuamiThang Phut Pau leh Nu Vung Man Lian te’ tapa,BoscoThang Zo Mang (Kum 8)pen damloh na tuamtuam hangin Sungai Buloh zatopi panin 21/7/2014 ni inleitung nuntakna nusia in hong beisan aa, Malaysia gam sung a om Zomi RC thuzui te kipawlna phualpi “ZCCM” makaih na tawh 23/7/2014 ni in Sunggai Buloh hanmual ah lungkim huaitak in kivui thei hi. Vaihawm ZCCM makai te khempeuh leh Zomi RC thuzui khemepuh, adah akap khempeuh tawh kibangin ZSM zumpi panin ih dahkhawm na thu ih pulak hi.

Zomi te UNO ah Siampu dinmun kingah taktakta

Zomi te ingak lah mahmah leh ithu ngetna ahi UNO i ameeng Economics and Social kipawlna ah Zomi Innkuan USA in anung amai ah behlap tuamtuan omhetlo in ZOMI min ngiat tawh Consultative (Siampu dinmun) 14 July, 2014 ni-in kingah taktak ta hi. Hih bang gualzawhna hongpian theih nading a vaihawm ZIUSA makai khempeuh pahtawina ipia a Pasian in thupha hong piaksak semsem henla Zomi te kumsawtpi ong makaih zawh nading un thu ngetsak lai ni.

Atung a thutawh kizawitawn mah in ongtungding August 27-29 nisung New York khuapi sung a om UN zumpi sungah Zomi te thu avasung ziahziah ding leh gualzawhna pawipi avakhaam dingin Zomi makai 10-200 kikal vapai ziahziah ding ci uh hi.

REMEDI/Tune Insurance leikul hamtang

UNHCR-IAD pan UN ngahsa te ading zato lam huhna 50% discount pen tukum September akipan REMEDI/Tune Insurance sungah lut gaita ding ahih manin hih Insurance a leilo te UN Card neih zenzen hangin 50% discount ngah nawnlo ding. Hih Insurance Zomi alei nuam khempeuh in ZAM zumpi ah min sazian hong pia un.