ZAM Thupuak :: 23 Jun 19 (World Refugee Day kibawl)

ZAM Thupuak :: 23 Jun 19 (World Refugee Day kibawl)

UNHCR ZUM AH WORLD REFUGEE DAY KIBAWL :: June 20, 2019 nitak 7:30PM-9:00PM sungin UNHCR zumpi sungah UNHCR Malaysia te makaihna tawh World Refugee Day kibawl hi. Malaysia gamsung aa om Embassy tuamtuam pan leh NGO tuamtuam te hong ki helthei-in picingtak in hun ki zangkhawm thei hi.

Hih hun sungah UNHCR Representative Thomas Albrecht in thugen na hong nei hi. Thomas in a genna ah Malaysia gam sungah gambel mi pen hongkhang mahmah hi ci hi. Ahi zongin Malaysia gam sungah gambel mi in ciapteh na pen khang tuanlo a, UNHCR lampan in gambel mi in ciaptehna a ngahnai lo mi kibehlap hibek hi ci hi.

Tulaitak in UNHCR te ciaptehna ah Malaysia gamsung bup a om gambel mi (UNHCR Card leh Asylum Seeker) Minsan na a neikhin pen 170,000 bang pha a, hih pen Malaysia gam bup mimal ih 0.5% ahihi.

Hih gambel mi tampi takin kum tampi sung mah a lametna leh thalak na uh pen a mau hong taina gam a ciahkik theihdong ahih kei leh adang lampi khat tawh gamdang khat a tun theih nidong uh Malaysia kumpi in a gamsung uhah suakta tak in omsak in nasep theih na ding phalna a ngah na ding uh zong ahihi ci-in genbeh hi.

Tua baan ah Pakatan Harapan te in kiteelding lai-in amau sepding tawh kisai a pulaakna No.35 na ah Malaysia gam sungah tawmvei sung hong pempak te adingin a bulpi hamphatna te ahi nasepna, cidamna tawh kisai leh pilsin na te vaihawm sakding cih zong kihel hi. Hi bangin thukhualna leh thuhoih gelna anei Malaysia kumpi te tungah zong zahtakna ka pia hi.

Tua baan ah Malaysia gamsung a om kipawlna (Local Civil Society Organisations) te leh mimalin mapang (Private Sector) te in hih gambel mite nuntak khuasakna ah a picing semsem leh a lawh cing semsemtheih na dingin mapang khawm in khutkilen kawm in sem khawm ni ci in hong gen beh lai hi.

UNHCR Representative Thomas in thugen na hong neih khit ciangin Community makai te tangin Karen makai nu in thugen na hong nei hi.

Tua khit ciangin tumging siam te in tumging tuamtuam tum na hong nei a, tua sungin World Refugee Day nitak annkuang um khopna kinei hi.

Zan 9:00PM hong cin ciangin khat leh khat banlet in inn lam kizuan ciat hi.

2019 – 2020 ZAM PALAI TE LEH PANMUN TANGKONA

2019-2020 kum khat sung ZAM ah Palai hong sepsak dingte leh amau panmun anuai a bang ahi hi. Mipi in muanna tak tawh ih tel ahih mah bangin sun leh zan cilo in Zomite adingin a tawntungin a kigingsa in om den uh ahih manin kisapna khat peuh na neih leh na hopih pah in. Nang ading a in kigingsa in om den uh hi.

Sia Kap Za Khup (President & ZEC Co-ordinator leh Public Relation) 011 3563 2059

• Sm Cing San Huai (Secretary & ZWO) 017 282 4801
• Sia Joseph Tuan Sawm Tuang (Vice President & Detention & ZSM) 016 254 4093
• Sia Kam Sian Mung (Treasurer & Health & Employment) 018 312 2957
• Sia Thang Zo Mung (Assistant Secretary & Detention) 017 663 6087
• Sia Maa Mang (Accountant & Detention) 018 913 2587

2019-2020 SUNG ZAM THUDOTPI DING TE

Tua ban ah 2019-2020 sung ZAM ah khalam taksa lam ah thudotpi dingin anuai a teng zahtakna leh muanna tak tawh kiseh hi.

• 1. Rev. Thang Do Khen : 017 611 5622 8. Rev.Thawng Khan Sut : 016 6443 011
• 2. Rev. Gin Khan En : 017 334 176 9. Rev. Pau Sian Piang : 016 318 5296
• 3. Rev. Dai Sim Mang : 016 615 7573 10. Rev. Thang Za Cin : 012 661 0046
• 4. Rev. En Cin Pau : 018 272 3720 11. Simon Pau Khua Muan Lal: 018 238 6204
• 5. Pa Thang Za Khai : 012 621 2447 12. Pa Thang Suan Piang : 016 254 3352
• 6. Rev. Ngin Khat Thang : 016 334 7900 13. Rev. Khen Za Dal : 012 263 6330
• 7. Sia Hau Thang : 016 282 0189 14. Rev. Peter Dal Khan Lian : 018 240 7634

ZU DAWN KIDAWM NI

Malaysia ah Methanol kihel zu adawn khakna hangin misi zong om in a silo pawl khat zong a mit in khua mu nawnlo cih bang om ahih manin Zu dawnte in hoihtakin enpha in zu hoihte mah dawn zaw ni. Tunai bekbek in Zu hoihlo hangin kawlgammi tampitak sikhin hi. Ahih theih leh dawn kei leng hoih pen a, ih dawn veve leh zong tampi dawnloin zu hoihte mah dawn sawm zaw ni.

PILVANG TAK IN OM SAWM NI

Ih omna Malaysia gam ah nisim phial mah in amun mun ah kimat kihen om thei den ahih manin ei lam pan zong kidawp mahmah ding ih kizasak phapha hi. Hidan in kimat kihennate hoihtak etphatna ih neih ciangin a tam zaw pen ih vakna leh ih kim ih pamte in hong thuaklah in zum ah hong khiatna tawh kiman kitam zaw hi. Hidan dinmun ih tuak loh nadingin ei mahmah zong ih om dan ih khawldante a kipan ih pilvang ding kisam mahmah hi. Ei suaktakna in midangte anawngkaisak ahihloh ding ngaihsut huai semsem hi.

Malaysia gam sungah ih om sungin kipawlna khat limlim ah hoihtak ih kihel ding, Pawlpi khat limlim ah hoihtak member ih lut ding leh ih khua kipawlnate hoihtak kancianin kipawlkhop ding thupi mahmah a, tua dan ih kipawl hamtang dingin zong ih kihan thawn pha pha hi.

Malaysia om Zomipih a kuamaciat ih omna gam huih nun zia tawh kizui-in kidawm ciatni cih hong zasak pha pha ung. Kiim leh pam a om mite in hong muh khialh loh dingin I om dan I khawldante kikem siam kawmsa in om ciatni. Vai thupi mahmah lobuang zong vakvak kei zaw leng hoih zaw ding hi. Grab tawh na vak leh zong na tuan ding motor hawlte hoihtak teelsiam lecin nang a ding hoih pen dinghi. A diadiakin mitamna munte ah tam vak kei leng ei ading hoih pen zaw ding hi. A zen zen in kimat kihen na khat natuak leh ZAM zum ah hong zasak pah in

ZAM ZUM AH HONG HAWH

Thangnuai khuami Dr. Rev. Thuam Khan Thang (Princi -pal of Bethel Bible College) in Malaysia gam ah hong zin sungin Zomite a itna leh aveina tawh ZAM zum ah hong hawhin tha piakna leh thungetsakna hong nei hi. Topa’n siapa hong zang semsem lai ta hen.

DAHPIHNA

Tuitum khuami Pa Khai Khan Mung (Kum 54) in 08-06-2019 ni-in Banting zato pan hong nusia a, avai teng ki buaipih hi. A tanaute lung gulhna tawh kizui in Kawlgam pan hong pai ding te kingak phot a, 17-06-2019 ni-in Bukit Tangga Chinese Cemetery, Kuala Selangor ah kivui hi. Amah pen ZSM hong lutlo hi mah leh hong kizaksakna tawh kizui-in ZAM/ZSM pan in a vai teng a kibuaipih ahihi. Pa Khai Khan Mung hong nusiatna hangin adah akap khem peuh Topa’n a lamdangin hong hehnem tahen. ZAM/ZSM pan in zong dahpihna ih pulak hi.

INTERVIEW NA PAI CIANG

UNHCR zum ah interview napai ciangin pelloin na theih ding thu pawlkhat hong om zel hamtang hi. Interview ah kiginglopi in napai pen nang leh nang akibawlsia tawh akibang nahih lam phawk gige in. Ih mailam kalsuan nadingte ei mau mahmah in a hoihpen dingin hanciam tek ni.

1. Thu hong kidongte hoihtak tel lopi in dawng kik kei hamtangin. (upmawh dawn or mangsia khiat in khiain dawng kei in) Telmel lopi in upmawhin na dawnna in na zum vai hong kikhel sak thei cih phawk gige in.

2. Kamphen te in pau telcian lo ahih kei leh nang lam panin kamphen te pau telcian loh na khat a om khak leh zong kisuangtaklo tak mah in kitel kei ci-in gen lel in. Tua bangin na sianggen na hangin nang a ding buaina bang mah om tuanlo ding hi.

3. Pawl khat in ei khua awsuah/awkaih tawh ih pau ciangin kamlet pawl khat in zong tello thei hi. Tua bang hun ciangin kamlet pawl khat in Tedim pau in pau in ci in tai cih zong kiza thei a, ahi zongin kamphen te mahmah in zong nang pau hong tel ding zong a thupi a hih lam phawk hamtangin. Kammal khat kitelkhial leh zong I vai pi khat ki pelh thei hi.

4. Zomi ahi lo namdangte in kamlet hong sep a, a pau na tel kei leh zong tello cih siangtakin gen pah zaw in.

5. RSC officer a tamzawin Malay pau zong tel ahih man in a thugen te na tel kei leh Malay pau tawh zong na tel lohna gen kik zaw lel in.

6. DHS na interview ciang hong dotna na tel kei leh na tel dongin dong kikkik lel in. Tua bangin dot kik hangin bang mah buaina om tuan lo hi.

7. Zum ah interview ding na pai limlim ciang zuu nam heha sa leh kamsan biabuasa khawng in pai kei zaw hamtang in.

NA UN VAI NAKAN NUAM HIAM?

Na UN vai lunghimawh in kannop dotnop khat peuhpeuh nanei hiam? UN Department tuamtuam ah laigelhsak nop na neih leh ZAM Member te ading mangenlo in ZAM zum pan lai kigelh sak theiden hi.

ZAM member I cihpen ZAM Card bawl ngei cihbek hi loin UN card a neih khit hang in a renew/hingsak den te pen member hiden cihna hi. Refugee na kicih sam hang UN Card naneih naikei leh UN ten kami hongci tuanlo hi. Tua a hih manin Zomi nahih leh ZAM card bawl in.

ZATO LAM BUAIPIH TENG

• 1. Thang Biak Khai (Cikha) Kajang Hospital
• 2. Zaw Latt (Tahan) Sungai Buloh Hospital
• 3. Tuang Khua Lian (Vangteh) Myanmar Embassy ah ki buaipih

ZATO LAM TAWH KISAI : Zato lam tawh kisaiin vai khat peuh na neih leh Contact :Sia Mungpi 018 3122 957

THONG LAM BUAIPIH TENG

• 1. Khup Khen Tuang (Bapi) Jelebu Necer Sembilan thong ah kimuh pih
• 2. Kam Pau (Vangteh) 12-06-2019 ni Sri Hatamas pan Oparasi tawh kiman in Jalan Duta ah kibuaipih laitak
• 3. Vungh Sian Thang (Singlei) 12-06-2019 ni Sri Hatamas pan Oparasi tawh kiman in Jalan Duta ah kibuai pih laitak
• 4. Nang Than Tuang (Ngente) 12-06-2019 ni Sri Hatamas pan Oparasi tawh kiman in Jalan Duta ah kibuai pih laitak
• 5. Mung Khan Dong (Lailo) 12-06-2019 ni Sri Hatamas pan Oparasi tawh kiman in Jalan Duta ah kibuaipih laitak
• 6. Mang Lam Thawng (Tungzang) 12-06-2019 ni Sri Hatamas pan Oparasi tawh kiman in Jalan Duta ah kibuaipih laitak
• 7. Cin Eng Lian (Ngente) 12-06-2019 ni Sri Hatamas pan Oparasi tawh kiman in Jalan Duta ah kibuaipih laitak
• 8. Cin Deih Tung (Laaitui) USJ City Mall pan 16-06-2019 ni Oparasi tawh kiman Complex PKNS Shah Alam ah kibuaipih laitak
• 9. En Muan Khai (Laaitui) USJ City Mall pan 16-06-2019 ni Oparasi tawh kiman Complex PKNS Shah Alam ah kibuaipih laitak

KIMAT KIHEN NA TUAK LEH : Zomi te sungah kimat kihenna na tuak zenzen leh hih phone no. ah na hopih pah in. Nang a dingin a kigingsa in om denhi.

• Sia Tuang Pu : 016 254 4093
• Sia Zo Mung : 017 663 6087
• Sia Maa Mang : 018 913 2587

NASEP TAWH KISAI : Zomi nasep neilote in nasep tuamtuam om hi. A lunglut leh dot nop aneite in Sia Mungpi : 018 3122 957