Bawi, kei ka lungkim ding hi ~ Lian Tuang
1) Zingsang khuavak sim in na mitnaite lakhia in na mai kong phiat sak den hi. Na khua a dam ding patau ka hih manin tui lum hithit ka bawl den hi. Ahi zongin kei le kei ka gamtat zawh nawnloh ni ciangin tuilum hi lo tuivot bek nangawn tawh ka mai nong phiat sakkik theih zenzen leh ka lungkim ngeungau ding hi.
2) Nawi ne kawm in an le tui na nek theih ciangin ka lungdam mahmah hi. Na ci dam in na tha a hat theihna dingin samkhau phel liangin si le sa piangsak ding an le tuite zongin kong tulh tantan hi. Ahi zongin kei ka tha a kiat ciangin buhcim siang tui bek nong tulh leh zong ka lungkim zungzung veve lai ding hi.
3) Na an kam a limloh ciangin an kamkhat kamnih na nek ding lunggulhna tawh huansak huankhang na paipai na ah ankuang tawh kong delh kawikawi a na gil vah dong kong pia veve hi. Ahi zongin kei ka an kam a lim melloh ciangin tawmvei sung bekbek ka gei ah ong tutpih thei lecin ka lungkim mahmah veve ding hi.
4) Na ngek lai in sungpai cisa, hek nuamlo khat peuhpeuh hangin lung ham in na kapkap thei hi. Sun le zan cih om loin ni nih ni thum kha khat sung bang kikem kikhoi in ihmu cim loin pat ningniang in ka om hang gim ing tawl ing ka ci ngei kei hi. Ahi zongin ka kum tam nungah khat veivei ka ihmut theihloh hun ciangin zan khat zan nih bekbek ka gei ah ong om thei lecin ka lungdamna kicing mahmah lel veve ding hi.
5) Na khut tawh nang le nang na kidom zawhna dingin ka khutmete len sakin kong khai lengleng hi. Na khut pan ong len in gim le tawl cih om loin lam na pai theih dong lampai kong kisin pih hi. Nong letna tua khutmete mah tawh khat veivei kei le kei tu zolo, ding zolo in ka om hun ciangin ong len kik thei lecin ka nuam lua mahmah ding hi.
6) Khat veivei ka lungleng in kong mu nuam mahmah thei hi. Na ngek lai in ka khut sungah ka tawitawi, na ihmut lai takin ka zutzut, na gim na tawl ciangin kong mekmek sak den ahi na khe tawh ong tai vingveng in la ka lunglenna ong veh thei lecin ka lungkim lua mahmah ding hi.
7) Ka kum tam in ka tha a kiat ciangin, na nau ngek lai kong kep bangin a lum a nel puan hoih nonote tawh nong kem kik ding hi kong ci ngam kei hi. Ahi zong in khuaphawk nawnlo ka hi phial zongin ka zahmawh teng ong sel sak bek lecin zong kicing ka sa hi.
8) Ahun a tun ciangin kong paisan ta ding hi. Ka tu ka tate ka nungsangah lungsim nawngkai in kisikna tuamtuamte gamh bangin kong nusiat khak lohna ding le ka nuntakna hunte thupha nak bangin na met bawl theihna dingun ka hunte manpha takin zatna tawh ka lungkim nuam hi. Lian Tuang
Comment piaknop aomleh...