Kolbulh thuak Palaite leh Kol kibulh zolo ZAM #2
Bang hangin condominium golpi aa inndei tampi lakpan Zomi Innpi tektek lutin asung aa teng ganhing kaih bangin hong kaikhia mawk hiam?
Zomi Association of Malaysia ci-in June 7, 2006 in Makai masate-in ana patkhiat uh Zomi Kipawlna pen, Zomi Inn pi ci-in condominium inndawl langkhat buppi kisaap aa, hunbit palai sem khempeuh zong ki giakpah hi. Palaite bek hilo-in, Zomi cimawh dongtuak, giahna ding nei pak lote, zum vai pai ding neite aa kipan khat veivei nupi naupang honpi zong giahtheih ding phalna kihong den hi. Hun tamzaw pen lengla dona inndei-ah agiak ki dim den hi.
A cina paizolote zong giak, accident tuak in sisan naisan tawh zong ki giak, naupaii zato kilak dingte zong giak, nek leh dawn belh ding nei vatlote zong giak, silh leh ten ding nei nawnlote zong giak, lunggim lua-in maban zopna ding theilote zong giak, lungsim dam nawnlo-in cincin kepkep a kuldente zong giak, naupang akem ding om vatlote zong giak, cina luna-in a khoi ding ompaklote zong giak, thong kiatna pan suakta-in belhding neilote zong giak, cih bangin cihmawhna, kisapna khat peuhpeuh aneite ki giakzaw hamtang hi.
Gammite omna condo pi ahih manin, amau-in zong kikepna bucing omtheihna ding anuai aa kongkhakpi pen card bek tawh ki lutthei dingin vaihawm uhhi. Mi dangte amau inndei tek bekah a lut hialhial laitakin, ei pen, sungtum pusuak ki tatsat ngeilo, kong kihon’ ding ngak aa dingding ki tatsat ngeilo, mi honpi om ihih manin ki gamdaii thei vetlo cih bangin, ih omna inndei neite leh veng le pamin a ut uh leh zong hong ettheih loh ding zah un ki-om toto himai hi. Ommah lo ding maw; Zomi mipi ih ki khualna, ih ki panpihna ding lampi dang om tuanlopi!
A hiding mah hilel mai! Banghang? Kuamah a nawngkai saklo inndei khawng saap zawh ding genloh tua inndei saap piakding zong ki lunggim denden hi! Air-conditioner om, sum omlo, kihong ngamlo! TV hong kipia, meitha beituam, honglo zaw! Palaite nekding an cinglo, a ne nunungte a hamsia pian himai! Palaite sum le paii sawmkhat sawmnih beek tawh kicial zawh genloh zum saap ding mahmah a palai teng lungkham denden! Tua dinmun ah, Innpi aa ih neih himawk aa, mipi tawh thu vaihawmna ahih manin veng le pam cihte kikhual zo nawnlo hita hi!
Zoplai ding…
Tg. Kham
Comment piaknop aomleh...