Zosuan Tuailai Khawmpi Mapankhop Ding Zotna
Zosuan Tuailai Khawmpi
“A Bucing Khantohna Ah”
23-26 April 2015, Tedim
Kong it uh a zahtakhuai Malaysia a om Zomi pihte, i Topa Zeisu Christ minin Zomi khempeuh na khut taklam uh kong len masa hi.
Hong tung ding April 23-26, 2015 sung Tedim khuapi ah Zosuan Tuailai Khawmpi (ZTK) a (2) veina bawl dingin ka hanciam uh hi. I gam leh i minam a khantohna dingin kimuhkhop, kimeltheih, kikholh tam bek hilo in bangci sep ding, bangci semkhawm ding cihte holimna neih ding lunggulhna hipen hi. Noh kiang pan zong a tam thei pen nong kihel ding uh kong zawn uh a; noh bek hilo in inn lam ah a om na innkuanpihte, na khuapihte, na khangnote uh hih hun ah hong kihel dingin na zasak le uh cin ci-in kong ngen nuam uh hi.
Hih khawmpi ah Zomi khangno khempeuh kihel thei a, kuamah kideidanlo hi.
Zomi leh Zogam adingin i sepkhopna khat ahih manin Malaysia pan zong thu leh la, sum leh pai tawh a kisam banga 
nong kihel ding uh lunggulhna kong zasak uh hi. Semkhawm, pua khawm in zawng khawm kik ni. Na hih theih zahzah uh tawh hong kihel dingin kong ngen uh a, kong muan mah bangun kong lamen uh hi. Thungetna ah hong phawk in, thu leh la kikupna khempeuh ah zong (internet ah zong) nong kihel den dinguh kong ngen uh hi.
Malaysia a Zogam khua om khempeuhte leh Pawlpi khempeuh hong kihel dingin hong lamen ungh.
Na lamen ding hi ung. A lungdam khol,
Zogam leh Zomi khantohna dingin na seppih uh,
Sd/- Sd/-
DR. HAU ZA CIN PA KHUP KHAWM MUNG
Makaipi Thuvanpi
Zomi Innkuan Singapore Zomi Innkuan Singapore
Malaysia a om Zomi te khatvei thasan kik lai-in ih gam ih lei ih puahna in Khua kipawlna, Pawlpi leh mimal kihel in sum leh paai tawh mapang khawm leuleu ni ei. Zomi leh Zogam in nang panpihna hong ngak hi.
Malaysia kumpi’n UNHCR te tungah Refugee te gamthumna paisak mengmeng ding ngen
Malaysia kumpi in UNHCR te tungah Refugee te gamthumna paisakna ding tawh kisai thulehla manlang sak mengmeng un cih thu zaksakna nei uh hi. Aphadiak in Kawlgam pan a gambel dingte gamdang puak mengmeng un ci uh hi. Dr. Shahidan Kassim in a genna ah “Ngetna bangin UNHCR te in a vai uh hong nawh uh hen la gambelte gamdang tungsak mengmeng in hi leh Malaysia gam sungah buaina haksatna tampi veng tuam dinga, daihna zong om ding hi” ci hi. “Tua banah UNHCR te tungah UNHCR Card tawite UNHCR Card ngah dingin kilawm takpi mah hiam cih thu zong hoihtak in enpha kik uh hen, Card ngah khin honkhat lakah ngah dinga kilawm lo tampi tak om hi.” cih tawh behlap lai hi.
Dr. Siti Mariah Mahmud dotna a dawnkikna ah “Hih lai a Refugee tamzaw pen gamsung buaina hang hi lo in, zawn leh ngauh man a sumzong a hong pai hizaw uh hi” ci hi. Dr. Siti Mariah Mahmud in UNHCR te Refugee min ciaptehsa mi phazah leh Malaysia gam sungah bang hamphatna teng ngah uh cih thu a kan khat ahihi.
Shahidan in UNHCR te min ciaptehna bulphuh in mi phazah a genna ah “Jan 31, 2015 ciangciang mi 151,838 pha khin uh a, amaute pen gamsung a utna peuh vuah Malaysia thukhun a palsat kei naak uh leh suakta takin ki om sak hi. Tua banah Refugee naupangte pen manngenlo in natdalna (Vaccination) zatui kisun sak in, pilsinna (Education) sang zong kikah sak hi” ci hi. Source : BERNAMA.com.my
Malaysia ah Zomi Nam Ni siim phei- IV
Zomi Nam Ni zingsang ka din khiat ma un Zogam pan Zomi Youth Association (ZYA) makaite kiangah thu hong tunga, “Tuni zingsang ciangin Zogam ah ZYA khua 51 ah kiphutta hi,” cih thu ahi hi. Zogam khua 51 ah ZYA omta cih theih khit cianga Zomi Nam Ni zang dinga kuan khiat pen thangah dan nuam mahmah hi. Zomite tuanna dinga Japan mipilte in khuak sa lianga a bawl uh mawtaw vot hiuhiau sungah tu kawmin a limlang pan ka khuadak kiaukiau uh a, lampam a pak hoih nono pak te lak ah Vaupak zong… Read more
Thein Sein Malaysia honghawhna vai
March 13, 2015: Thein Sein leh Malaysia kumpipa Najib Razak in Putrajaya innpi sungah a tuam vilvel in nai khat sung holimna nei uh hi. Tourism (khualzinna lam sang), Education (Pilna), leh Trade and Investment (Sumbawlna lam) ah nasia taka sepkhop ding vai kilimkup mahmah uh hi. Thein Sein lam panin ngetna anuai ateng nei hi :
⦁ Malaysia vanleng pen Yangon ciang bek hi lo in Mandalay dong zong Direct a om theihna dingin hong hanciam un.
⦁ Ei gam nih kikaal ah Kumpi thuneite lehkhualzinna Visa suaktatak ih neih theihna ding hanciam ni.
⦁ Malaysia gam sunga Meitui tawh lamsai a lian pen Petronas te in Kawlgam ah mun laak hong sawm hen.
⦁ ASEAN kipawlna ah Kawlgam kumpi in Chairman a sep sungin Malaysia gam hong khual mahmah ding hi cih thu teng hipipen hi.
Tua banah Thein Sein in Media te tawh kimuh ding a utlohna thu zong siang takin gen pah hi.
Rohingya te vai zong nasia takin kikupna nei uh hi. Malaysian Foreign Minister Anifah Aman in a genna ah “Rohingya Refugee pen Malaysia ah 100,000 val om uh hi. Tua te pen Malaysia kumpi in huh theih bangin huh in nasep zong pia ding hi. Ahi-zongin Palikte muhna ah kithahna a tamzaw apiangsak pen Rohingya mite hi in, Rakhine gam a thupiang in hih Malaysia dong hong zeel lai hi kha ding hi” ci hi. (Source: Channel News Asia)
Zu kamnamsa in Zumah pai kei un
Zum khat peuhpeuh na pai ciangin zu kamnamsa in pai kei un maizum huai lua hi. Na vai hong buaipih ding te’n zong hong kinlo tuam ding hi.
UNHCR-EDU nuai aom Siapi teng 2015 ading a (1) vei kimuhkhopna
UNHCR-EDU makaihna tawh 2015 asing a (1) veina Sang siapi teng kimuhkhopna March 19 ni zingsang nai 9:30 pan 2:00 ciang Methodist College Kuala Lumpur ah kinei thei hi.
Hih kimuhkhopna sungah UNHCR Malaysia alian penpa Richard Towle leh Heidy Quah (Refuse for the Refugees) hong kihel thei uh hi. Mr. Richard Towle in gambel mi tampi tak lenglo in Malaysia ah om ding cih thu hong genkhia ahih manin ki thanem mahmah hi. Heidy Quah in sang lam tawh kisai ama sepna leh atuak thu teng hopsawnna hong nei hi.
Sangsia panpihna tawh kisai
⦁ Sum (fund) om dungzui in ki panpih ding hi. Bang tan panpih ding cih pen sum (fund) tawh kisai ding hi.
⦁ Sangsia thak behlap ding, tangmi guanbeh ding pen abeisa adanin hithei nawlo ding.
⦁ Tulaitak a sangsia panpihna ngahsa te abeisa dan mahin panpihna ngah toto suak lai ding.
⦁ Sang sitna leh panpihna te a luimah bang toto lai ding.
Tukal Palaai te buaipih diak teng
⦁ Dim Khan Huai (Tauleng) HUKM ah 11 March in ki buaipih.
⦁ Ngo Ngai Lien (Heilei) leh Kam Sian Muang (Tungzang) 12 March in IAD ah ki buaipih.
⦁ Thang Kha Muang (Lezang) 16 March in HUKM ah ki buaipih.
⦁ Kham Lian Mung (Gamngai) 16 March in Hospiscare ah ki bauipih.
⦁ Khen Do Kap (Gawng) HUKM ah 17 March in ki buaipih.
⦁ Dim Khan Khual (Chanthazyi) Semenyih Camp panin 17 March in ki buaipih.
⦁ Tual Khup (Kapteel) KLIA Camp ah ki buaipih.
⦁ Thang Ngaih Suan (Kapteel) leh Kam Deih Pau (Kapteel), Kap Pi (Kapteel) leh Pau Deih Tuang (Langzang) Bukit Jalil Camp ah ki buaipih.
⦁ Mang Sawm Thang Kajang thongah ki buaipih.
⦁ Dal Sian Mang (Lezang) Dangwangi Lockup pan 19 March in hong suakta thei.
⦁ Cing Ngaih Piang (Nahnuai), Travels Palik zum pan in 18 March in hong suakta thei.
⦁ UNHCR-OPI camp leh thong tuamtuam aom mimal 47 ki report sak thei.
Goods and Service Tax (GST) vai
Hong tung ding April 1, 2015 ni panin Malaysia kumpi’npawlkhat 6% lak ding gelna nei hi. Gamdang pan vai tuamtuam ahi a, zattawm ding sum hong kikhak peuhmah 6% kidok ding hi.
Gambel galtai (refugee) tawh kisai UN Convention ah Malaysia kumpi in suaikai tuanlo ding
Refugee te hanga ih phutkhak haksatna tuam-tuamte hangin Malaysia kumpi kibuai ta ahihman in Refugee leh Migrants tawh kisai United Nations Convention ah member khat alut ding ki sawmlo himhim hi cih thu Datuk Seri Shahidan Kassim in March 12 ni-in gen hi. A genkikna ah “Malaysia kumpi in Refugee te tungah hehpihna nei-in, neek leh taak azonna vuah nawngkaisak ngeilo hi. Ahizongin amau ginatlohna hangin a kidawhdawh zo nawnlo hita hi” cih thu Parliament ah gen giap hi Dr. Mansor Abdul Rahman dotna a dawnkikna ah “Refugee te’n Cameron Highlands leh Perlis ah amau lungsim hoih lo teng sung khia in buaina tampi piangsak uh hi. Amaute ih khual manin zan vanzuakna munte ah van kizuak sak hi. Tua munte ah zong khuasung mite aa dingin mi lauhuaipi hong suak uh ahihman in a kihehpih zo nawn lo hi mai hi. Tu tadih in tuamun ah ansai thupi pen Thaite ansaite hi” ci hi. “Kong gensa thu teng hangin Malaysia kumpi in UN Convention ah Sign thuh lo ding hi. UNHCR thuneite khiangah zong UN Card hawm lai ding maw hawm nawn lo ding cih dong khin ingh. Siang gen lehang tu laitaka Refugee te pen Refugee taktak hi nawn lo uh hi. Zawnna leh ngauhna hanga sum thalawh dinga hong lut simte hizaw ta uh hi” ci lai hi.
Dr. Siti Mariah Mahmud in Migrants leh Refugee te tawh kisai UN Convention pen Malaysia kumpi sign thu leh nasep zong a piak uh hong kul pah ding hi. Tua thu Malaysia kumpi in bangci ngaihsut hiam acih ciangin Shahidan in “Malaysia kumpi lungkhamna lian pen in tua hi lo zaw a, gammi nasep neilote bangcih lehang nasep guan kim zo ding cih thu hizaw hi. Gam pualammi te bel a hunzui-in kigeelsak pan ding hi. A limlim in Malaysia kumpi in UN Convention ah Sign thuh mawk leh Refugee te leh Migrant te a hanthawn thawn suak lel ding ahihman in Sign thuh ding tawh kisai ngaihsut in zong kinei kha lo hi. Tua banah Malaysia in suai (Signature) a thuh loh zong hizah ciangin Refugee te leh Migrant te hangin kibuai gawp khin hi” cihsan ziau hi. Themalayonline.com
Tune Insurance te hong paikik ding
March 30 ni Tune Insurance te ZAM hall ah hong paikik leuleu ding ahih manin a leinuam khempeuh in nai 9am lapin hong pai un.
March 9 ni a leite Card ki ngahta hi. Tune Insurance pen April 1 nipan kipan aman khangta ding hi.
RSD/RST Interview
2013 kum a Mobile minsanna tawh Asylum-seeker card ngah te UNHCR card (Refugee Card) ngah theihna dingin RSD pan hong sam ding uh hi. RSD thudotna hoihtak nadawn theihna dingin na tangthu hoihtak ciamteh in lotngah in kiging in.
2010 August 17 khit zawh UN ciaptehna ngah khempeuh mimal tangthu tawh ki zui-in RST hong kisam ding hi. Ahonhon a gamthumna paisak cih om nawnlo ding hi. RST ngak a om khempeuh in na phone uh hongpai ding hoihtak kiging un. Phone nambat laih na om uh leh UN zumpi ah manlang takin laih sak un. UN zumpi ah laigelh sak nuamte in ZAM zumpi ah hong pai un.
ZAM pan dahpihna
Mualbem khua, Pa Zam Khua Dongh leh Nu Cing Za Awi te sung pan apiang tapa upa pen Tg. Dam Khan Thang (Kum 46) Sukte,No. 2446, in a omna innpi Pandan Perdana, Cheras, Kuala Lumpur panin 16/3/2015 ni-in khuak natna hangin leitung nuntak haksatna nusia in Pa Pasian kiangah hong ciahsan ta ahih manin mun tuamtuam a om adah akah khempeuh, adiakin Pa Nang Do Mang (Malaysia), tawh ki bangin ZAM zumpi panin ih dah khawm hi. Topa’n hehnepna hong tung hen la, hong thakhauh sakta hen.
Sanggampa pen 2014 kum aki panin Ampang zatopi, UKM leh GHKL te ah abanban in ki bawlin Dr. te leh sum leh paai tawh dam ding hi leh dam mahmah ding himah leh a bawl Pa gelsa ni hongcin ciangin kilen thei nawnlo, kikho thei nawnlo in hong paisanta hi. Sanggampa luanghawm tawh kisai in ZAM-ZSM makaihna tawh 18 March ni-in Sunggai Buloh hanmual ah lungkim huai takin kivui thei hi.
ZAM card tawite ading nasep
⦁ KFC Bukit Bintang a sem ding numei mangpau or malay pau thei Cashier semthei ding mi 3 kideih.
⦁ KFC Genting a sem ding numei mangpau or malay pau thei Cashier semthei ding mi 5 kideih.
⦁ KFC Penang Island a sem ding mangpau or malay pau thei numei leh pasal 12 ki deih.
Lungdamkohna
⦁ Sunway Emmanuel Church in tukal Thupuak bawlna ding RM200 hong panpih ahih manin ki lungdam mahmah hi.
⦁ Dong Sawm Tung (Keizang) in tukal Thupuak bawlna ding RM100 hong panpih ahih manin ki lungdam mahmah hi.
⦁ Tauleng khua kipawlna in tukal Thupuak bawlna ding RM50 hong panpih ahih manin ki lungdam mahmah hi.
Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email: [email protected]
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website 
tungpan kongsuaksak zelzel uhhi.
Note :: PDF tawh na simnop leh
Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Comment piaknop aomleh...