Second Hand

Second Hand

Carlos . G. Vaise akici Piantit mipil khatin “Courage To Be Myself” cih thulu tawh laibu minthang khat na gelh a, tua sungah a lamdang mahmah thulu khat mah tawh Article ngumngek khat laimai 4 dimin na gelh leuleu. Tua Article thulu pen “ Second Hand People” a hihi. Second Hand tawh kisai tuni kikum dih ni.

Laigelhpa in a genna ah “ bangma nei lo innkuan sungpan a hong khangkhia ka hihhangin Second Hand akici limlim pen silh theih dingin ka ngaihsun kei hi. Bang hang hiam cileh phalbi laitak a ka sanggampa mawza puanlum ka silh bek zong nuam ka sa kei hi. Midang te sungah om in ka kingaihsun a, kei leh kei ka hihna taktak a mansuah tawh ka kibang hi” ci tangial hi. Himah hi, midangte puan khat ih silh ciangin tua puan sungah ei a om ih hi a, tua puan pen ei neihsa hi lo ahihman in ih lungsim suakta thei taktak lo hi. Hih pen gentehna bek hi napi limtakin ngaihsun lehang mihing atamzaw pen midang neihsa, midangte pilna siamna leh midangte bawlsa nate tungah kinga lua mawk hi hang cih thu hong kilang mahmah hi.

Second Hand ih cih ciangin nikteen puansilh bek akigen hi lo hi. Mihing khat mipil hong suah theihna dingin a kigelhsa laibute asim phot loh uh kiphamawh hi. Ahizongin tua khit ciang eilehei aa pilna thak, leitungah a om ngeinai lo ahi mi tampi phattuamna ding ih bawl hong kul hi. Tua bang na hih theih kei leh nang pen Second Hand khat ahilel cihna na hihi. Na pilna tungtawnin midangte sep ngei nai loh khat na sep ding thupi a, na ngaihsutna zong midangte ngaihsutna tawh a kibatden loh ding hong thupi mahmah ding hi. Ngaihsutna thak, vanthak leh a kimu ngei nai lo tampi tak muh theiha hong om ciangin a kikhangto hipan hi.

Apple kungnuai ah papi khat sun thapai thallupsa in om a, amah amu mitampi in mihai sa uh hi. Asawt lo in Apple kung tung panin Apple gah khat hong kiasuk a, tua in papipa pen mihai ahihlohzia leitung theih in hong pulaak khia hi. Papipa in Apple kiatna hangin hih ih tenna leitungin “ Gravitationa Force” nei ahihna mukhia hi. Leitung in “Huup theihna” nei hikei leh tua Apple gah pen leilak ah kialo dinga, vantung lamah kiato vengvang ding cihna hi. Hihpa pen Second Hand hi het lo cihpen hong kitel mahmah hi.

Na om muan in limtak ngaihsun inla, nang leh nang hih thu kidong in “Kei second Hand ka hi hiam?”Pasian in nang pen Second Hand dinga hong bawl hi lo hi. Midangte tawh akibang dingin Pasian in nang hong bawl lo hi cih tel mahmah lecin hong deihsak penpen ingh. Nang pen Second Hand na hi kei hi!!

Zo Sunni pa’n,
Francis lamthang (Zomi Quavadis)