Mawhna Kiphawk!
Thu um nungak khat a pastor-pa tawh kimu dingin a zum ah hong pai hi. A dot nop venven khat om ahih man-a hong pai ahi hi. Tua nu bel tua pastor-pa’ pawlpi ah pawlpi mi hoih mahmah khat hi a, kikhop-a kipan pawlpi vai khatpeuh ah a hamciam mahmah, a pelh ngei het lo khat ahi hi. Laisiangtho simna, thungetna-a kipan thu-ummi khat nuntakna-a kisam nate peuhmah a hanciam mahmah khat ahi hi. Ahi zongin, bangzah ta-a biakna thu ah a hanciam hangin mawhnei mi ahih denna-in a lungsim nawngkaisak mahmah a, a mawhna a kisuan denkeiina panin suakta nuam mahmah hi.
“Banghang hi mawk hiam? Ka lawmte pawlkhat ka et ciang, kikhawm ngei se lo uh, biakna thu ngiat zong thupisa kei ung, ci lai uh, tuate tektek mah pen lungnuam mahmah le uh kilawm. Kei pen biakna lam ah ka kipiak zawhzah-a hanciamin kipia, tua kawmkal ah ka mawh ka khialhna, ka ginat lohna, Pasian’ mai ah ka siantho lohnate nisim-a kiphawk den!” ci-in a siapa kiang ah dong hi.
A siapa’ adingin bel thu haksapi hi lo bilbel hi. A theih luatm a tuah ngei den thu leh dotna ahi hi.
“Tua ahih leh thu khat hong dong ning ei. Misi khat tung ah tawi za a gik sik tumpi khat ngasuk-in puasak leng tuak misi in gik a sa ding hiam?” ci-in dong hi.
“Giksa mawk lo e,” ci-in dawng lian hi.
“Bang hang maw?”
“Tua misi pen a si hi ve’n. a gik leh a gil lo bangci theih peuhmah dinga!” ci hi.
“Tua lian aive,” siapa in, “Kha thu tawh kisai nate a awlmawh lo, ama’ kisapna nangawn a kiphawk nai lo mi khat in a mawhna nangawn a phawk thei lo hi—amah khat thu ah misi hi ve’n” ci hi.
Thu-ummi taktak khat pen a piangthak taktak ahih nak leh a piangthak lote sangin a mawhna a kiphawk zaw den ding ahi hi. Ni sim-in Pasian’ mah ah kilawmna a neih lohna, hoihna phatna khat beek mahmah zong a neih lohna, ama’ adingin Zeisu Khazih’ dikna bek a suan a muan ding a omnate kiphawk den hi.
David in, “Ka tatkhialhnate (transgressions) ka thei a, ka mawhna (sin) ka mai ah om niloh ngiitngeet hi” ci-in na thum ngeungeu hi (Late 51:3). Pasian mizat Sawltalpi Paul in, ” Ka sung ah na hoih khat mahmah zong teng/om (dwells) lo hi cih ka thei hi…. Hingim na zen ing e! (What a wretched man I am!)” ci-in na thuum ngaungau hi (Romans 7:18,24).
Thu-ummite a mawh a khialhna uh a kiphawk den pen uh thu lamdang hi het lo hi. Khuamial sunga om mi khat in a pumpi tunga baang nin khatpeuh, ahih kei leh a siantho lohna khatpeuh a muh theih loh manin a phawkkhak loh hangin, khuavakna mun tung leh mu thei pahlian hi.
Thu-ummite khuavak sunga kalsuan/nungta mite ahi hi. Nuntakna Khuavak ahi i Topa Zeisu Khazih tawh kinai-in kalsuan thei semse lehang, i siantho lohna kiphawk semsem hi hang. “Kei bel siangtho kei lua ing” ci-a lungkiat ding hi lo a i mawhnate ahi banga mu thei semsem i hih manin mawh maisakna i ngah nading i Topa kiang i zuat semsem ding ahi hi.
Tua nungaknu piangthak mahmah khat hi napi-a a mawhna a kiphawk den pen lamdang lo lua hi. Khasiangtho in a lungsim sung ah nasem hi, cih kilang mahmah hi. Lunghihmawh nading om kei; banghang hiam cih leh i mawhnate hong pholak tua Laisiangtho mah in, “Kong it tate aw, a thu leh kamsiam bek tawh ki-it lo-in gamtatna leh thutakin ki-it ni. Tua in, thutak a i nutak taktak lamtak i theihna leh, eite i lungtang in hong mawhpaih peuhpeuh ciangin ama mai ah i lungsim tawlngakna i theihna ahi hi. Banghang hiam cih leh, i lungtang/sim sangin Pasian lianzaw a, na khemepeuh a thei hi” ci-in hong khamuan hi (I John 3:18-20).
I lungtang/sim sanga lianzaw Pasian in eite hong mawhsak dingin hong encik hi lo zaw a, i mawh i khialhnate hong muh ciangin a Tapa Zeisu Khazih tungtawnin hong mu zaw hi. Banghang? Tua i Honpa in i mawhna khempeuh hangin sihna hong thuak khin hi ven! “Tua ahih manin, tu-in Khazih Zeisu sunga om mi peuhmah adingin mawhpaihna (condemnation) a om kei hi” ci-in siangtakin hong hilh hi (Romans 8:1).
Mawhnei? Hi tham! Ahih hang mawhna a kimaisak khin mawhneite i hi hi! Zeisu Khazih hanga mawhna a mai mawhnei misiangthote i hi hi! Simul justus et peccator!
Rev. Zam Khat Kham
Comment piaknop aomleh...