ZAM Thupuak :: 13 September 2015

RSC Interview paizia :: Interview lutdingte kigualhna na omding hi. A lolte zingsang nai 7 bangin a tungzong omtuak hi. Lol zawh mah lah hoihlel in mu ingh. Kongpi ih lutteh ih UNHCR card tawh hong check aa, hong piakik pahin, asunglam RSC te ngakna phual ih tun’ phet mahin kamlet nasemte tung ih UNHCR card appah kisam hi. (A theilo tampi ki omthei hi.)

Pawlkhatte asung lam kisam suak pahin, interview ding aa kipan a vaite-uh zomkha pah hi. Pawlkhatte sun an nekkhit teh kisam kik pan aa, pawlkhatte nitak nai 4 khitciang a kisam zong omthei hi.

Hih pen RSC uliante vaihawm dandan hilel aa, ahih theih leh nibup hun abei lel dingin zong kigin’ hoihzaw mai hi. Lungsim patauh omlo tak aa ngakding kisam hi.

RSC Interview ma-in bangteng vaihawmna om

A masa-in ih UNHCR card ap pen tawh kamlet siate-in a zum sung va tum uh aa, hong pusuah kik uh teh token (laidal neu khat) leh ih card hong pia kik uh hi.
Tua hong piakding ciangin bang kam (dialect) zang cih dotna om aa, Zomi kamlet kicing mahmah lel (theihna ciangah) ahih manin kawlpau khawng siam hetlo pipi pauthei ingh cihkhak lohding thupi ding hi. Kamletna-ah buaina omthei hi.

Tua laidal neu tung ah ih MY nambat a cih kigelh aa, tua pen USA tun’ khit dong mah ciapteh gige ding bek thamlo-in, RSC khit zum mabante-ah tua nambat tawh ih thu ki ciamtehta ding, ci uh hi. Tuamah bangin, ih file nambat ih cihcih zong UNHCR card nambat hong hi nawnlo aa, tua MY nambat pen hita ding, ci uh hi. Mangngilh theih nawn vetloh, ciapteh gige ding cihna hipah leuleu hi.

Ei hun khatteh (zingsang tung zong hithei, sun lam zong hithei) kamlet nasemte-in a sunglam hong sam uh aa, interview ding na hinai hetlo-in (vekpi tuaci-in um ingh) kamlet nasemte khawlna khandeino sungah kamlet sia/nu kia tawh eima innkuan sung, nu leh pa, unau cihteng ii thu tomkim laidal khatah hong khumsak hi. Ih mipih kamlet sia/nu kia tawh ahih manin mang pau cih zong kizalo aa, ei pau mahin hong dot hiathiatna hun ki cithei hi. Tua laidal (form) pen, RSC bek hilo DHS zum khawng ah aki puak toto ding ahi hi. A denlam teh ulian pa/nu (officer) in zong tua laidal tung tawnin dotna tawm hong dong hi. Innkuan unau vai, min te, kumte vai ki cithei hi.

Innkuan unauteng dongh phadeuh

A vek sitsetin ciamteh manlo, phawklai teng ensuk ni. Hih dotnate pen ih vekpi-in hong dong dingin lamet huai hi.

• Min dang na nei hiam? Suahni, suahkha, suahkum?
• Zi/pasal leh ta nei maw, neilo? (A neite atuam in a zi/pasal’ min cihte, suahni, kha, kum cihte dong ding hi.)
• Nu leh pa suahni, suahkha, suahkum? (Keibang a suahkumte uh bek theician lai ka hih manin tuabek genthei ingh; Phadawm lai, ki ngahsak bilbel uh hi.)
• Nu leh pa suahna khua?
• Upmawh khak hetloh khatin, na nu in pasal bangzah nei cih leh na pa-in zi bangzah nei cihzong kidong hi.
• Nu leh pa kiten’na khua? A kiten’ kum? (A kiten’ kum cih pen keibang tello ka hih mah bangin theilo mah ka cih leh piangsak sam uh hi. A theite-in lah gending hipah ding hi.)
• Nu leh pa tulaitak kawh om cihzong kidong ngel hi.
• Nu leh pa tawh kisai hidan teng (phawk khakloh ommai thei) kidong aa, tuamah bangin sanggam neite aa ding a suahni, a suahkha, a suahkumte, innkuan nei uh maw, neilo cihte, ta nei uh maw, neilo cihte, tulaitak tua ih sanggamte koi mun, koi khua-ah om uh cihte kimtakin kidong hi. (Hih munte ah zong, sanggamte suahni leh suahkha pen kei bang theicianlo ka hih manin a suahkum lian bekmah genthei ingh. A omna uh zong ki thuzakna haksat tawh tellohte thei ke’ng mah cilel ingh. A theician taktakte-in bel gending hipah ding hi.)
• Malaysia ah ih laizom sanggam khatpeuh ommaw, omlo cih zong kidong hi. Zopzop lai ding… Zomi pih RSC interview phi dingte hong mazang tekta un! Tg. Kham (USA)

Zomi Bup Tatsatlo Lungdamkohna leh Thunget a (3) veina (3 September – 3 October 2015)

Thungetna mun pen nasepna mun, biakinn leh omna inn pan ahi zongin kingen thei hi. Thungen dingte khempeuh in Thungetna ding outline kibawlsa zui in kingen ding ahih manin a ngahkha nailo ten ZAM zumah hongla ciat un. Maikal sung thungen ding te anuai abangin kizomsuak ding hi. Tellohna a om leh kizopna ding ‘ 016 995 6231.

Zomi Idol leh Zolia & Zotaang kihel nuamte

Malaysia a om Zomi khangno te lapsangna dingin 2015 Khuado pawi hun sungah Zomi Idol leh Zolia & Zotaang kidemna kihel nuamte September 15 ciang sazian kipia thei lai hi.

ICMC makaihna tawh SGBV thusinna

September 10 ni 9:30am pan 5pm kikal sung Chines Assembly Hall ah kipawlna makaite ICMC pan Sex Gender Balance Violence (SGBV) thusinna hongpia uh hi. Hih thusinna sungah Innkuan sung kibuaisakna, numei pasal uukna tawh kibuai sakna, kisimmawhna leh Kibuanna te bang danin om thei cih thu hong hilh uh hi.
Deihloh penin atung a dan hamsatna leh buaina na tuak khak leh anuai a phone nambatte ah hopihpah in. ZAM Care Line 016 293 9027 ICMC Hotline 010 421 1274

UNHCR-EDU pan OpenEMIS sinna

10 September 2015 ni sun nai 1-5pm ciang Methodist College KL ah gambel sangnaupang te data ciaptehna OpenEMIS sinna kinei kik thei hi.

Tukaal sung ZAM palaai te buaipih diak teng

Damlo vai buaipih teng:

Man Sian Muang (Tonzang) Ampang zato ah, Dai Dim (Vangteh) Pudu ah, Neih Thang (Tungzang), No No (Singunau), Hrem Ti (Hakha), Renzing (Hakha), Thang Hen Kap (Lailo) leh Dim Deih Ciang (Tuimang) Pudu ah ki buaipih.

Kimatna pan tatkhiat theih teng:

Do Sian Sang (Mal Suangzang), Lam Khan Khai (Cikha), Kim Muan Tuang (Tuidil) leh Tual Sian Lon (Tuidil) te ki tankhia thei hi.

Buaipih laitak teng:

Thang Thawn Pau (Mauvom), Khual Khan Nang (Phaileng) leh Niang Lawh Vung (Khuadam) te ki buaipih laitak.

Embassy ah buaipihlai teng:

Zam Muan Khai (Tungzang), Dal Khan Sut (Tuithang), Zam Sian Khai (Tedim), Mung Suum Lal (Tungzang), Thang Sian Dong (Suangzang), Do Kim Sing (Suangzang), Langh Za Tuang (Laaitui), Dong Khan Khai (Phai) leh Cin Sian Kap (Suangzang) te ki buaipih laitak.

Zogam Salpha mi 9 te gaalna ding

Tu sungteng Zogam Lamka khuapi a thupiang buaina hangin anuntakna hong beisan Zogam Salpha 9 te gaalna ding apianuam ih om leh ZAM ah kipia thei hi.

Penglam khuithak (PK) kingah

Aleinuam peuhmah in ZAM, Klang Zosai, Aungnandaw I & II Taungzalat-Damansara leh Kepong Shewpyitit ah ki leithei hi.

Lungdamkohna

• ⦁ Zomi Catholic Community Malaysia (ZCCM) in Thupuak bawlna ding RM100 hong pia ahih manin ki lungdam mahmah hi.
• ⦁ Tuilangh Khua Kipawlna in Thupuak bawlna ding RM50 hong pia ahih manin ki lungdam mahmah hi.
• ⦁ Aung Nan Daw (Zomi sai) te innkuan in ZAM Thupuak adingin RM300 hong pia ahih manin ki lungdam mahmah hi.
• ⦁ Pau Cin Pian (Kapteel) in ZAM palaite nek le dawn leina ding RM20 hong pia ahih manin ki lungdam mahmah hi.