Makai leh Hehna ~ Lian Muan Kim

Makai leh Hehna ~ Lian Muan Kim

Leitung ah mi lungduai mahmah pawlkhat a om sam hangin a heh thei ngiatlo khat beek om lo ding hi. Banghang hiam cih leh mihing khata i pian nak leh i hihna khat leh i neih loh a phamawh khat ahih hang hi.

Mikim in i neih khat ahih hangin kikihta mahmah vetse hi. Innkuan sung ahi-a, pawlpi sung ahi zongin mikhat peuhpeuh hong heh ciangin nuam hetlo hi. A diakdiak in innkuan sungah Pa pen ahi zongin sang sungah Siapipa ahi zongin hong heh teh i om danding leh i ngat nading nangawn kithei lo mai hi. A maitai mahmah khat hong heh leh maimial pah a, a mel hoih mahmah khat hongheh leh hoih nawnlo pah hi. A ngaihbaang mahmah khat zong paihphat phial hi.

Khatvei limsuaih siam mahmah a minthang Leonado da Vinci in Topa Nitak Annkuang Umna tawh kisai lim hong suai hi. Tawlkhat khit ciangin a limsuaih hong zo dekta-a Topa Zeisu maitang ding leh Zudah Siakazoh maitang ding bek hong kisam lai hi. A sawt simsim ciangin Topa Zeisu maitang ding suaikhin napi Zudah maitang ding mu zo mahmah lo hi. Kumte hong bei toto taleh a suai thei mahmah kei hi. Nikhat khuanawl lam ahi mizawngte veng ah hong vak leh mikhat a heh mahmah banah a lungkham tuak mahmah a om mukha hi.

Thakhat thu in: Zudah maitang dingin hoih tangei ei, ci-in hong suai pah hi. Limsuaih aman ciangin tua mi heh mahmah pa kiangah: Lawm, nang kua na hia, acih leh tua pa in: Nang kei hong thei nawnlo maw, nidang in Topa Zeisu maitang dingin ka maitang nong suai ve, ci-in dawng hi. I heh leh i heh loh i mai puak kilamdang mahmah cih kilang hi.

Pasian Minthan na ding Ahi lo Hehna in Lungkhamna Behlap a, Khatvei i het leh Nihvei kisum hi.

I mai puak kilamdang banah hehna in hong teekbaih sak leh hong sibaih sak hi. I heh ciangin i mai thagui tampi kitat a, a dangten zong na naksep mahmah uh ahih manin i mai hamsuah baih a, i mel zong hoihsak lo hi. Maitai in nui leng i mai thagui tawmbek in nasem ahih manin cidamna leh maitai melhoih tuamna zong piangsak hi. Tua ban-ah, i heh ciangin i gilpi sungah Acid tampi kisuuk khia ahih manin gilpi nat zong kingah baih hi.

Hih bangin, hehna ahoih hetloh lam thei napi piangthak makai leh hehna cih thu gengen zel ihi hiam. Hehna icih in bang hi-a banghang in a hun tawh kituak a makai pa a heh nading kihan thawn ihi hiam. Banghang in hehkul sese hiam cih a nuai ah ensuk ding hi hang.

Hehna icih in bang hiam

Hehna icih in thukhat peuhpeuh hanga lungsona, thangpaihna, nuamlohna, lungkimlohna, lungtailohna cihte ahi hi. Pasian in mihingte Ama lim le mel sun a, hong bawl ahih mah bangin Ama hihna tampi sung pan pawlkhat i neih pih hi. Tuate lak pan Hehna zong kihel a, iheh ciangin Pasian in Ama lim le melsun a hong bawl ahih lam kilang semsem hi.

Pawlkhatte in Pasian pen itna Pasian ahih manin heh kholken teh cithei uh hi. Ahih hangin Laisiangtho i-et ciangin Pasian hehna a kigenna Laisiangtho mun pen Pasian itna le hehpihna a kigenna Laisiangtho mun sangin tam zaw hi. Tam lua ahih manin Laisiangtho pen Pasian hehna bu hi ciphial leng zong khialh luat om khollo ding hi. Bang hang hiam cih leh Piancilna pan Kilaakna ciang dong Pasian hehna tawh kidim in Zeisu phulakna tawh Laisiangtho kikhum lailai hi.

Thuciam Lui sung en le hang kuamah deidan peuhmahlo in mawhna hai a dim peuhpeuh ciangin Pasian in Amite ahi zongin, Amah theilote ahi zongin na zanga thu na khen lianlian hi. Tua ahih manin pawlkhatte in Thuciam Lui Pasian pen sisan duh Pasian hi-a Thuciam Thak Pasian pen itna Pasian hi, ci uh hi. A dangdang zong en tase kei lehang nisim a i tuah khak i cinat pakna, i lutang nat ngeungau nate, i damloh pakpak nate, a haksa i thuak khempeuhte pen i mawhna hanga Pasian hehna hi gige hi. Pasian zong nak hehngel sa ing. I gil khawng a nat ciang hi taleh i lutang khawng a nat ciang naknat taktak hi ven.

A heh theilo Makai pen A heh hun ding A theilo hi zaw a, Makai picing, Makai siam

Zeisu Khazih in zong: A hehna tawh a maute en hi, ci-in i muthei hi (Maku 9:5). Jerusalem Biakinn pi kininsak a, guta buluhte’ bukna suaksak khin uh ahih manin hehna tawh Zeisu kitom hi. Sumbawlna khempeuh zong sukgawp sak hi (Mate 21:13).

Makai hoihpen Zeisu etteh ihih mah bangin Amah bang hunteh heha, bang hunteh hehlo cih i theih ding kisam hi. Heh theilo dingin nungzuite zolzol thapai ding cih hilo-a, iheh hun ding zong theih huai mahmah hi. A heh theilo makai pen a heh hunding a theilo hi zaw a, makai picing makai siam kici ngeilo ding hi.

Sabeel phit ding i deih kei leh a vang i hukcip sangin a beel khingsak zaw 

Heh Dan Nam Tuamtuam

Leitung ah mi nam tuamtuam, kam pau tuamtuam leh lungsim puak gamtat zia tuamtuam a om mah bangin heh dan zong a tuamtuam om a, makai khat le khat ih heh dan zong kibang lo hi.

A nungzuite Khat vei A thehthang Makai in Nih vei A kaihkhop kik Hangin Kaikhawm kik Zo nawnlo Ding hi.

Bom tawh kibang Hehna

Bom tang tawh kibang a, a nip ngei lo; tawm khat kisukhial kha leh a puakkham lian ding makai pawlkhat om thei hi. Inn pan a hehsa-a hong pai hita kei leh a hehsa a bang den keei zong pawlkhat om a, maitai suah zawzen na pi a puakkham ziauziau thei zong om hi. Gul gunei banga ka mei hong sikkha ve, hong tu pah ding hi veng, ci-a a mei a tahtah zong om a, keksa a om den pawlkhat zong om thei hi. Hi bang hehna pen Laisiangtho tawh kituak lo ahih lam piangthak makai khat in a theih ding kisam hi.

A zenzen in makai pa pen a tuaci mi ahih leh Khasiangtho mah kimakaih sak a, nisim in lungduai a kisin ding kisam hi. Hehna khat peuhpeuh hanga a puakkham thei makai in nungzui teng thehthang mang leh a kaihkhop kik ding haksa ding hi. A kaihkhop kik zawh phial le zong kiim taka a kaihkhop zawh nang baih lo dinga, a liambang peuh a, a kaihkhop kik zong om ding hi.

Tua ban ah, nungzuite lak ah zong hi bang nam a om leh makai pa in tuate pen a nip theithei tawh tun a, a kisukkhak loh theihtheih na ding mun ah a koih ding kisam hi. Deih loh pen in a puahkhap le zong a kim a pam ah na tam a nawngkai lo dingin a gelkholh theih ding thupi hi. Ahi zongin puakkham thei ahih teh, ci in hepkhiat ding leh paihmang ding hi tuan lo hi. Bom a kizat na ding mun ah zang thei leng gualzawhna tampi kingah hi. Sing-ehna ding leh singsuih na dingin hei a tuamtuak a om mah bangin mite zong i kizat theihna tuam ciat om hi. Amunmun ah kizangthei le hang gualzawhna bucing kingah hi.

Sabeel tawh kibang Hehna

Makai pawlkhatte pen heh thei khol kei le uh kilawm hi. Kiphinphin kitoto ta le zong om hithiat uh a, thuk pak hetlo uh hi. Nui niknek zawzen in heh sawm khol lo uh hi leh kilawm hi. Ahi zongin tua bangte pen sabeel tawh a kibang na hi thei uh hi. Damdam in kikholkhol a, a sawtna ciangin hong phitkhia thei hi. A kikhol teng tam lua ta, kigak lua ta ahih manin hong phukhia hi a, a sunga huih teng a bei dong phitkhia hi. Tua bangte pen bang mah in dal zolo hi. Kidal teitei leh a beel tuan gawp in kim le pama na teng a suksiat banah lauhuai zawsop hi. Tua banga a phit khit ciangin tawl khat hong daikik a, a phitkhiatkik hun ding ngak gige hi.

Makai khat pen sabeel tawh kibang thei ahih manin amah le amah sabeel tawh a kibat lam a kitheih ding thupi hi. Tua hi leh a phit hun ciangin mi om lohna ah paikhia in phitkhia thei ding hi. Ahi zongin, ni tum ma in na hehna damsak in (Eph 4:26), acih mah bangin makai khat in a hehna a kepkep ding leh a kholkhol ding hilo hi.

Lamet loh pi in nungzuite lak ah zong tua banga sabeel tawh kibang a om khak leh makai pa in a cin siam ding thupi hi. A phitkhiat ma in a hehnate a vensak zawh na ding kisam a, a zenzen in a hehnate a vensak zawh man kei a le lah a phitkhiat sak lel ding kisam hi. Kiphitkhia sak kei leh siahuai zaw thei ding ahih manin a khahkhong lel ding kisam hi. Ahi zongin a kim a pama om khat peuhpeuh makai pa in a kepsiam thei ding thupi hi. Tua ban ah, a phit khit ciangin thudam tawh hoihtak in genpih a, a phitkik ma in a khinsak zawh ding kisam hi.

Buanmaan tawh kibang Hehna

Buanmaan tawh kibang hehna a neite in a hehna uh kilang khiasak ngeilo uh hi. A heh uh hangin puakkham, phitkhia cih bang om lo a, a heh lam nangawn uh kithei zolo phial hi. Kithehthang khia lo a, a hehna khempeuh uh kikhol in thaam suak thei hi. A lungsim sung uah na a sak mahmah uh hangin genkhia ngei khol lo uh hi. Gumthuak uh ahih manin lutang natna leh ngap lohna tuamtuam in piang thei hi. A hehna uh hangin kua mah nawngkai sak lo uh a, kua mah zong sukha selo uh hi. Gamhtat in na teng susia mang cih bang zong om lo a, mi khasiat na dingin zong gamta kampau se lo uh hi. Ahi zongin a mau heh lam a thei khia kha khatpeuh na om leh kikholhna leh kilawmtaknate nuam lo sak thei hi.

Buanmaan sungah Na thaam suak Nop kei leh A gei ah Nehneh se ken la, Paisan vingveng Lel in.

Hih hehna nam a nei kha peuhmah pen nuak thei uh ahih manin genhak mahmah hi. A hehna uh le a khasiatna uh kithei khol lo a, na pum nuak mikmek thei uh hi. Makai kim lai mi nung peuh ah na bu thei uh a, nungzui kim lai zong na kilehkik sim thei uh hi.

Hih hehna a nei thei makai khat pen a kilang khia a, a gamtat loh hangin mipite in thei veve uh ahih manin a kikholhkhopna uah nuam a sak zah ding un nuam sa zolo thei uh hi. A sia tampi a bawl khol loh zah khat in a pha zong bawllo hi. A genkhiat hetloh hangin a lungsim sungah pua veve ahih manin hi hehna pen Pasian deihna tawh kituak hehna nam hilo hi. Lungsim sungah teengden ahih manin Pasian le mite tawh kizopna na ngawn nawngkai sak thei hi.

Thu hoih tangko Ding sangin Thusia tangko ding Baih kisa zaw a, Kua mah cial Kullo hi.

Tua ahih manin makai khat a dingin hih hehna nam peuhmah kidop huai phadiak a, nungzuite lak ah hi bang hehna a nei kha a om leh makai pa in a theihsiam ding kisam hi. Amah le amah a kineusekte in hi bang hehna nam nei thei deuh uh ahih manin hanthotna kisam ahih lam uh theih siam ding zong thupi hi.

Long tawh kibang Hehna

Hih hehna nam a neite a heh uh ciangin munkhat bek ah om hithiat lo uh a, mun ci teng ah pai kawikawi in a hehna thu uh tangko kawi kawi uh hi. A kim le pam ua om peuhpeuh kiangah a hehna thu uh sutsut in khawl thei lo uh hi. Kua mah om kei le lah amau kia paupau in, kitomgawp sam lo napi uh, mi khatpeuh om kha leh a gen nop uh bei lo thei hi. Mun tampha semsem, a hehna thu uh kizel semsem, nawh pai semsem, nawh gin in ginngaih semsem hi.

Mi dang khat peuh ih tuahsiatna tungtawn in zong a hehna uh pulaak khia thei uh hi. Tua lai a, hong tua cih vial…tun a tua ci ve le…kici thei hi. Pawlkhatte leuleu in lah milak ah a hehna uh hem gengen thei uh a, a kilang khollo in zong pulaak zeuhzeuh thei uh hi.

Thusia in mual kua khum, ci in paunak i nei hi. Thu hoih khat peuh gengen ding sangin thusia khat peuh leh i lungkim lohna khat peuhpeuh i gen nuam zaw a, gennop zong i sa zaw thei hi. Hehna teng bek zong hi nawn lo in, a hehhuai theithei dingin ki-uanggen a, kibehlap thei lai hi.

Tua hi in, makai khat a dingin hih hehna nam peuh mah neih loh ding thupi hi. Hih bang hehna nam nei a, Khasiangtho huhna tawh a kikem cing zolo peuhmah bel makai hoih suak ngeilo ding hi. Nungzuite lak ah zong a tua ci khat le nih om hamtang den ding ahih manin makai pa in a zakkik ciangin hoih tak in a sansiam lel ding thupi hi.

Banghang in heh ding

Makai gina, makai hoihte in thumaan loh na hang ahi zongin, Pasian min daisak nate tung leh midangte a sim- mawh bawlte’ tungah heh uh hi. Pasian deihna tawh kituak a, heh theih nading thu hong kipia ahih leh makai khat in bang thute hangin heh ding ahi hiam!

• Mawhna hang in heh ding (Piancilna 3).
• Pasian tangin milim a kibiak leh heh ding (Paikhiatna 31)
• Pasian biakinnpi a kinitsak leh heh ding (Matt 21)
• Siatna tung ah heh ding (Late 97:10)
• Pasian gen bang uplohna hangin heh ding (Zawhang 11:33)
• Pasian leh Ama thu a kidaisak ciangin heh ding
• Thumaan lohna leh kisimmawhna hangin zong heh ding.

Bangci heh ding

Bangci bangin heh ding leh bangci bangin i hehna khal thei ding ihiam cih i theih ding kisam hi. I heh laitak mah in Pasian deihna tawh kituak a, i kikhal theih veve kul ding hi. A kisam ahih a leh Laisiangtho in: Na hehna hang un mawh kei un. Na hehna uh nitum sak kei un, acih mah bangin i zuih ding kisam hi (Eph 4:26). Hih sawlnate pen Pawlu laikhak bu 13 sung pan sawlna 390 a om lak ah kihel hi. Bangci bangin hehsiam thei ding ihi hiam cih leh:

• 1. Pasian minthang nading ahih leh heh ding
• 2. Khasiangtho ki-uk saka Ama deihna banga gamta ding
• 3. Khazih limpua in nungta gamta ding
• 4. Kiniamkhiat in thumaan ding
• 5. I pumpi nate khat peuhpeuh kemcing ding, khal ding
• 6. Khazih bang lungsim nei ding

Hehna Siangtho in Mawhna Bawl ngeilo a, Pasian deihna Bangin Lampi maan Totpih zaw hi.

Mawsi in mualtung pan hong kumsuk ciangin bawnglim kibia ngei ngai a mu hi. A nungta Pasian, Egypt gam pan a, a paikhiatpih Pasian pen a mite’n phawk nawnlo uh ahih manin Mawsi hong heh mahmah hi. Hih pen hehna maan mahmah ahih hangin tua hehna hangin Mawsi in Thukhaam 10 lei-ah a dentap pen hehna hanga piang a hoihlo nasep khat ahi hi. Thukhaam 10 dentap ding hizawlo a, a kibia bawnglim dentap ding hizaw hi. Pasian min a kidaisak ciangin heh ding mah hi a, ahi zongin a hoihlo na i sep khak hetloh ding thupi mahmah hi.

Hehna hanga Phattuamna Pawlkhat

Martin Luther in: Ka heh a suah mateng na gina, na hoih sem thei keng, ci ngei hi. Pasian deihna tawh kituak a, a heh ngeilo makai pen zuih taaklo ding hi. A siangtho hehna in mawhna bawl ngeilo-a Pasian deihna bangin lampi maan totpih zaw hi.

Hehna i neih theih pen Pasian lim le mel sutna khat hi a, hamphat na khat hi. Henna in hong khanglo sak a, a ni danga i kidop loh leh i phawkkhak hetloh pawlkhat hong phawk sak in kidawm tak in hong gamta sak hi. Ahoih lam in hong thangpai sak thei a, hanciam nopna hong neisak thei hi. Tupna kician leh tupna thupi hong nei sak thei hi. Ka tupna ka tun ma teng cih lungsim hong nei sak ahih manin lungkiat huai hun in zong hong lungkia sak lo hi. Hehna in hong hangsak a, ei le ei hehpih huai kisak tawmna bei sak hi. Sem zo kei ning e, i cih pawlkhat hong sem zo sak a, i gelngam loh pawlkhat zong hong gelngam sak hi. Tua ahih manin hehna siangtho nei thei a, Pasian minthan na ding mah in a hoih lama zat theih tawntung ding thupi hi. Lian Muan Kim

Endnotes

1) Leonardo da Vinci pen April 15, 1452 in suaka, Italy mi khutsiam, music siam, ganan tuat siam, engineer, nate thu a thei mahmah leh limsuaih a siam mahmah khat ahi hi. Tulai tak nangawn a, piangthak tampitak in i neih Topa Nitak Annkuang Umna pen ama suaih ahi hi. Kum 3 leh a lang sung a suaih khit ciangin sabuai tunga hai pen hoih lua mahmah a, tua sabuai tawh kilawn salo ahih manin tua hai bekbek kha 3 sung suaipha hi. May 2, 1519 in si hi.

2) Martin Luther pen Eisleben khua ah November 10, 1483 in suaka, unau 7 lak ah a upa pen ahi hi. 1501 kum in Erfurt University ah sangkah a 1505 kum in phungzi suak hi. 1512 kum ciangin Doctor of Theology ngaha 1525 kumin Katherine von Bora tawh kiteng uh hi. Ama hunlai-a pawlpi maanlohna thu 95 gelhkhia in October 31, 1517 sun 12:00 in Germany gam a Wittenberg Biakinn kongpi ah suang hi. Tua zawh a sawtlo in RC pawlpi nasia takin hong kitam a, biakna tuamtuamte hong piangkhia hi. Amah pen mipil miciim khat hi-a, lai lam zong va mahmah in Laisiangtho tei leh music zong kiva mahmah hi. February 18, 1546 ni-in a suahna khua mah ah si hi. Tuni ciang dong German makai hoih pen phial leh Christian makai hoihpen khat in kiciamteh hi.