Tedim Nai-ngan-yee (Tedim Politics)

Tedim Nai-ngan-yee (Tedim Politics)

1948 kum January kha ni 4 ni zingsang nai 4:20 li’an, Kawlgam in Mangkang kumpi tungpan suahtakna ih ngah khit aa kipan ih Khamtung gamah Nai-ngan-yee (Politics) cih ih theihlo seploh hong phamawh hi. Nai-nga-yee ih sep ciangin, Nai-nga-yee kipawlna (Political party) zong ih phuat, ih neiloh hong phamawh leuleu hi. 1948 kum in, Pu Thang Kho Kai (Muizawl), Pu Song Theu (Kaptel) Pu Thang Za Kai (Tuithang) Pu Langh Khaw Thang (Tedim, Myoma veeng) Te in Khamtung Suahta Vaihawm Pawl (KSVP) hong phuan aa, alang ah, Pu Vungh Za Kham (Thangzang or Tonzang) Pu Hau Za Lian (Suangzang) Pu Thuah Langh (Tualzang) te in Thu Hoih Vaihawm Pawl (THVP) cih hong phuan leuleu uhhi. KSVP pen nautang lamte kipawlna hi aa, THVP pen ukpi te leh asaang asuai te kipawlna hizaw deuh hi. Nautang leh ukpi te kidemna hong suak hi. Beh leh phung tawh kipai hi. (Gtn: Dr. Suan Za Dong in nidang in, Pa Vum Tual Kansauzang Tedim a paiteh ko inn ah hong tung aa, “Tu tung kitel bel, ko maalkuawl in THVP mee pia in ci’n ke’n bel ka behpa Capt. Mang Tung Nung KSVP pia ning ci’ cihi.)

1948 Kum in, Chin Peoples’ Freedom league kiphuan aa Capt. Mang Tung Nung in makaih hi. 1957 kum in Chin National Union leh Chin Peoples’ League kigawmin Chin Nation Organization kiphut hi. (Excerpt, 56th Aniversary Zomi National Day, Florida, U.S.A. speaker Taang Go Sawm Khup) Kei theihna ah CNO pen 1957 maa, 1956 kitelpi maa hizaw in ka um ing. THVP pen 1956 kitel maa in, Pha-sa-ba-lah tawh ki zom in, 1956 kitel pi ah kuanglui hi. (Pa Thang Khan blacksmith laphuah: 1956 kum ukpi minsel Pha-sa ba-lah hakkol nam kua hong bawl khia aa, “ azom cian nawn keng, a thei ding aa ka-up mawh U.S ah uu Kim San leh uu Ciang Hau om” A sak kik pen: Tua hakkol nam kua te, tua hakkol nam kua te bang sik hiding ki thei nailo a gik bel sik hilai ding hi.) Beh le Phung vai khauhpai semsem a, nupa kal, ulehnau kal, sunghlehpu kal nangawnah Nai-ngan-yee hang in kimai nopmawhna tampi hong piang hi. MP meekuang lui atamzaw, laitan sang nei omlo hi. Laitan nei, pilna nei te zong ih gam maakai ding in a kisap lam mipi in a theilo tawh kibang hi.

1958 kum pawl-in, Pha-sa-ba-lah phelnih inkitam aa, U Nu government pen kimuanglo na (No-confidence) lai ki tin hi. 1958 kum Sept 26 ni-in, U Nu in Kawlgam ki-ukna General Ne Win tung ap hi. Gam kem/cing kumpi ki-ukna, Caretaker Government ki ci hi. Caretaker Government in 1960 kitel ciang dong gam hong kem hi.

1960 kum kitel ciangin, Parliament Pyi-tu Hlo-daw mun dingin, Ti-hme Pha-sa-ba-lah pan, Dr. R. Vung Swan M.B.B.S. ; Independent party pan, S.T Hau Go M.A, M.R.E. ; Tan-shin Pha-sa-ba-lah pan, U A,.Lun Pum B.A. leh CNO pan, Capt. Mang Tung Nung Kawllai tan 4, te’n Mee kuanglui uh aa, Capt. Mang Tung Nung in zo hi. Tua kum kitel lai-in, ei Tedim township pan MP telcing te lak-ah, Pu Son Cin Lian bek Sr. I.A. ciang kah ngei hi. (Pu Son Cin Lian pen KSVP phuan Pu Langh Khaw Thang tapa hi) 1960 kum ciangciang mipi in ih gam maakai ding laitan nei a thupi lam kiphawk nailo hi. A meetang zuak nangawn ki om mawk hi. Kuanglui ding meetang lei nuam om ahih man’ in aa meetang kizuak hi a, tua in corruption hi.

1962 kum March kha ni 2 ni, zingsang 8:50 hun in Kawlgam thuneih na aa laksaklam (Coup d’etat) General Ne Win in Radio pan taangko hi. Prime Minister U Nu, Minister 5 leh chief justice te man hi. Shan leh Karenni Chief 30 zong matbeh hi. A zing ciangin, parliament khawmpi phiat in, constitution zong zangh nawnlo hi. Gen. Ne Win in Fourth Burma Rifles pan amaami teng tawh Lumlet Kumpi (Revolutionary Council) hong phuan hi.(The River of Lost Footsteps Histories of Burma, Thant Myint-U)

Chin Special Division uk ding in, Maj. Son Khaw Lian maakai in, galkap Bo lui 4 tawh Chin U- Sii aphuaih ci in hong uksak hi. Tua hun in mipi thuneihna om vetlo a hih man in, mipi te nidang hun lai aa kitelhkhialhna teng na’ngawn aa maa hongdam zo phial hi. 1972 – 74 ciang Col. Khen Za Moong Chiaman sem in, Chin Special Division Security and Administration Committee in hong uk hi. Constitution thak ki-at hi. Myanma Socialist Lansin Party bek political party om hi.

1974 kum ciang gam uk ding Pyi-tuh kongsil a-sensen (Peoples’ Council all levels Functionaries) mee khiat kitelna ki nei hi. Kum sawm val bang mee kikhia ngeilo, tu’n mee khiat hong om kik ciangin, Zomi te ih ngei mah in ihngei kik hi. Mono party bek hi aa, political party dang kiphuan theilo ahih manin, tua party sung mah ah “A” leh “B” in ih kikhen zawzen hi. Ni dang bang in beh leh phung ban ah, biakna zong hong lut lailai hi. Mipi in mee ihkhiat pong mawk hang, a candidate te Party Unit pan a kiseh hi aa, mee kuang avom sungah kikhia taleh meekuang akaang sungah na kisung lel aa, zolo cih om ngeilo hi. Agualzo te in aguallel te ki gawisuk pah aa, kumpi nasemte khuadang ah transfer sak, mawhna zong thoh khiat ding dong kihanciam pah hi. Khuakhat bang ah, apawl agual te gum nuam lua kisa in, Party Unit Chairman pa in, “curfew” bang thoh zawzen hi. {Kawlgam constitution sungah Nai-ngan-daw Tamahdah (President of the Socialist Republic of Burma) longal, kuamah in “Curfew” thoh theilo ding} ci-in ki at hi.

Sia Kam Khaw Thang in, ih Tedim Nai-ngan- yee pen, “en ih gualzawh leh ih langlam te tuancil dikdek ding in, en ih lelh leh amau zong hong tuancil kik dikdek dingin, ih thuakzawh kei leh lal ding himawk ai ve” ci’n nui khutkhut in gen thei hi. (Sadism)

Galkap lui khat in “Ko galkap pension kahih nak uh leh, santhum (Stg) tungsiah in Myone kongsil (Township Peoples’ Council) ciang lam-et pah, sannih (Cpl) nuaisian ka hi uhleh, Hausa, Upa ciang a ngim pah ka hi uhhi” ci hi. Laitan, pilna kisamlo cihna ahihi. A kitel hilo kiseh cihna hi. (Not elected, appointed)

Myonee kongsil wan, khatin, thu maan’ gen mahmah aa, “Ko kongsil wan te sia, khuisa (Bawngsa) tawi khat khawng hong ki puak pohle puk vanek thong kihui” ci hi. Golhguk ki nelua acih na hi. (Corruption)

1988 kum in Kawlgam milip in, kumpi tung lungpho-na kinei aa, Myanma Socialist Lansin party leh Pyi-thu- kondsil hong bei in, galkap te in, State Law and Order Restoration Council ci’n thuneina hong la leuleu hi.
1990 kum in multi-party kitelna om aa, National League for Democracy (NLD) in zogawp aa, a hizong Galkap Kumpi in thu neihna a piak sangsek a maakai tampi matsak zaw sop hi. Mipi cihnang kitheilo leuleu hi.

Galkap kumpi in gamki-ukna thak khat hong bawl leuleu aa, galkap te in Hlotdaw (Parliament) ah 25% telloppi tutna lak ding hi aa, galkap te in, mipi thuneihna sehli suah sehkhat (1/4) hong sut hi cihna ahihi.

Galkap ukna kum 20 khitciang 2010 kum multi-party kitelna kibawl aa, Galkap Kumpi party ahi USDP party in, gualzo in, gam-uk kumpi hongsem uhhi. Mipi in Galkap Kumpi ki um nawnlo lua ahih man in, 2010 kum kitel zong a kithusim loh kal-in, Galkap Kumpi Democracy (Military so called Democracy) tawh kipaipai hong suak hi.

2015 kum kitel ding zong hong naita, Zomi te te’nna gam Tedim, Tonzang, Cikha ah zong mee kuang lui ding Nai-ngan-yee party 6 or 7 bang pha hi. Kitelna hong bang ci pai ding kua mahin gen kholh theilo. Tutung kitelna, a beisa kitelna te tawh a’ kibatlona khat ah, Meekuang luiding candidate zong numei 3 bang hong om hi. Party khat pepeuh ah Meekuang lui ding candidate ngah na dingin sum tampi tawh a lei or party maakai (Venal leader) te sum tampi tawh athoih zong omhi cih kamdawn (Rumor) peuh zong hong om hi. Tua kamdawm a’man’ takpi leh Coruption mah hong hi zelleng hi.

Tua ahih leh Zomi tutung kitel ciang na meetang nang’ kua pia ding. Parochial politician maw? Statesman maw? Tualsual candidate maw? Khual Candidate maw? Puppet Candidate maw? Meltheih tanau Candidate maw? Educated candidate maw? Corrupted Candidate maw?

Khupkhan Thang Taithul
5104 Ladbrook Street
Norman, OK 73072
U.S.A.
(405)409 0536.