UNHCR-CDU leh kipawlna makaite khasim kimuh khopna
Malaysia gamsung a om UNHCR-CDU makaihna tawh khasim kipawlna makaite tawh kimuh khopna February 5 ni zingsang nai 10:00 pan 12:00 ciang UNHCR Hall ah kinei thei hi. Senior Protection Officer Mr. Michael Wells leh aseppih nu leh RSC pan Ms. Langan hong kihel uh hi.
Senior Protection Officer : Mr. Michael Wells leh aseppih nu kiangpan Zuau (Fraud) nam tuamtuam
Mimal vai tawh zuau phuakna (Identity Fraud): Gambel or galtaai khat in ama mimal thu agen ciangin akhua, amin, a minam min leh asuah ni suah kha suah kum atuamtuam… cihte phuaktawm in bawltawm thei hi. Pawlkhat in asi khinsa te min leh thu peuh zangh thei uh hi.
Innkuan phazah vai tawh zuau phuakna (Family Composition): Gambel or galtaai khat in ama innkuan mi phazah agelh ciangin pawlkhat hello in, a om lopi khawng behlap cihdan in thumaanlo gen hi.
Ama vai thumaanlo gelhna lai (Document Fraud):A tangthu phuaktawm in a hitakpi banga lai tawh gelhin tungsiah ah piakna.
Material Misrepresentation Fraud:Hih pen galtaai or gambel mi khat in ama vai ding phuaktawm in a uang theithei in gen, thupiang khat zia kheel or ahilo deuh a genna pen Material Misrepresentation Fraud kici hi. Hih pen nam nih om hi:
Omission:Thumaan gen ding thei gegu napi a genlohna.
Commission:Zuau hi cih theih gegu a zuau khem teiteina.
Golhguuk (Bribery):UN vai ahoih ding deihna tawh galtaai or gambeel khat in sum ahi avan khat peuh or adang khat peuh ahizong tungsiahte tungah piakna pen bribery kici hi.
Malfeasance:pen UNHCR zumpi sunga nasemte or thuneite lam pan thanemna, golhguuk nam tuamtuam hanga deihsak tuam neihna leh gambel or galtaai te mailam ding khensat sakna or khialhna cihte hi.
UNHCR Malaysia in zuauthu (Fraud) a kancian
⦁ UNHCR in mi khat khit khat thudotna (Interview) abawl khit uh ciangin upadi thei thukhensiamte (Panel of Experts) khentat dingin a khutsung vuah thuteng ap uh hi.
⦁ Panel of Experts te in mimal dawnna teng na en pha uh a, zuauthu kihel maw kihello a etcian khit uh ciangin khentatna bawl uh hi.
⦁ Zuauthu a kihel leh Panel of Experts te in tua zuauthu genpa tungah bang gawtna pia ding cih thu kikum leuleu uh hi.
⦁ Hih gawtna pen zuauthu gente tangthu or vai (case) tawh ki zui-in a kipia ahihi.
Gawtna/khalna (Sanctions)
Gawtna/khalna namte
⦁ Warning pia masa phot or kidawm dingin thei kholsak masa phot uh hi.
⦁ (Suspension from resettlement) Bang tan hiam khat athu leh gam thumna vai ki nusia phot ding.
⦁ (Termination of resettlement) Gamthumna tung thei nawnlo dingin a thu ki khawlsak.
Kaikhawm a action lakna
Ngetna lai phahkikna leh thuhilhna
⦁ Panel of Experts te in gawtna piak ding tawh kisai khentatna a bawlkhit uh ciangin a mimal in amau Case tawh ki zui-in thuhilhna nei ding uh hi.
⦁ Gawtna angah peuhmah in athu uh vaansak kik dinga ngetna lai phah thei kik ciat uh hi.
⦁ Panel of Experts te in khentatna a bawl ni a kipan kaalnih sungin gawtna atuakte in ngetna lai phahkik thei uh hi. Kaalnih sung hun kipia cihna hi.
Anuai a teng na sim inla Zuauthu (Fraud) ahih leh hih lo gen in?
⦁ Gamthumna tun theihna ding tawh kisai thudotna (Interview) a kibawl laitak in deihsakna lung-gulhna tawh thudongpa (Interviewing officer) tungah galtaai or gambel mi khat in sum pia hileh tua pen Fraud ahi diam?
⦁ Nungak tangvalte in UN ah min ciaptehna leh gamthumna tun mengmeng ding utna tawh nupa (a kiteeng) kineih uh leh tua pen Fraud ahi diam?
⦁ UN ah ciaptehna angah khin khat in a tapa kum 20 valkhin khat pen a lutpih nop manin kum 18 cing nailo hi cileh tua pen Fraud ahi diam?
Nang bangci bangin huh in panpih thei ding na hiam?
⦁ Community or kipawlna makai khat na hih leh na member sung pan Zuauthu (Fraud) tawh UN min ciaptehna angah a om uh leh amaute kiangah UNHCR zumpi ah pai dingin hanthawn in.
⦁ Ahih theih leh tua bang mite UNHCR zumpi ah a ki pulak theihna dingin thapia in.
⦁ Zumpi ah direct in hong pai thei uh a, hong pai ngam kei uleh zong hih Email <[email protected]> ah thu leh la hong khak thei uh hi cih gen hamtang in.
UNHCR zum sunga nasemte a kilawmlo in a gamtat uh leh na lungkimlohna thu Direct in Inspector general’s Office (IGO) ah anuai a Address te tawh hong zasak in:
⦁ Email : <[email protected]>
⦁ Address : 94 rue de monibrilliant.
CP 2500, 1211. Geneva
⦁ Hotline : +41 22739 88 44
Ms. Langan : Resettlement Support Center (RSC)
⦁ Na vai bang ciang tung na theihnop a leh www.casi.rescue.org ah ki enthei a, na ID pen na MY nambat hipah ding a, na password pen amau hongpia ding uh hi. Password a ngah nailo te kingen thei hi. Ahih hang na tangthu omlo ding hi.
⦁ [email protected] dotnot/dawpnop na neih leh lai kikhak thei a Phone tawh 03-2141 5846 ah dotnop/dawpnop na neih leh kiho thei hi.
⦁ Zuauthu gen kha ing ci a na ki pulak nop leh <[email protected]> ah laikhak tawh ki pulak thei hi.
⦁ Zum panin na phone missed call aom leh hong sapna nambat mah samkik pahin la nangah kei a leh azing athai ah sam kik hamtang in.
⦁ Na ngah kei leh zong patauh luat ding hipah samlo hi RSC pan 3 veita hun kibanglo in samden hi.
Zomi Cup 2015 ah Tukpeng tawh ki lawmtatna nuamtak in kizo
Pasian hehpihna tawh Zomite leitung gam tuamtuam ah i om kawikawi hi. Hong bawlpa in deihna leh ngimna lianpi nei a hong koih hi cih upna bek hinawnlo in theihna lianpi hong om semsem hi. Gam tuamtuam ah i om pen khuaipite in pak tuamtuam pan pakzu tuamtuam dawn kawikawi in a bu ah a ciahpih ciangin khuaizu limpen a neih banga Zomite in leitung pilna leh hauhna, theihna tuamtuam tawh Zomi leh Zogam puah dinga Topa hong koih ahi hi. Ama minthanna ding leh Ama gam zaina dinga hong zang nuamin Zomite hong lamsang hi.
Tua khempeuh a tangzai semsemna dingin Singapore a om Zomite leh Malaysia ah om Zomite in Tukpeng tawh kilawmtatna hun nuamtak in ZOMI CUP 2015 phualpi Kuala Lumpur, Malaysia ah February 2, 2015 niin nuamtak in kinei thei hi. Hih hun ah ZIS leh ZAM in zingsang lam khatvei, nintak lamin khatvei Tukpeng suih kidemna kinei a, anih in Singapore Zomite in zo dektak tuak hi! Hih hun ah a kihel dingin Singapore pan Dr. Hau Za Cin, Pa Khup Khawm Mung, Dr. Chin Khan Lun Guite, Tg. Eric Suan Za Tuang, Tg. Luai Hming Thang, Tg. Pau Kim Sing, Tg. Pau Khua Mung, Tg. Hau Deih Mung, Tg. Lian Sawm Sing, Tg. Do Thawn Tuang, Tg. Pau Mun Khai, Tg. Dal Sian Kam, leh Lia Cing Sian Nem te January 31, 2015 nitak nai 9 in Bus tawh pai in KL zankim 1:30am in Zomi Innpi (ZAM Phualpi) kitung hi. Zankim pi himah leh lungduai takin Zomi Association of Malaysia ah President Sia Hau Suan Khai in maitai takin hong dawn siuseu a, ka tawl uh hong dam pah hathat hi. Ka lupna ding uh Sia Khoi Sian Tuang in na phah dimdiam a, tua ah nuamtakin k alum hithiat uh hi.
Zingsang khuavak ciangin tho in kiphiatsiang in ka khuadak uh leh kiallap ne dingin hong dawn Sia Kam Lian Mung tawh kongkhak ah ka kituak uh a, ama’n Malaysia ah om Zomi khempeuh hong zindona – moh, aktui leh niangtui lim mahmah gilvah takin hong nekpih phitphet in tua panin tukpeng suihna ding lam ka zuan uh hi. Malaysia khuapi Kuala Lumpur sunga meileng nuam mahmah tungah tuang dingin ka kithawi uh ciangin Sia Mung leh Sia Khoi Tuang makaih mah in ZAM te in ka paina ding khempeuh uh hong sik leuleu in nuamtak in Tukpeng Tualpi ka tung uh hi. Hih mun pen ZOMI CUP kipat masakna suihna mun hi a, tukum in zong ZOMI CUP suihna mun mah ahi kik hi.
Tualpi gei ka tun phei uh ciang… taivo taivo, hoih lua, siamlua, goalllll… cih bang awging ka galzak pah uh a, Zomi gim hong nam vangvang pah hi. Zopuan silh, Zonik teng kigalmuh in a phual ka tun uh ciang nungak tangval, nupi papi, numei naupangte amau khua ciat thapia in na awng ziahziah uh a, nupite bang a tate uh palpai dekdek in na diang zakzak uh hi. Zomite in tukpeng mah nuam kisa veve mawk hi ei guai, ka ci sim pah hi.
Zomi makaite in hong na dawn in ka dawn ding uh tui, ka hai ding uh kamkhai (chewing gum) leh moh cih bangin hong na pia pah uh a, ka lawp semsem uh hi. Zingsang nai 10am hi a, ZOMI CUP 2015 sungah a kihel Team 32 sung pan Team 16 a kahto ding a suih nunung ni penpen uh ahi hi. Team 4 in sui ziahziah lai ahih man in tua khua 4 te kisui ka en uh a, siam thei mahmah in nopci mahmah hi. “A kihta sim pian pah hi,” cih bang pian in koh zong ka upmawh sangin Zomite na ‘kisinzaw uh’ ei ka ci uh hi. Ahi zongin koh siamna zong ka musak nuam veve uh hi J. Amau suih khit ciangin Singapore Zomi leh Malaysia ah om Zomite ka kisui pah takpi uh a, inntekte in hong zo hi. Nitak lam ciangin ZOMI CUP 2014 champion Anglangh Khua te tawh ka suih leuleu uh leh amau hong zo leuleu a, “Tuni bel 2-0 tuak bek khumsak mai ni,” ka ci uh hi. Ka vekpi un mimal siamna kilak tek ni ciin penalty ka suih uh leh ka vekpi un ka khum uh hiJ.
Sun ann limtak hong nekpih khit uh ciangin Zomi Adventist Church ah ZAM leh ZIS makaite kimuh khopna leh tutkhopna ka nei uh a, Senior Pastor Rev. Dr. Cin Sian Pau in thungetna tawh hunte Topa tungah apna hong neihsak hi. Biakinn nuam in aircon sungah puanzanel kiphah tungah tu hithiat in ka holim uh a, nuam kasa mahmah uh hi. Tua ka holimna uh panin Zomite koi mun peuh ah i om zongin khut kilen a nasem khawm ding leh mapang khawm ding, kalsuan khawm a Zogam paallun sak ding hihang cih ka lunggulhna uh na kibang mahmah hi. Tua ahih manin:
1. Tukum Zomi Nam Ni zong Malaysia ah bawlkhawm kik in semkhawm ding hanga, Singapore pan a tam thei pen Zomi Nam Ni zangkhawm dingin Malaysia ah pai phei ding hi. Vai khempeuh ah Malaysia Zomite in inntek sem dinga, thu leh la, thusinna leh thusunna hunte ah ZIS leh ZAM in a kisam bangin mapang khawm ding hi.
2. April 23-26, 2015 sung Tedim khuapi a kibawl ding Zosuan Tuailai Khawmpi a 2veina zong mapang khawm a semkhawm dingin thukim takin ka gen khawm uh hi. Zosuan Tuailai Khawmpi (ZTK) ma sung nipi kal 2 sung in Tedim khuapi ah Manglai Sinna (English sinna) kibawl dinga, tua ah laihilh dingin India pan Manglai siam hong pai ding uh hi. Hih Manglai sinna pen kizom toto dinga mailam ah khua tuamtuam ah kizom toto ding hi.
3. Zosuan Tuailai Khawmpi ah Tukpeng kidemna om dingin kilunggulh a tua ah ZAM in ZOMI CUP INTERNATIONAL bawlsak dinga, medal tawh thuah in vaihawmsak ding cih hong pulak uh a, nakpi takin lungdamna khut kibeng ziahziah hi.
4. A kisam banga khut kilen toto ding leh semkhawm dingin lunggulhna khempeuh Topa tungah ap in hunte ka hial bawl uh hi.
Tua banga hun nuam ka zat khit, ZOMI CUP 2014 Champion Anlangh Khua tawh ka suih khit uh ciangin nitak ann limtak nekhawm kik in, tua pan in Singapore lam zuanin ka ciahkik uh a, cidam takin Topa in inn hong tungsak hi. Topa min phat in om hen.
Lungdamna: Ka tun uh pan ka ciah dong uh hong dawn, hong kha, nek leh dawn khempeuh hong sik ZAM makaite tungah Zomi Singapore a om khempeuh tangin lungdam thu kong puak hi. ZAM makaite in hong vaidawn pen Zomi Malaysia ah om khempeuh hong vaidawn, hong zindo na hih manun Zomi khempeuh tungah nakpi taka ka lungdamna uh kong pulak uh hi. Topa in a nuamzaw hunte ah hong lamsang in Zomi leh Zogam paallunsakte hi ciat dingin thupha namkim hong piata hen.
Zomi hih mah nuam ngaungau ei. Hau Za Cin, Phuitong Liim
Tukal Palaai te buaipih diak teng
⦁ Kham Lian Mung (Gamngai), HUKM zato ah 26 January ni-in ki buaipih.
⦁ Vungh Suan Mang (Kapteel) 27-28 January ni-in Ampang zato ah ki buaipih in kiveh.
⦁ Cing Za Dim (Thalmual) Ampang zato ah 28 January ni-in ki buaipih.
⦁ Ning Ngaih Zen (Thalmual), GHKL zato ah 29 January ni-in ki buaipih.
⦁ Kham Lian Mung (Gamngai) IAD ah 30 January ni-in ki buaipih.
⦁ Cing Khan Nem (Taakkhawl) 30 January ni-in IAD ah ki buaipih.
⦁ Pau Lam Sing (Tauleng) 30 January in Klang zato ah ki buaipih.
⦁ Cing Don Kim (Zozaang) 2 February ni-in KL Station palikte khutsung pan ki suakta sakthei.
⦁ Petru Lang Khan Kham (Pyidawtha), Tul Khai (Dimlo), Cin Pi (Dimlo), Kap Lian (Dimlo) 3 February ni-in Sea Park palik zumah ki manin a ki buaipih laitak.
⦁ Kham Deih Pau (Kapteel) 4 February in Sungai Buloh thongah kiveh.
⦁ UNHCR-OPI ah kiman mimal 7 ki report sak thei.
Zomi vai thu genna om ding
Hong tung ding February 9 ni ciangin Kawlgam pan hong zin ahi Pu Gin Kam Lian (ZCD Secretary) & Dr. Do Suan Mung (GZA Secretary) te tung panin Zomi vai thungenna nasia tak omding ahih manin Khua makaite, Pawlpi makai siate leh Malaysia a om Zomi a lunglut khempeuh nong ki helkim zawh- na ding un deihsakna lianpi tawh kong zawn uhhi.
Amun : ZAM Hall
Ani : 09 February 2015
Ahun : 11pm-3pm
Sunan : 11-12pm
Zomi Nam Ni bawlna ding mapan khopna apiasa teng
Khua kipawlna pan:
Anlangh 200
Bapi 100
Chantagyi 100
Cikha 100
Darkhai 100
Dimlo 100
Dimpi 100
Kapteel 200
Laibung 100
Lailo 350
Langzang 100
Lunmual 100
Luangel 100
Mualbeem 200
Muallum 100
Mualnuam 100
Ngalbual 100
Ngalzang 100
Pangsak 100
Pangzang 100
Phaiza 200
Phunom 100
Singgial 100
Singunau 100
Suanghoih 200
Thangsan 100
Tualzang 100
Tungtuang 100
Tuikhiang 100
Tuimang 100
Tuimui 100
Tungzang 200
Tuipi 200
Tuitawh 100
Tuizang 100
Vongmual 100
Zampi 100
Biakna pawlpi pan:
Malaysia Laipian Pasian Pawlpi (MLPP) 200
Christ Mission Fellowship (CMF) 200
Manna Zomi Christian Church (MZCC) 200
Zion UPC (ZUPC) 200
Zomi Adventist Church (ZAC) 200
Zomi Ebenezer Malaysia (ZEM) 200
Zomi Nam Ni laigelh kidemna kihel dingte theih ding
⦁ Zomi naupang kum 16 nuaisiah kihel thei ding
⦁ Thulu dingin “Zomi Nam Ni Thu”
⦁ Ani ding 13 February 2015
⦁ Amun ding ZAM Hall
⦁ Alunglutte kizopna ding Rev. Dr. Cin Sian Pau
(017 329 1810)
Thungetna hong neih sak
Kawlgam pan hongzin Pastor Ngai Khan Man (Miracle Christian Center) February 3 ni zumpi ah hong hawhin thu hong ngetsak ahih manin ki lungdam mahmah hi.
Lungdamkohna
⦁ Zion UPC pawlpi in tukal Thupuak ading RM50 hong pia ahih manin ki lungdam mahmah hi.
⦁ Gamsung gampua pan ZAM nasepna te tha na piak nopleh lungdamtak in hongkisang ding hi.
Photo leh List te aki cianzaw in PDF file tawhzong na simsak unmaw.
Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email: [email protected]
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website 
tungpan kongsuaksak zelzel uhhi.
Note :: PDF tawh na simnop leh
Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Comment piaknop aomleh...