Yangon EBC Biakinn vai zaksakna ~ Sia Gin Khen Mang

Yangon EBC Biakinn vai zaksakna ~ Sia Gin Khen Mang

Yangon EBC Biakinn, 26th Street, Pabedan Township tawh kisai kong zaksak nuam hi. Hih biakinn pen 2003 kum a kilei hi in, kum 15 bang nuamtak a ih kikhopna mun hi. Inn neipa in, hong lei kik nuam in, pawlpi in zuak sawm pak lo ih hih manin, thu kawi hong bawlbawl in tu a ciang a tung hi hang.

A beisa kha 10 sung bang Biakinn ah kikhawm loh ding, Pabedan Township Administration zum pan hong genna tawh kizui in, December nipi masa pan tu nidong kha sawm sung bang FBTS ah kikhawmna ki nei hi. FBTS ah kikhop theihna ding Siapipa Dr. Do Duan Mung in phaltakin zong zang sak a hih manin ki lungdam mahmah hi.

Kumpi lam Zum tuamtuam, Township, District, State level te ah zum kah in ki dawp kawikawi hi. Kumpi ulian lam te tawh zong kimuhpih theih om in, a hoih pen in hong vai hawmsak nung cih tawh ki ciah zel hi.

A hi zongin, October 2, 2018 ni ciangin, Yangon Region Govennment Zum panin Chief Minister taangin, Social Minister minthuhna tawh lai khat ki ngah hi.

Tua lai sungah tom genleng, “Khua sung aa apartment building ah biakin kikhopna kikhopna ki bawl theilo a hih manin, na ki khawm nawn kei un, biakinn ah kikhawm un” cih hong hi ziau hi.

Hih thu tawh kisai in ngimna sa zong pawl khat a ki neih teei hangin, vai kitello a hih manin, ngiim ciang bek hi pan hi. Tu in, kikhopna ding mu dang khat leitang tung a kilam inn khat mah vaihawm leng hoih ding a hih manin, kikupna vaihawmna le maikal suanna ding te Pasian makaihna kisam pha mahmah hi.

October 7, 2018 nipi kikhop khit ciangin zong pawlkpi meeting khat neih ding in ki vaihawm hi.

Tua ahih manin, mun tuamtuam a om, biakinn le pawlpi vai tawh kisai, thu hong nget pih te, hong dong in inhong kamkuppih te ngaihsutna hong piate tungah zong ki lungdam mahmah hi.

Biakinn mun ding, leitang khat mahmah zong ki vaihawmin, Pasian ih biakna ding inn khat mah lamin tua mun ah ki khawm leng, kuamah in hong nawng kai sak nawn lo ding hi.

Hih bang vaihawmna dingin, sanggamte na om na peuh uh panin, thungetna hong neih pih toto lai un, neihsa kician om lo a a hih manin, sum le paai zong huhna hong kingen nuam ding hi. Biakinn khat neih zawhna dingin pangkhawm ciat ding hi hang. IH BIAKINN DING HI.

Biakinn vai tawh kisai, Pasian tungah ih ap sa hi. Mihing lam pan sep ding kisam teng kisem khin a, hih bang hong pian’ pen Pasian deihna mah hi zaw ding a hih manin, lungkim tak in mai nawt ciat ding hi hang.

Vaihawmna le kikupna om bangbang hong update zel ning in, hong phawk khempeuh tungah lungdam hi. Sya Khenpi – Rev. Dr. Gin Khen Mang (Pastor), Evangelical Baptist Church, No. 18. 26th Street, Pabedan Township. Yangon. Myanmar