Yangon ah kumthak zanin zato atung mi 200 valpha, mi 4 si

Yangon ah kumthak zanin zato atung mi 200 valpha, mi 4 si

Myanmar, Yangon Region sungahzong kumthak kilimmuak mahmah a, buaina tuamtuam hangin aliamzong mi tampi om hi. Yangon General Hospital bekbek ahzong New Year zanin aliam mi 200 bang om a, asi zong mi 4 bang om cih 7Day Daily pan kiza hi.

2016 kumbei New Year zanin Yangon General Hospital ah liamna tuamtuam hangin Emergency atungpen mi 177 hi a, 2017 kumbei New Year zanin zato atungpen mi 200 phato hi. Abeisa kumsangin aliampen mi 23 tamzaw hi.

Yangon General Hospital panin Dr. Khin Tinggi Myint in agenkhiatna ah Emergency hongkipuak limlim akigawm in mi 451 pha uhhi. Tualak ah lungtang natna cihbang atuamtuam hangin hongtungpen mi 251 ahihi. Tualo adang mi 200 tepen liamna tuamtuam hangin hongkipuak uh ahihi.

Tua aliam mi 200 te lakah mi 4 tepen aliamna uhtawh zato atunkhit uhciangin si uhhi ci’n genkhia hi.

Abeisa 2016 kumbei New Year zaninzong Emergency ah akipuak misi 4 om ahih manin, 2016 leh 2017 kum asi pen ki lamdanna omlo cihi.

New Year zansim in zato ah, adiakdiak in Emergency ah cina hongkipuak pen nidangte sangin tamzawden ahih manin, tua New Year zanpen Hospital sungah nasemding in Doctors zong atamzaw akigingsa in kikoihden a, zatui zaha zong aki gingsa in ki omden hi ci’n Dr. Khin Tinggi Myint in genbeh hi.

More: Yangon ah sangnaupang Tan 9 akahlaitak abuanpa kum 23 thong kiadingin thukipia

Myanmar New Year ahi tuibuahpawi “Water Festival” cianginzong zumkhak hun, Public Holiday pen sawtdiak a, tuahunsung in Accident tuamtuam tawh aliamzong tamthei phadiak ahih manin, tuabang pawithupi te ahzong zato ah nasemding in Doctors pen atamzaw kikoihden hi ci’n genkhia hi. Philippines gamsung ahzong New Year muakna in losan “Firecrackers” ki naklotlua ahih manin, mi 191 takin liamlawh uh a, zato kipuak cih kiza hi. Sawltak #zomidaily