Mangpha! U Cicin (Rev. Dr. Thawng Khan Cin)
U Cicin, Sia Cicin, Rev. Dr. Thawng Khan Cin. Ka U Cicin thute ka gelhloh phamawh sese ei. Ka Nu tawh unau (Cousin) ahih hangin, ki-innkuan bawlin, ke’n U Cicin ci in sam ing. Zomi sung ah biakna lam pan a nasepna atangzai dan, gam leh minam vaite ah a mapanna a kicin dan, khua leh tui sung ah itna tawh a mipih sapihte avaanna cihte suut dingin panleng tam mahmah ding.
Tutung in, Zomi Innkuan Kipawlna sung ah a mapanna leh ka kithuahkhakna teng suut masa ning.
· ZIUSA Kipawlna a kiphuh zawh, Chicago khuapi a Dr. Dokham inn ah Thukhunpi Khawmpi bawl ding vai a omteh, Khawmpi kah dingin Sia Cicin ka zot aleh, Makai panmunlen ahihloh hangin, ama ipsung sawkin hong zui hi. Khawmpi ah amah hong kihel manin, ZIUSA Kipawlna Kivaipuakzia ding kikupna leh geelna ah thu leh la tampi hong kuppih a, kipicing mahmah hi.
· 2006 kum January kha sung in, Chicago khuapi a kibawl ZIUSA Khawmpi panin ZIUSA EC Kiteelna ah Sia Cicin pen Vice President panmunlen dingin kiteel hi.
· 2007 kum June kha sung in, Tulsa khuapi a kibawl ZIUSA Kumcin Khawmpi ah EC leh Board Kiteelna kibawl a, Sia Cicin pen Board Chairman panmun alen dingin kiteel hi.
· 2008 kum September kha sung in, Tulsa khuapi a kibawl ZIUSA Kumcin Khawmpi panin EC Kiteelna ah Sia Cicin pen EC Member panmun alen dingin kiteel hi.
· 2009 kum July kha sungin, Tulsa khuapi a kibawl ZIUSA Kumcin Khawmpi panin EC Kiteelna ah Sia Cicin pen Vice President panmun alen dingin kiteelkik hi.
· 2009 kum in Leitungbup Zomi Innkuan Kipawlna a kiphuhzawhna dingin hanciamnate ah Sia Cicin in thu leh la tampi sungin, kuppihna leh vaihawmpihna tampi hong neizo hi.
· 2010 kum October kha sung in, Tulsa khuapi ah ZIUSA Kipawlna innteekna tawh a kibawl, Cope Centennial Jubilee pawipi bawlna ding vaihawmna ah Makai panmunlen khatin pang hi.
· 2010 kum in Tedim khuapi a kibawl Cope Centennial Jubilee pawipi sung ah LZI Kipawlna panin Minamvai thukikupna bawl ding thusunna tawh kisai thu leh la vaihawmna, geelnate ah, Sia Cicin in akisam bangin thu hong sungin hong panpih hi.
· 2012 kum July kha sung in, Tulsa khuapi ah a kibawl Zomi Khawmpi USA pawipi bawlna ding vaihawmna ah innteek khuanu khuapa Makai khat leh ZIUSA Kipawlna makailui khat hihna tawh, Khawmpi zindona ding vaite a kipan, thu leh la vaihawmna khempeuh ah limtak ma pang zo hi.
· 2013 kum July kha sung in, Tulsa khuapi ah a kibawl, Zolai Kum 100 Pawi bawlna ding vaihawmna ah Makai khat hihna tawh ahi thei zahin ma hong panpih hi.
· 2014 kum sung a kibawl Myanmar Census ah ZIUSA Kipawlna in Zomi-te minam khat hihna tawh kipumkhat in Minam min khat khumkhop ding leh Minam min in Zomi a hihna kipsak ding vaihawmna ah Sia Cicin in Zomi taangpi taangtate tung ZIUSA Kipawlna tungtawn in hanthotna leh thapiakna limtak in hong neihpih hi.
· Sia Cicin in Tulsa khuapi a kibawl Zomi Khawmpi USA 2014 leh 2018 pawipite ah ZIUSA Kipawlna Makaite mapanna picing takin hong panpih tawntung hi.
· 2017~2018 kum sungin ZIUSA Kipawlna in Sia Cicin pen Advisor dingin kicial a, Kipawlna leh minam a itna tawh kician takin ma pang hi.
Atung a thute pen tuzing a ka phawkpak tengbek hi a, Zomi kipawlna vai khatpeuh tawh kisai keimah mimal tawh thu leh la ka kikupna leh thu ka dotna cihte kikhum zo nailo hi. Zomi Innkuan kipawlna sung ah a mapanna teng a gualzo pan hi ing. Hih maban teng ban-ah, Minam vai thukikupna tuamtuam, Khawmpi vai thukikupna tuamtuam ah ahun zui in thu leh la tampi hong hilhin hong pantah a, hong makaih tawntung hi.
More: ZCD Party MP Candidates teeldan thusunna ~ Go Sawm Khup
Tu-in, amah abawlpa Anungta Pasian in atawl dam dingin a leitung nuntakna hong laksakta hi. Zomi-te leh Zomi Innkuan kipawlnate in amah kimangngilhlo ding a, a mapannate leh a matutnate mangthang nawnlo ding hi. ZIUSA Kipawlna Makai panmunlen khat ka hihna tawh ka dah mahmah hangin, Sia Cicin, ka U Cicin kipiakkhiatna, gam leh minam, khua leh tui a itna, Zomi Innkuan kipawlna ading a sepna a bawlna teng khempeuh hangin, Zahtak lianpi ka pia a, itna leh ngaihna takpi tawh Mangpha ka khak hi. GSKhup (Tulsa, Oklahoma) June 19, 2020
Keimah mimal tawh ka kikhawlhna leh hong makaihna, thu hong hilhna cihte khum zonailo hilai ing.
Comment piaknop aomleh...