Amah amasapen: Lia Vung Deih Lun

Amah amasapen: Lia Vung Deih Lun

Zomite’ tangthu ah nungak khat pasal picing tinghtengh mi 5 in lukun in zahtakna apiak ‘Amah Amasapen’ hi’n teh. Tua zahtakna apia pasalte pen:

• 1. Pu Cin Suan Mang (Suan Mang)
• 2. Pu Kam Lam Khup
• 3. Mung Laan Thang (Pu Pu Thang)
• 4. Pu Pau Kim Tuang (Kim Tuang)
• 5. Pu Kap Khan Khual

Tuateng hi.
Bang hang in hih teng in lukun liang in zahtakna pia laizang uh hiam ?

Amah amin: Vung Deih Lun @ Lulun hi. Kawl min Hnin Pwint Soe tawh na tampi sem hi.

Kawlgam in federal democracy angahna ding in hun siat mahmah lai in huihlak dailak galmai samai ah nakpitak in pang hi.

Aung San Su Kyi khit teh kawlgam ah numei minthang pen ahi Dr Sin Thia Maung tawh kizom hi. Dr Naing Aung te tawh zong kizom hi. Tua hunlai gamvai nasem peuhmah in kidal kholhna in ih min takpi kigen ngeilo hi. Kamin Hnin Pwint Soe hi acih ban ah kawlpau pen kawlte mah bang lel ahih man in kawl te’n kawlte mah nasa pah uh hi.

Apilna, aciimna, leh acihtaknate atheih uh ciang un lamdang sa in athu kan simsim uh hi. Zomi ahih ban ah apa ZNC founder Pu Pum Za Kap ahih lam atheih uh teh muang tektek lai uh hi. Tua hunlai in Thai gamgi a om Zomi kipawlna khat ahi Zomi Students and Youth Organization (ZSYO) te tawh introduce uh ahih man in tua a kipan ZSYO tawh zong sep theih bangbang sem khawm hi.

Kawlgam kikhelna ding ahih theih bang in sem hi. Gamsung nasepna ah tua hunlai a akisam mahmah leh alauhuai mahmah ahi Satellite Phone te nangawn Thai pan in gamsung tampi tunh hi.

Ciim mahmah a mi zong deihsak ngiat hi. Kei tawh ka kimuh ciilna pen 2008 kum October 24 ni hi. Tuani in ZNC birthday kabawlna vuah apa tawh hong pai uh hi. Tawm ka kiho uh a thu-uk mahmah khat ahih lam kathei pah a ka zahtak sim khinkhian peuhmah pah hi.

Apa Pu Pum Za Kap in 2009 kum July kha 26 ni in hong nusia hi. Akivui ni in ZNC makai Pu Cin Sian Thang, Pu Gin Kam Lian. Pu Cin Suan Mang te tawh keimah Mung Laan Thang leh lawm Pau Kim Tuang te’n Yeway han ah pakkual tawi in mipi’ mah ah zahtakna kapia uh hi. Pu Cin Sian Thang leh Pu Gin Kam Lian te nasia takin minsial uh hi.

Tua a kipan Lulun tawh ka ki maingap zaw uh a ka kimu kiaukiau zel uh hi. Apilna leh a ciimna ka thei semsem a ka zahtak tektek hi.

Tua bang kawmkal ah kei gilbem sung ah kepcingna kangah a kipan ka ki thuza nawn kei uh hi.

Gilbem pan ka suahtak khit teh ZCD in numei khat peuhmah MP neih ding ka lunggulh mahmah hi. Lulun mah ka muangpen hi. Ahi zong naseppih lawmte khat in nasia tak in hong nial ahih man in Lulun cingam nawnlo in Pi Cing Ngaih Mang ka cimaita hi.

Tuni Lulun tawh huntawpna zatkhopna ah ka lung ngaihngaih ciang in Lulun MP in nei himawk leng Zomite tagah mahmah ding ih hih lam ka phawk a Pasian’ deihna khat hizaw inteh kaci hi.

Ka suah kakhan Lulun zah a miciim Zomi numei ka theikha ngeikei hi. Pammaih kasa mahmah hi. Tua zahta a damlo ahih lam ka theih khakloh mahmah ka kisuang pen hi.

Bangbang aizong nungak si khat pasal picing mi 5 in lukun a zahtakna apiak Zomite’ tangthu ah Lulun bek om pan in ka um hi. Hong zading hi leh “Kong piak theih hibek om lai ei. Na khasia kei o” cinuam sam ing ei maw.

Lungnuam tak in Zeisu’ Ang ah na tawlnga ta in.

Ih kimuhkik mateng mangpha !

Hong zahtak mahmah
(Mung Laan Thang)