Book Review: Laibu min – Bucing khantohna le picing ki-ukna
Laibu gelh: Pau Sian Lian @ Lianpi
Hawmkhia:
Kum: 2015
Laimai: 137
Laibu gelhpa taangthu
Laigelhpa Taang Pau Sian Lian @ Lianpi pen 1987 kumin Tedim ah suak-a, Rev. Dr. Kham Khen Mang le Nu Man Lun Niang-te sungpan a suak tapa 4 le tanu 2-te lak pan a thumna tapa ahi hi.
2009 kumin Dagon University pan B.A (English) tawh man-a, 2013 kumin The Cordilleras University (Philippines) pan Master of Development Management zo hi. 2014 kum pan Waseda University (Japan) ah Political Science thu Master le Ph.D ading a sin laitak ahi hi.
Dagon University ah a kah lai-in Universoty Christian Fellowship ah Secretary le Vice President sem a, 2 Copper Coins cih thu kizakna LAIHAWM khat pankhia in Editor zong sem pah hi. 2010 pan 2011 dong God’s Trio Partner’s For Mission – Myanmar (GTP) ah Mission Department lam len-in, GTP News Letter ah zong Editor in kihel hi. 2013-2-14 kikal sung Institute for Political and Civic Engagement (iPACE) ah laihilh-in adang sang tuamtuam ah zong hun lang in laihilh a, Institute for International Development(IID), Chin State kumpi le UNICEF-te kipawl-in a gelhkhiat uh Comprehensive Development Plan for Chin State ah National Expert khat-in kihel hi.
2015 akipan Chin National Community – Japan ah Education Director in kihel hi. Adang kipawlna ahi Commuinit Development (CDeo), Environment Conservative and Community Development Organization(ECODS), Zomi Innkuan Zomi Association – Japan-te ah zong kihel hi. Tongsan Media ah zong thuluui gelhna tawh Columnist in kihel-in adan laihawm nate-ah zong laigelh zeel hi.
I. Laibu sung thu zon olna
KHEN 1 NA (A BUCING KHANTOHNA)
- Khantoh Nadingin a Khangto Lungsim
- A Hoihzaw Ngaihsutna
- Myanmar, Zogam le Zomite’ Zawnna
- Gam Haute A Hauh Semsemna Uh
- Hawmsiam Nungta Nebum Puksi
- Gamdangah Sumzonna le Khantohna
- Kibatlohna, Kikupkhoppna le Khantohna
- Kilemlohna le Khantohna
- Tangpi Khantohnading
- Khanna, Khantohna le Kiginna
- Gammite’ Nopsakna Tehna
- Zogam Khuapi Suahsak na
- Zawnna Khiapna Geena(ZKG)
- Hunthak Numei le Khantohna
KHEN 2 NA (A PICING KI-UKNA)
- Makai Hoih le Ki-ukna Hoih
- A Ithuai Thu Lamdang Muhthakna
- Leitungah Khialhna Nam 7
- Sum tawh Kileitheihlo
- Leitungah Thumanna Om nading
- Kuate in Politic ah Kihelthei?
- Khan Kum Sawt Democracy
- 2015 Election ah Kua Teel Ding?
- Biakna Makaite’n Minam Makaihna ah koicih panmun lak ding?
- Democracy Ki-ukna’ Mailam le A Hoihzaw Dang
- Kikhelna Ading Vai Lianpi Geelna
- Laibu sponsor-te Innkuan
I. Laibu gelhpa ka muhzia
Laibu gelhpa Tg. Lianpi tawh a pualam ah ka kimu ngei nai kei uh-a, ahi zongin lai-uk mi ka hihna uh tawh kizui-in online pan ahi zongin, laibu zuaksakna pan ahi zongin ka kithei uh hi. Ama hangin keima gelh laibute pawlkhat zong it le ngaih, lawm le gualte kiang tung thei hi. Amah pen Pasian zahtaak in Pasian mah a masak mi khat ahih banah Zomi khangthakte sungah Gamvai(Politic) tawh pilna thuukpi sinin a sangpen pilsinna Ph.D dong a sin khat ahi hi.
Ama thu muhzia le ngaihsutna(Gam vai, Minam vai, khangno vai, pilsinna vai..atuamtuam) pen midang muhzia tawh kibang lo-a, ahoihlam muhna le sandan a nei khat ahi hi.
II. Ama laigelhte
Lianpi pen pilna sangpi a sin bek hi loin ama theih pilnate minam phattuam nadingin a hawmsawn nuam khangno khat ahi hi. Online Media ah ahi zongin, Zomi sunga laihawm tuamtuamte ah thuluui manpha nono gelh hi.
III. Hih a laibu
Hih a laibu gelh “BUCING KHANTOHNA le PICING KI-UKNA” laibu pen Zomite adingin a manpha mahmah laibu khat ahi hi. Ei Zomi sungah Gam vai(Politic) a uk mahmah le a vei mahmah tampi i om-a, tua I ukna masuan in a hanciam tampi I om hi. Tuate in hih laibu pen pello a sim dingun kisam ka sak laibu khat ahi hi.
Pil sinna mun tuamtuam ah a sin khit ciangin I Kawlgam sung Gam vai (Politic) kalsuan zia, Zomi sung kalsuan ziate en kawmin leitung a gam lawhcing khin, gam khangto khinte kalsuan ziate tawh ei gam kalsuan ziate khinkhai kawmin hong gelhkhiat laibu ahi hi.
A tungah I gelhsa ahi laibu sung thu zon olna sungah a vekin I mukhin zo hi. Gam vai bek hi loin mimal khantoh nading, picing nuntakna le bucing khantohna I neih theih nadingin a simhuai laibu hoih mahmah khat ahi hi.
Laibu gelhpa in a gelh laitak in 2015 kum-a Kawlgam kiteelna ding tawh kimemat in I theihhuai thute hong deihsakna tawh bulphuh ahi hi. Ahi zongin I nuntak sung tawntung a kizang thei ding le I khantoh nadingin a kisam nuntak pih ding laibu hoih khat ahi hi.
IV. Sim in nuntakpih ni
Hih laibupen Gam vai(Politic) lam bek hilo, mimal nuntak khuasak kalsuanna ah zong a bucing khantohna le picing ki-ukna I neih theih nadingin lam hong lak laibu hoih khat ahih manin Zomi akuamah peuh in I sim ding, inn sim ah I neih dingin hoih ka sa hi.
V. Laibu ngah theih nading
Laibu pen 2015 kum-a kihawmkhia ahih manin sai ah lei ding muh hak kha ta mai ding hi. Ahi zongin laigelhpa Tg. Lianpi tung pan a laibu ahi pah kei zongin PDF File kingah thei kha ding ahih manin laigehpa tungah zasak in ngen ciat ni…
VI. Thukhupna
Book Review kician tak hi nailo ding ahih mani laisim a kuamah peuh in hong theisiam un… Hong hanciam toto lai ning e.. Topa’n thupha hong pia tahen, Dong Mung
Comment piaknop aomleh...