Pilna, Ciimna leh Siamna ~ Sia Zam Sian Khai

Pilna, Ciimna leh Siamna ~ Sia Zam Sian Khai

(1) Thupatna

Kawlte tangthu sungkhat ah mitkhua mulo miguk in saipi khatvel uh aa, saimawl alawngkha pa in, “Saipi ihcih pen gulbang hi.” ci hi. Saihapak (invory) a lawngkhapa-in, “ Sai na cihcih uh, thal tang tawh kibang cihi.” Saibil azawtkha pa in, “ Sai cihpen, maizap bang hilel cihi.” Sai pangpi azawt khapa-in, “Sai ihcih pen, innkawm bang hi.” ci-in, saikhe alawngkha pa-in, “singbul tawh kibang ci aa” Saimei alawngkha pa in, “Sai na cihcih uh, khauhual tawh akibang hilel” ci-in, amau lawnkhak naciatpan in amau theihna tawh saipi lim leh mel nagen tek uhi.

(2) PILNA

Hih saipi leh mittawte tangthu mahbang in, pilna cih kammal tawh kipawl inzong, tang tawng pekpan kipan tuni dong mitampi in, amau muhzia, amau theihzia leh amau thuakna zia tungtawn in nakhia (Define) tek uhi. Pilna cih kam mal pen a tangzaipi khat hi aa, laigual khattawh akhiatna kicing theilo dinghi. Kei ngaihsutna ah pilna cihpen, “Lai theihna, thu theihna” cileng kinai pending in ka um hi. Pilna pen mawkngah theih hilo, sinkul, zonkul, kankul in kisinkul hi. Ei zomite in, “pilna sin” mah ihci hi. Gentehna in, nute sungpan ihpian limin A,B,C thei ihom kei hi. Ih sintawm ahihi. Sangah ahizong, innah ahizong, honghilh khatpeuh a omciang in kithei thei panhi.

“Na hauhnop leh sumnei masa in!” cih kammal mahbang in, “Napil nop aa, thu natheih nop leh laithei masa in!” cileng kikhial loding hi. Mittawh muh munna, pumpi mahmah tawh tuak munna leh thuakmunna (Experience) pan pilna kingah thei hinapi, pilna ii zungpi taktak pen “lai simna” pan hizaw hi. Laisimna cihteh sanglai simna ciangbek hilo in, laibu tuamtuam tampi simna ihcih na ahihi.

Banghang hiam cih leh laibu atamzaw pen mipil te in, amau thuakna, amau muhna, amau ngaihsutna, amau sepna te agelh khiat uhi aa, et teh siamna panin pilna tam pi kila thei hi. Ngaihsut huai thukhat ompah aa, Zolai (A,B,C) laibek athei ten, tuatawh kigelh laite panbek in pilna lathei ding hi. Kawllai zong athei ten Kawllai akigelh laibute pan, muhna, theihna leh pilna ngahthei ding aa, manglai zong siam laileng atangzai tektek pilna kingah dinghi.

Pilna cih kammal sungah laitan neihna, theihna leh siamna ci-in, khenthum in kikhen thei laiding in kangaihsun hi. Sang kahkah in lai tansang, Degree ngahna pen “lai tannei” kici hi. Tanlang ong khempeuh, Degree nei khempeuh “mipil” kici theilo zel hi. Master Degree nei khempeuh “pilna nei” aci nuam aom leh keibang athukim lopah ka hihi. “Nangzong pilna nei hikei teh” hong kicih leh lungkim takin kasang dinghi.

Atung a ihgen mah bangin theihna ih cih leh siamna ihcih zong kilam danghi. Athei khempeuh siamkim hetlo hi. Pawlkhat ten theih hauin siam neilo hi. Theihding zong thupi aa siam taktak dingzong kisam zawlai hi. Tua ahih manin a diakdiak in tuhun khangno ten laitan neihding zong thupi aa, theih leh siam takpi dingzong ih khuahun in hong ngenta hi.

Kumpi sung ahizong, Company sung ahizong nasep lut lecin, nalah masak dingpen na lai tan ahihi. Lai tansang naneih kei leh nasep sang, zalian mun kingahlo pahding hi. Tua zom ah na theihna, na siamna tawh kizui in zakhan na, min neihna, mite muanna cihte in hong nungzuih ding ahihi.

“Pilna hun” ci-aa akigen mahbang in, lai tansang, pilnasang neihding, zonding hun ahi hi. Tansawm ong ciangbek hilo in, Degree tuam tuam lakzawh nading hanciam kulhi. Kawlgam sungah khangno teivang laipil, laihat te, ih kum pi in gamdang tuamtuam puakin, sumbei paaibei sik uh aa pilnasang ahi (Master, Ph.D) te sinsak kahsak uhi. Eizong angah theilua ih hihi. Han ciam kul, hanciam huaihi.

Hihmun ah Degree khat ngah cihpen pilna kicingta cih hilo zaw in, pilna zonzia theita cihna hibek hi. Lokho mibang hileng ih lovatna ding, ih lokhawh nading tem, hei, tuu cihte anei pan ih hihi. Laitan neihna Degree ngahna pan thuthei taktak apil taktak ih utleh lai tampi simin, thu tampi kaihkhop laiding ahihi. Tuhun khangno ten, tulai tak lungtuplian ihneih kei aa, ihmawk om leh mailam ah ih kisik khading hi.

(3) CIIMNA

“Pilna” cih kilim gen in ki thupisak mah mah napi “Ciimna” ii thupina kiphawk khakim salo kahih manin kei ngaihsutna tawm kong pulak dinghi. Khualam khawng ah lai tansang, pilna neikhol lo napi-in, aciim mahmah, atei mahmah mipawl khat kimuthei hi. Tuamah bangin lai tan sang pilna nei veve zong aciim om in, aciim khol lo kamphat man leh hanciam man aa laitan sang nei mitampi om in kamu hi.

“Ciimna” cih pen pianpih ‘B.A’ ihcih dan, ‘Tangpil’ ih cihdan mah in neutung pan mah aa aki vompian in kamu hi. Naupang khangual khat tektek alawm agual te lak aa hong hisitset pha deuh, amit hahzia, akam pauzia, agam tatzia hong picing phadeuh omse aa, tuate inzong a khangual lak ah thunei pahdiak in a makai dan in hong om pah hi. Hihpen ‘pilna’ cihsang in ‘ciimna’ cileng kituakzaw dinghi.

Ihpu ihpa te in, ‘tuibang ciim, vabang pil’ cih lakam nanei uhi. Ka ommuan aa kangaih sut teh ‘tuibang ciim’ cihpen ‘tuiciim bangin om kilkel, om tiuteu, om hithiat ding aa, tui ciim sungah nakhempeuh a kimuh theih mahbang in, a ciimte inzong thukhat lakhat peuh ah ngaihsut siam, muhsiam, theihsiam dingin kangaihsun hi. Zahtak baang kasase hi. ‘Vabang pil’ cih mah bangin, apil ihcih te pen, ‘vasa bangin luhei laklak, khua dak laplap ding in’ ka ngaihsun hi. Zahtak baang kasa keise hi. Kei ngaihsutna hi.

Pilna nei, laitan sangnei, siamna nei khempeuh ‘ciimkim hetlo’ hi cihpen hangtak in kagen ngam hi. Pilna pen laitan tawh zong kisai kimkhol lo hi napi, miciim khat in laitan sang pilna tawh thuah lai leh mithupi mahmah suak zoding hi. Ih khanglui late sungah, ‘mel hoih ningtui bang kidawn theilo, sinlai siangtho vabang pil phazo lawm aw’ naci hi. Hihlai ah ‘sinlai siangtho’ a cihpen ‘ciimna’ hi. ‘Ciim’ cih teh ‘ninlo, datlo, a siangtho’ cihna hi. ‘Lungsim sia, lungsim kawi neilo’ cihna hi. Ihpu ihpa ten bangzah ta in thu namu hiam cihleh ‘pil ding thupi napi, lungsim siangtho ding, ciimding’ cih na masak veve uhi. Pasian thubu sungah Pasian piakla no.(4) na, ‘Vontawi ciibang atawm zong in, sinlai tuibang ciimkim hen aw’ naci hi. Ciim na, lungsim sianthona ii thupina teltak in hong lak ahihi.

Tua hi aa mimal khat, innkuan khat, pawl pi khat, gamkhat ihkhantoh nading, pilna siamna nei mitampi akisap mahbang in mitawh ih kiho theih ihki thutuah nading, innkuan kilem nading, pawlsung ki pumkhat nading leh gamsung kilem nading in ‘sinlai tuibang aciim mitampi kisam hi’ cih thulian kimu thei hi.

(4) SIAMNA

Tuhun leitung paizia leh ih gam paizia tawh kizui in athupi mahmah leh akisam mahmah pen ‘siamna’ a hihi. ‘Siamna’ cih kammal huam sungah ngaihsut siamna, kampau gamtat siamna, sepleh bawl siamna, hawmsiam geelsiam na cihbang in tampi kihel dinghi. Mikang te in, ‘Skill is knowing how to do.’ ci uh aa, eipau in, ‘Siamna ih cih pen bang cibawl ding, bangci sepding,….etc, cih theihtheih na’ cileng kikhial loding hi.

(i) Ngaihsut siamna

Leitung ihcih pen asia apha, ahoih ahoih lo, nuihna kahna,…etc, na khempeuh tawh aki dim ahihi. Lokho pa in guahzu leh adeih laitak in ngabeng pa ahih kei leh zun tehteh naungek nei nupi nu in, nihaam leh deihding hi. Gamhal keileng ihgam te hongtak in leitang hoihding cih thei napi hang ihbawng ih sakolte ih khualna in gam ihhal simsim veve hi. Kuamah khial kici theilo hi. Cihnop na ah ihleitung nuntak hunsung in ngaihsut zia ihsiam kei leh ih hansuak den ding cihna hi. Ih innkuan sung nangawn ah khat leh khat ih deihdan ih duhdan kibang kimlo aa, ‘kei cihbang nacih loh uh’ ci-in tek sasa mawkleng ki hingim ding aa, ih baangkua sung nuam ngeilo dinghi. Ut ta keileng thusia, thukha, natna, sat na, sihna ding in peelmawh aa a tuakding leitung mite ih hihman in, ahoihlam aphalam leh ihpuak zia azang ding aa ngaihsut siamna pen hamphat na liankhat ahihi.

(ii) Kampau, Gamtat siamna

‘Mangpha man ni ei!’ cih leh ‘mangpha naman sinvua!’ cihpen akhiatna akibat hang in, azate ading in akhumna kibang loding hi. Tua mah bangin ‘nozong aphasem naman vo!’ cih leh ‘acite tungtu!’ cihzong a limna kibang lo ding hi. Mundang gamdang tawh phone kiho nangawn, ami ih kimuh loh hang in ih kiho pih pa/nu mai gum kawm maw? Nuihmai kawm maw? cih a awpan in ki theithei hi. Mikang ten, ‘Smile can be heard.’ ci uh aa kammal hoih kasa mahmah hi. ‘Nuihmai napen ihbil in zathei hi.’ ci-in eipau in kilet thei ding hi.

Ihpu ihpa ten ‘kamsiam siallei sang, kam sia sialliau’ ci uh aa, kawlten ‘ih kam hang in kisi thei hi’ naci giap uhhi. Tungsiah nuai siah, inn kuan sung, pawlpi sung kizop kiho na ah kam pau mukpau siamding thupi mahmah hi. Agente ading in paukhiat ziau ahih hang, aza te ading in lamdang ngaihsut na om thei hi.

Tuhun semsem in, phone ki limzat mah mah ahih manin kizop na ol mahmah hisam napi in, kampau kammal zat ihsiam keileh kitel khialhna piangbaih zawlai hi. Kamkhum dakdak cihna hilo aa, kician tak aa kammal zat theih ding cihna hizaw hi. Kawlgam sung ahizong in, gam dang ihtung ahizong in ihtungsiah ih nuaisiah, ih veng ihpaam tawh kizopna ah mizia et siam zawt siam in kampau, gamtat siam ding kisam mah mah hi. Ih omna, ih hawhna innteek te, mi nam te, tungsiah te zia en in kampau, gamtat siam kul hi. Eimi pawlkhat ten ‘Kuamah awlmawh keng!’ peuh pumcih engang thei mawk aa, aman a awl mawh leh a awlmawh loh hang, adang ten kizum pih thei, ki dahpih thei hi. An nekzia, tui dawnzia, tut leh khawlzia pan kipan dailen ziadong aa khuadak giaugiau aa akilawm bang aa gamtat siamding kisam hi.

(iii) Sep leh bawl siamna

Tuhun teh mihingte kikhua phawk thei mahmah ta, kipil thei mahmah ta aa, khat leh khat, company khat leh company khat, gamkhat leh gamkhat akilang in ahizong, asimtham in ahi zong kidempha mahmah uh ahihi. Hibang dinmun ah theih zaugawp tawh gualtung kituang zonawn lo aa, asep abawlzia, siamtak pi, theih takpi ding thupi tahi. Leitung gam tuamtuam te ih etciang in sep leh bawl asiam mitampi a khansuahzo gam te mah mimai ah hong dawkzaw deuh uhi. Gen tehna in Singapore gampen tuikulh neuno khat hi aa, bangmah pianglo thamlo in tuidawn ding tui nangawn Malaysia pan lei uhhi. Mimal in zong ih kawlgam ii sehsawm suah sehkhat khawng bek pha hi. Ahizong in apil takpi, asiam takpi mite in agam makaih in, a mipite uh pilsak, siamsak khinzo ahih manin leitung gambup ii zahtak gam khat in dingzo uhi.

Ih kawlgam ah leitung leinuai, tuisung tui nuai na manpha tampi om napi bangci lak ding, bangci tawhding, bangci leng manpha tek tek ding ih theihloh banah, a omna munzong athei kim lote ih hihi. Sepzia bawlzia ih theihloh ih siamloh manin ihvan manpha te tutphah in an duh gilkial in ih tu meimai hi. Ih dolsing neihte apumpum in ihzuak hi. Gamdang ten phelkham in, at in, vanhoih nono, nahoih nono, hongsuah uh aa azah tampi met uhi. Kawlgam pan aki gan puante Thai ten honglei in, a tuamtuam in puah pha, zempha uh aa kawlgam ah hongzuak kik teh ‘en gamdang pan aa hongpai’ cidep in azah tampi in ihlei kik hi. Pilna leh sepzia bawlzia ih kisapna hang a hihi.

Tuhun laitak, kawlgam ah nasep lian, nasep thupi, company pite aphutding abawl ding in gamdang pan tampi hongpai uhi. Sep leh bawl zia ah eigam mite siamloh leh thuman cihtak loh tawh thuahkhawm lai ih hih manin amau gam mite hongton pih uhi. A thupi munteng ah amau lut in nitha leh khasum tampipi ngahpah uh aa, pilna siamna kitam sap khol lo aa thatang kitam sapna munte ah eigam mite hongzang uh aa ih thaman zong tawmpah hi.

Sep leh bawlsiam nading in pilna zong kisam aa siamna zong kisam hi. Pilna leh siamna cih teh nakhat peuhpeuh bangci bawlding, asiat leh bangci puahding cihte laitawh sin atheihna hi aa, tuapen sem takpi, bawl takpi in damdam aa siamna ahihi. Pawlkhat te leuleu in laitawh sin tangtang takei leh etziau tawh semthei, bawltheipah phial mah uh aa, aciim uh nahi gige uhhi.

Ihgam ah mawtaw, cycle tam mahmah ta ahih manin cycle bawlkawm aa cycle puahzia hoihtak sin in siamleng, ih nungta zo luading hi. Phone kilim zat mahmah ta aa, phone sia puahzia, asung ah a tuamtuam guanzia khawng pumtheih lel in saihong leng nisa guahzu nuai aa nasep kul lo in sumbul kizong zo dinghi. Sep leh bawlzia siam takpi ding leh thuman, hunman ding bek ki sam hi. Siam napi hang hunman kei in thuman kei leuleu lehang khatvei nihvei kan hong kizuan khollo ding hi.

Theihhuai thulian khat ah tuhun paizia pen lai tansang pipi, Degree sangpipi ngah aa bangmah pi athei khollo te sang in semthei bawl thei takpi, asiam takpi te in mun leh sum ngahzaw aa minnei zaw uhhi. Tua ahih man-in lai tansang Degree neita keileng, sepleh bawl siamleng mi thupi, mimuan huai, sumzong siam kisuak thei lua hi. Siam takpi nading in lungduai kul, han ciam kul aa, thuakzawh kulhi. Leitung ah athupi nakhat peuh pen olno tak aa ngah cihbang omlo hi. Olno tak aa ihngah khak leh zong sawtpi kimang khol loding hi. Tuni aa pil nasak, siamna sak te, a mawkpil, a mawksiam hikhol loding aa, hau nasak te zong amau pianzia kanpha lecin na en ngam loh mitampi omding hi.

(iv) Hawm leh geelsiamna

Ih kammal mahmah ah hawm cih leh geel cih omhi. Hawm cihmah bang in eibek in tang gailo in hawmkhia, piakhia cihna hipah hi. Sum leh paai, neih leh lam, nektheih taktheih te hawmbawl ding cihna hibek lo aa, sep leh bawl, panmun, thuneih zaneihna tezong, khat guak in lencip lo in hawmbawl ding, khenbawl ding cih na ahihi. A taktak teh tangtung hiam? Tangtung lo hiam? bel thei khang in, ihgam ii pai zia Democracy ngeina ih cihpen ahi dimdiam in kikum khawm, kipawl khawm, khensat khawm in hamphat na ding a omleh zong ngahkhawm, sangkhawm cihna ahihi.

Innkuan lutang pabel nubel hita hang ci aa, eitup bek athu vaihawm pen tuhun in kilawm khin nawnlo hi. Pawlpi sungah laisang makai hita hang ci aa, keithu bek ih cihcih laileh mi kiban loding hi. Ihgam ah ‘hawmsiam lohna’ hang in tuni dong kilemna om theilo aa, nakhem peuh minung ah ki omta hi. Phawkhuai mahmah hi.

‘Geelsiamna’ cihpen innkuan sung, pawlsung, gamsung bek thamlo in mihing khat ciat aa ding inzong athupi mahmah hi. Ih nuntak hun saupi hilo aa ih cidam lai, ih tha hatlai, ihhun neihlai in ih nuntak khuasakzia, ih mailam hun ding geelsiam in telsiam kul hi. Ih nisim nuntak na ah geelsiamna cihpen akisam den ahihi. Gen tehna, sangnaupang khat in bang lai ‘subject’ sim ding, lokho mikhat in tuni koilai lo ah kuanding, tukum lovat thakding maw? Alui teng mah kho laiding? Inn ngak nupikhat in zing meh leh ni tak meh bangci bawlding? cihpan kipan Phungpi panmunlen upate in nungkum laisang khawmpi sangin, tukum anopci zaw, apicing zaw dingin bangci vaihawm ding cih bang in mun khempeuh leh mikhem peuh ading in gel kholhna gelsiamna athupi ahihi.

Ih ngahna ihmuhna tawh kituak aa zat¬theih zektheihna zong gelsiamna ahihi. Ih pawlsung ah gamdang pai aa sumzong tampi omhi. Khua-ul khua-sa suak in haksat na, patauh na tampi kawm kal ah amuh angah sunsun inn lam hongkhak uh sumte, zatsak mangpah lo-in ih hih zawhzah ciangciang vangil suah ahih keileh kholsak leng geelsiamna ahiding hi. Malaysia pan atunglim khawng azingciang hang laiding in lokuan pihleng anuih zakhol loding aa, zong kilawm khol loding hi.

Ihneih sunsun tawh mawtaw, cycle ih lei pah leuleu leh tuitawh apai ahih lohban ah avante hongsia thei hongtul thei ahih manin kicihmawh lawhthei hi. Kiho pihding om khollo pipi, hak sa pi in phone leita keileng phamawh lualo ding hi. Kisam lopi a cilluat a siamluat napan gel siam lohna ahihi. Ahi zong in zatna munding beina mun ding aa ih hih tiltel luat leuleu leh aciimlo apil lo hong kici zelding hi.

Tuhun ciangin aneu alian in phone ihnei hi. Khantohna khat hi aa thupi hi. Ahi zongin nasep awl liang in ih khoihkhoih leh phattuamna sangin siatna lam hong tamzaw dinghi. Adiak diak in sangkah laite in laisim loliang aa ihmek mek aa, game ih kimawl mawl leh lai onloh ban ah ihmit in thuak mahmah ding hi. Kawlgam ah naupang nono mit limlang bulh tam mahmah tahi. Ei leh ei kikep zawhloh na, gelsiam lohna ahihi.

(5) Thukhupna

Tulaitak khuahun pen mikang pau in ‘Knowledge Age’ a hih keileh ‘Education Age’ ci in mintuam tuam pia uhi. Kawlkam in (pinya khet) ci uhi. Eipau in anai penpen ding in ‘Pilna hun’ ih cih ziau hangin ‘pilna’ cih kammal in huamkim kasa kei hi. Tua ahih manin ka thulu ding in ‘Pilna, ciim na leh siamna’ ci aa hong gawmtuah ka hihi. Zomi te in pilna cih kammal zaleng ihmit hek ah sanginn sangsia te leh sangnaupang te khawng mu pahpah ih hih manin, ih tangzai muhzawk ding deihna tawh kei ngaihsutzia kong gelhkhiat a hihi. Ngaitsut kibat lohna leh ngaihsut behna tampi omthei laiding hi.

Pilna, ciimna leh siamna akop khawm mipen mipicing ahiding hi. Mi tampi om khol loding in ka ngaihsun hi. Pil sam napi hang ih ciim kei leh mi phungcing kisuak zolo ding aa, ih pilna tawh kituak siamna ihneih keileh zong hawmthawh huaina omding hi. Ahi zongin mihing te ‘Kicing’ cih omlo aa eidinmun, ei tutmun, ei vaipuak tawh kilawm kituak in ahikhom pilna, ciimna leh siamna ihneih nading hanciam ding ahihi. Athupi penpen ah ih pilna, ih ciimna, ih siam nate ei mimal ading bek hilo in mitampi ading in ahoihlam a, zat theihding ahihi. Sia Zam Sian Khai