Vondeih Kep Ding – 9
Kong it Tawngno,
Lai maikhat gelh ding cih zong khat veivei ciangin sun thapai nasep sangin hak sa ka sak zawk hun tamvei pi tak om hi. Tua ahih manin‘pongman in lai hong khak ning’ kong cih hangin hong khak zolo hi ingh! Ka kamciam pelh ka hih manin na pa’ ka lung nuam kei. Bangbang ahi zongin na pa ka mawhna hongmai sak in!
Tunung deuh khat Pathang in, “innvai tawh kisai in zum ah hongpai pih le cin” ci-in hong zawn in kaman tawh kituak ahih manin kavai pai pih hi. Ka paukhankaphuhtheih ding bangmah tam om lo hi na pi-in, ahi zongin tua ni thapai phial zum ah om cip hi ung. Zingsang nai 8 khawng a pai pen nitak lam nai 3 ciangin man thei pan hi ungh. Ka ciah uh ciangin an lah ne nai lo ka hih man un, Pathang in sai khat ah 
hong lut pih in, “ Dimno’ pa, bang dawn ding nai a, na nek ding bang khat peuh lei ni ei!” ci-in an hong leisak sawm hi. Kagil a kial mahmah hangin ka lungsim ah ‘ tua khat vei ki huh sunsun nek ding khawng kitaih pahpah sam dia’ ci ka hihman in, Pathang kiang ah, “ Bangmah deih kengh, Pathang aw, lungnuam mawh kengh, kei adingin bangmah lei kul kei!” ka ci hi. A lungnuam thei mahmah lo-in nihvei thumvei bang hong ci kikkik in, ahi zongin na pa’n ah ka nial teitei hi
Napa’n tuadan in ka gamtat pen ka ngaihsut kik ciangin hoih sa lo-in, ka kisik kik mahmah hi. Banghang hiam cih leh amau adingin ka hun tampi ka beina hangin lungdam in, a lungdam na uh hong lak kikna pen sang nuam lo ka hih manin, nidang ciangin huhna hong ngen nawn ken, aci tawh kibang ka kisa hi. Tua ahih manin kisik ing ci-in a hong gen hi ingh.
Zantak in khualpan in ka naseppih ngei ka lawmte khat hong hawh in an anek nai loh lam ka theih ciangin ankuang nih thuk in ‘an ne ni ei’, ci-in an ka nekpih hi. Ke’n ka nekkhit hangin “ ken ne khin ing in, nang’ na ne o” ci ziau mawk leng ne ziau lo kha ding hi. An nek nop asak loh khak ding lau in kei zong a ne nai lo danin ka kineih a, ka lawm tawh an ka ne khawm kik hi. Ama’n zong kisuang lo tak in an hong ne ngam pah hi. Ahi zongin hi bang kong gen ciangin mipiak khempeuh ne in, hong kisawl na khempeuh ah ne pahpah ding aci hilo hi ingh. Aki lawm na mun leh a hih ding na mun ah i duh kei a, i gil akial kei zongin neksak in, ciap sak leng aci nuam hi zaw ingh!
Na nineu in a tan ( 10 ) laiphi lai-un a lawmte numei khat thu hong gen ngei khat hong gen kik leng: “ Ka laiphi sung un nitak khat ka Sia te un ka ihmut uh a suak hak zawk deuh na ding ci-in la-phet-toh hong puak hi. Ka lawm teng uh tawh ki-um lieiliai in ka nek lai tak un kalawm numei khat in,‘ ke’n lim sa lua in’ ci-in a sikkeu dimdim in la-in tawm vei sungin a langval tang bang ama’ nek in hong bei ziau hi! Tua bang teng tawh ka lup uh ciangin den a laphettoh nek pen tamlua hi ding hiven, ka lawmnu un ka sungnim ci-in hong awk gawp a, a laphettoh nek teng hong luakhia kik gai” ci liang hi!
Ih duh ai te tei zongin kidop huai sa ingh! Tawngno, ei pata in bel nek ding kilawm na mun ah a hoih bek ciang in ne-in, ih duh khat ahi ta zongin habaak gawp liang kei ni maw!
Hong it,
Napa
Columbus, Ohio. U.S.A
April 25, 2013
Comment piaknop aomleh...