Munlai Tuiphum Pawlpi Kha Khanlawhna

Munlai Tuiphum Pawlpi Kha Khanlawhna

Zomite sungah Kha khanlawh nading thu a ki ngetnget ciangin a hunhun in Zomite lakah khanlawhna hong tung zelzel hi. A tuntun na mun ah Pawlpi ki makaih ziate leh upna bulpite tawh ki tuak tase kei leh Pasianin kuamah deidan leh aana cih bang omlo in a deihte’ tungah a tun hun in a tung hi mai hi. Khanlawhna hong tung zelte’ lakah a tuamtuam khanlawhna om a, 1970 kiim pawlin Pasian’ hehpihna, gamtat pha hanga gupna ki ngah hilo, Jesu sisan hang bek hi cih upna khanlawhna nasia takin Zogam leh Zomite’ lakah hong tung hi.

Tua zawh kum sawm pawl, 1980 kiim pawlin Pasian’ Kha Siangtho nasepna khanlawhna hong tung a, Kamtuam pauna, limna, lamna, khuang leh a gingthei khempeuh tawh Pasian phatna leh thusuak cihte a kipan khanlawhna dang khat hong tung leuleu hi. Tua hun laitakin a sang thei nailote in dawivei leh mihai bang liangin ngaihsun uh a, nial cihtak nial in a nuntakna a beilawh nangawn zong om liang hi. Tua tawh meizom mahin khamite sungah Pasian pen to thum cih bang hi kei in, Pasian To khat kimlai a hun zui-in Pa, Tapa leh Kha Siangtho in hong kilang hi a, a min Jesu hi ci-in a um a, a piangthakte Jesu min tawh tuiphum uh hi. Tua khan lawhna pen paingthak pawlpi tampi mah in sang theilo in nial uh a, upna bek tawh a din khawl tampi ki om in tu dongin singlamteh phungah ki vialvial lai uh hi.

Tu in hih khanlawhnate ki liah zo nawnlo in pawlpi kimah hong tung ta a, Pasian thugen siam tampi leh thu um mite in a mau pawlpi upna ahilo upna leh gamtatna te a um a sang pawlpi dangte’ aa a kawm bangin Pasian na nakpi in hong sem ta uh hi. Tua pen pawlpi sungah a lungkim nadingin a kep siamna khat uh hi bilbel ahih manin a um pawlpite kiangah tailo pah uh hi.Gen siatna hilo in, sanggam RC sung nangawn ah hih khanlawhna hong tunga, tu in hih anuai a video link na en le uh cin, Tuiphum sungah zong nasia takin Pasian in nasem hi.

Hih bang khanlawhna omte kawmkal ah ngaihsut huai pawl khat om hi. Pasian’ thu ih upna lian pen in, tawntung gawt mun ahi, Hell gam pan suakta in Tawntung Jerusalem ahi, vangam a luah nuamte ih hih man ahi hi. Hih bang limna lamnate thupi mahmah a, Pasian thupha zong ki ngah mah hi. A hih hangin hih lawpna te pen ih up khit ciangin vantung gam tun nadingin aamah khaan thei, ahih kei leh tawhtang na hi masa lo ahih manin hih lawpna leh khan lawhna ciang tawh ih din khawl ding lauhuai mahmah hi.

Satan ngimna lian pen in, a dang nate ahi, Pasian’ thupha leh leitung thupha khempeuh ih ngah zongin kuamah vantung gam tun loh ding a hanciamna ahi hi. Tua ahih manin Pasian’ thu um leh Pasian nasem tampi te zong vantung gam tung lo thei dinmun ah ki om thei ding hi. Tu in thu umte in zong Mel ki lamdanna mual(Mate 17:1-13) ah nungzuite leh Topa Jesu a om khop laitak lungkim lua ahih manin buk thum lam a, tua laiah a om suak sawm bangin ih thupha ngahna leh ih nop saknate tawh lungkim suak a, gupna thu laigil taktak ih ih lunggulh loh khak ding lauhuai hi.

Pasian thuman thutak ih muh nadingin khaici a po nading guah a kisap mah bangin kha khan lawhna ki sam a, khan lawhna hong tun ciangin a kisam bangin maban ih zop kei leh ankung a sih pah loh hangin a cinghtek bangin khalam zong ki cinghtek thei ding hi. Mihingte’ hanciamna tawh hun khat sung Pasian’ thuman thutak a ki sel zawh hangin, Pasianin hun a sak ciangin ki sel zo nawn tuanlo ding a, tua ni ciangin ih nuntakna te leitungah om lai ding maw cih ki gen theilo hi.

Biakna ih cih pen leitung thu banga a tamzaw thukimna leh upna cih bang peuh ih bulphuh khak leh ih khialh leh zong ki leh kik ni cih theih pawl hilo ahih manin lauhuai mahmah hi. Pai nading mun nih bek om a, Vangam na pai kei leh ut loh hangin Hell gam na ut thu tawh tel kholhsa a na koih suak ding hi. Na tuak khialh leh tua ni ciangin na nu, na pa, na sanggam, na pu, na sia pa, tu laitak a na muan mahmahte na ngawh hangin tuate in zong amau leh a mau ki gum zolo ding uh hi. Tawmvei nuntak sung ading hih zah tak a, maizumlo leh gim leh tawl cilo a, a sun a zan a hanciam ngam, hanciam zo, hun pia zo ih hih leh a bei theilo nuntak tawntungna aading bangzah takin na lung himawh hiam cih ngaihsun kik in.

Pasian in thu hong khen ni ciangin na up leh up loh thu ahi zongin, na piak zawh leh zawh loh thute hong en masa lo dinga, Ama hong piak Lai Siangtho tungtawn in tuhun tawh ki tuak Upna(Jesu sisan), Upna na kip sakna(Tui) leh Hong ciam tehna(Kha) pen
Sawltak te hun a, pian thakna tawh teh in thu hong khen ding hi. Sawltak LST pen eite’ aadingin sapna nunung hi. Dik ki sakna ngah nadingin lungsim sungah ki um a, gupna ngah nadingin Kam tawh ki pulak hi.(Rom 10:10) Tua lungdamna thu pen Paul in: Topa Jesu sihna, ki vuina leh thawh kikna hi na ci a, Pasian lam pan hong zawh sak tua ahi hi. Ama zawh bangin mihing lam pan hong kalh thu in sawltak te hun a, ih muh bangin Si(upna), Tui(Tuiphumna)1 Piter.3:21, Kha(KST ngahna) ahi hi. Sawltak.2:38; Sawltak 10:46-47; 19:5-6)

Hih Gupna thu tawh kisai hong kikup pih nuamte tungah ki lungdam mahmah ding hi.

Note tawh Pasian aading nasem khawm,

Mang Khan Khup