Vondeih Kep Ding – 138 (Dimno’ Pa)

Vondeih Kep Ding – 138 (Dimno’ Pa)

Dear Tawngno, Nungkum kipatlam khat in Canadian te pasal khat nitak in Pub khat ah pai in a lawmte tawh zudawn a, a ciah hun ding ciangin a zukham veng nai lo ahih manin Uber sam in ciah a, a zingsang ciangin a nusiat a mawtaw la kik dingin pai hi. Manager te-in a zukhamna hangin a mawtaw nusia in Uber tawh a ciah thu a theih ciangin thupi sa uh a, letsong hon khat piak beh uh hi.

Hih thu ka lungngaih ciangin eimite tawh kikhai sa ing. Ei pen zu dawn in i kham khit ciangin cycle la-in vaknuam kaltang se hi hang. Kua mah’n ka zudawn lam hong thei kei in teh, aci bang khat in khuasung teng ah awng to hi hang.

Itna lungsim leh midangte ading ngaihsut sak in a khual thei hileng zukham pi in vakngam huai het lo hi. Namdang lungsim picingte in, ‘zu a ham uh ciangin khat peuh taih khial kha in, accident kha leng,’ ci-in a mawtaw uh a lawmte hawlsak uh a, eimite in ahih leh zu i kham ciangin i mawtaw, leh i motorcycle te la-in ei mahmah in hawl in khuasungteng ah i vak sese hi. Ngaihsun taktak leng maw midangte liam leh bai ding, ei hangin khat peuh a sih lawh ding kingaihsut sak het lo-in, midangte khualna lungsim cinthem cia zong a kinei hethet lo hi mawk hi. Pilvang huaita sa ing, Tawngno!

Tawngno aw, khangno khat na hihna hangin zu peuhmah dawn kei in, hong ci keng. Ahi zongin na kamnam khit ciangin mawtaw ahi zong, motorcycle ahi zongin hawl peuhmah kei in. Zukhamna hangin tuahsia-a i om pen phamawh sa kei lai ing. Ei zudawnna hangin midang khat peuh in a liam lawh, a sih lawh ding pen piang thei sa lo hing.

Nang bek hi lo-in i khua aom khangno khempeuh in zu a kham uh ciangin inn ah om hithiat leh ut ing. Midangte khualna lungsim cinthem cia beek nei ta leng ut ing. Thukhual in midangte ading zong ngaihsut sak thei ta leng ut ing.

A tuahkhak uh ciang bek in a kikhel pan leh a zuih sawm pan mi om uh a, ei pen tua ci bang mite hi lo ding hi hang. Thu le la kan in i tuahkhak sese loh hangin a hoihte zui in, a hoihlote peel ding hi hang. Ei tuah tektek, ei sin tektek khit ciang bek in zuih sawm in, i kikhel sawm pan leh bel zekai ding hi hang. Hong it, Na Pa (February 21, 2018)