Tulaitak DHS (Lawahka) Interview phite aki Reject tam

Tulaitak DHS (Lawahka) Interview phite aki Reject tam

Malaysia gamsung UNHCR huangsung ah tulaitak DHS (Lawahka) Department panin Interview samkikta uhhi. Tua DHS Interview aphikhin te lakah atamzaw pen nialna thuak, Reject akipia tammahmah cih Faiceu News pan kiza hi.

DHS Interview panin Reject athuakmi atamzaw pen abeisa in midang mintawh alutngei, mindang azangngei, min kitaih, min kibangvai tawh Fraud Case tuakin, UNHCR Registration Department panin amin taktaktawh aki laihsakkhin te sungpanin tamphadiak uhhi.

FMT kici Fraud Team te’n abeisa in RST, RSC (OPE), DHS (Lahwaka) leh US lengding in si asik khinsa samkik uh a, thusitna nei uhhi. Tuapan in amau mintaktak tawh UN Card piakik uhhi.

Abeisa kumin Fraud Case atuakte RST, RSC (OPE), DHS (Lahwaka) cih Department tuamtuam panin kisamkik in, Interview bawlsak uh a, bangmah nawngkaina omlo in alengkhinzong om uhhi.

Ahi zongin tulaitak DHS Interview aphite sungpanin pawlkhatpen US kumpi in atangthu, a Case uh sangzolo ci’n nialna pia, Reject bawl uhhi. Tuabang in Reject athuak tepen aki Reject bawlna laidal tawh RST Department ah ki puakkik uhhi.

DHS Interview panin na tangthu, na Case uh hong sangzolo hi ung ci’n Reject a ngahte pen thuumkik ngetkikna bawltheih nadingin Appeal Letter kipia hi.

Tua ahih manin DHS (Lahwaka) Interview aphiding in hongki sapleh na tangthu uh hoihtak akigingsa in napaiding uh thupi hi. Azenzen in hongki sangzolo, hongki Reject khakleh nakizopna Community zum (ZAM, CRC, ACR, etc…) cihte ah amanlangin paipah inla, Appeal Letter gelhvaiding ahi zongin, bangci kalsuanding cih naki kuppih pah un.

More: UNHCR, Malaysia Home Ministry leh gambel palaite ki muhkhopna

Amau mintaktak tawh UN Card ngahnapi in, Fraud Case sap athuak pawlkhatte pen DHS (Lahwaka) te’n navai uh, na Case uh siangnailo hi ci’n agen pawlkhatzong om cih kiza hi. Sawltak #zomidaily