Christian Hymn te’ tangthu: Han Thuk Sungah Lum Hi

Christian Hymn te’ tangthu: Han Thuk Sungah Lum Hi

• Christ Arose (Luke 24:6-8)
• Robert Lowry (1826-1899)
• Robert Lowry (1826-1899)

Christian hun kipat cil lai-a om kha hi lehang Thawhkik Ni Easter Sunday zingsangin thu ummite khat leh khat i kimuh teh “Haleluijah, Amah thokik hi! Haleluijah, Amah thokik takpi hi!”ci-in kihopih kha ngel ding hi hang. Tua hun lai-a thu ummite’ adingin i Topa’ thawhkikna bek mah a kingakna uh hi a, i Topa thokik taktak cih a theihna-un thahatsak hi. Tuhun thu- ummite zong tuamah ahi hi.

Tua mah tawh kizui-in tuhun pawlpi tuamtuamte in Thawhkik Ni gualzawhna i bawl ciangin Robert Lowry in 1874 kuma a phuah hih “Han Thuk Sungah Lum Hi” (Christ Arose) cih la i sa-a, i sak simin i lungsim hong lawpsak den hi. (A Mangkamin “Christ Arose” hi-a, “Khazih Tho Zo” cih bangkhat hi napi-in, ei Tedim Labu sungah a taang masa a gual masa kila-in “Han Thuk Sungah Lum Hi” ci-in thulu kipia zawsop hi. A thu tawh kituak pha het lo hi. Thawhkikna gualzawhna la kimlai, han sunga lupna thulu tawh kisasa mawk hi. ZKK).

Robert Lowry bel gospel laphuaksiam masate’ laka a kizahtaak mahmah khat ahi hi. America gam Philadelphia khua ah March 12, 1826 ni-in suak hi. Kum 17 a phak ciangin Zeisu Khazih a Honpa-in sanga piangthak hi. 1854 kumin Bucknell University pan pilna sangpi tawh a sangkhana zo a, tua university mah ah 1869-75 sung professor of literature sem hi. Tua sang pan mah-in doctorate degree ngah hi. Pastor zong sema, a masapen-in Philadelphia khua gei-a West Chester Baptist Church ah sem hi. Tua khit ciangin New Jersey, New York City, leh Brooklyn te ah pastor sem kawikawi hi. 1899 kum, ama’ kum 73 pha-a a sih ciang dong lawptak-in Pasian’ na sem hi.

A nuntak sung tawntung Pasian’ nasem minthang khat-in om hi. Laisiangtho siam, thugen siam khat hi a, pawlpi sung vaihawm zia zong siam hi. Music leh hymn lamsang zong uk mahmah a, ahi zongin nuntakna taktak-a nasepin bel nei ngei lo hi. Lamal leh la-aw tampi phuaka, labu tampi mah a khetkhiat hangin a nuntak sung tawntung Pasian’ thu genna mah bulphuhpi-in nei den hi.

Ahi zong, 1868 kumin gospel musician minthang William Bradbury a sih ciangin Biglow Publishing Company-te in music editor dingin amah tel uh hi. Dr. Lowry in zongtua nasep sanga music khetkhiatna lamah a muanhuai mahmah khat hong suak hi. Sunday school labu 20 val khenkhia a, a kikhen ngei Sunday school labu lakah a hoihpente hi, kici hi. Ama’ gelh laibute laka khat ahi Pure Gold bang ci lehang bu awn khat (1,000,000) val kizuak zen hi. Robert Lowry’ hanciamna hangin America gama Pasian’ la kiphuahna leh Pasian’ la kisakna nakpi-in khangto hi, ci-a kiciamteh ahi hi.

Ama’ hun lai-in Gospel lamal leh la-aw phuahna ah amah a pha ding mi om lo mai ding hi, ci-a kiciamteh ahi hi. Hih la banah, “Gunpi Ah I Kikhawm Ding Hiam?” (Shall We Gather at the River?), “Bang Dang Hi Lo, Zeisu’ Si Hi” (Nothing But the Blood of Jesus) cih late a mal leh a aw a phuah ahi hi. Tua banah, “Lam Tawntung A Hong Paipih Hi” (All the Way My Savior Leads Me), “Nang Kong Deih Tawntung Hi’ (I Need Thee Every Hour), “Zion Khua I Pai Hi” (We’re Marching to Zion), “Hong Honpa Na Sih Dong’ (Savior, Thy Dying Love), leh “Where Is My Wondering Boy Tonight?” cih late zong a aw a phuah ahi hi.

La a phuah ciangin bangci phuah cih a kidot ciangin, hici phuah tuaci phuah cih lian om lo a, lamal ahi a, la aw ahi zongin a lungsimah a suah teh, inn-a a om laitak ahi a, lam a pai laitak ahi zongin gelhkhia pahlian hi, ci-in gen hi. A la phuahte a tamzaw organ tawh a sin ma-in laidal tunga a phuahsa vive hi zawpian den hi. Tam vei simsim a lamal leh a la aw phuah khat-a a phuahkhop hi mai hi, ci-in zong gen ngei lai hi.

Hih “Christ Arose” zong tua bangmah ahi hi. 1874 kum Thawhkik Ni Easter hunlai-in nitak khat Laisiangtho sima devotion a neih laitakin Luke 24:6-8 sunga Zeisu Khazih’ thawhkikna tawh kizoma thupiangte lungngai-a, “‘Amah hih lai-ah a om kei hi; amah thokik zo hi! Amah note tawh Galilee gama a om lai-in note kiangah, ‘Mihing Tapa mawhnei mite khut sungah kipia dinga, kikilhlumin a ni thumna ni-in kithokiksak ding hi’ ci-a hong gen phawk gige un’ a ci uh hi. Tua ciangin ama thugente a phawk kik uh hi”(ZIV) a cih kammalte a sim ciangin a lungsim thosak mahmah hi.

A sawt lo-in Dr. Lowry organ mai ah tu a, tua lai mah ah hih lamalte leh hih la aw teekteek mah hong phulkhia hi mai hi. Tua Laisiangtho mun a simna tungtawna a lungsima a ngaihsutnateng la dawng khat a suak ahi hi. 1875 kuma William H. Doane leh Robert Lowry-te’ khet Brightest and Best labu sungah kihel pah hi.

Hih la a taangte leh a sakkik i et ciangin sihna hanga dahna leh thawhkikna hanga lungdamnate a kilamdanna teltakin kimu thei hi. Christiante’ upna buppi Zeisu Khazih’ thawhkikna tungah kinga liuleu takpi hi. Rev. Zam Khat Kham (Christian Hymn te’ tangthu 2005)