Indonesia mi 9 tuanna vanlengkhat kia, mi 8 sipah in naupang khatbekbek suakta

Indonesia mi 9 tuanna vanlengkhat kia, mi 8 sipah in naupang khatbekbek suakta

Indonesia gamsung mualkuamlak ah mi 9 atuanna vanlengkhat kiasuk in, mi 8 sipah cih AFP pan kiza hi. Akigawm in mi 9 atuang lakah naupang pasalno kum 12 aphakhin khatbekbek suakta hi ci’n tuni Sunday ni in Indonesian Authorities te’n genkhia uhhi.

Tua atuahsia vanleng pen Swiss-made Pilatus aircraft kici vanlengnam te hi a, vanlenghawl tetawh kithuzakna Air Traffic Control tetawh Saturday ni in kithuzakna kitat, kithuza theinawnlo hi. Tua vanleng pen Papua Province sung aom Minute 40 khawng alennading munkhat ah apailaitak in atuahsia ahihi.

Tua vanleng pen Sunday zingsanglam in Oksibil Subdistrict sung aom gamsung gamtaampi lak ah asiacip, azancipsa in kimukhia hi.

Tua vanleng pen asiatzangawp hangin anungtalai in pasalno khat kimu hi. Adang Passenger mi 8 te ahihleh avek in sikhin uhhi ci’n Papua military spokesman Lieutenant colonel Dax Sianturi in genkhia hi.

Vanleng akiatna ahang taktak akician in kithei nailo ahih manin National Transportation Safety Committee te’n hoihtak in kancianding uhhi.

Tua atuahsia vanleng pen Private Charter in akizang vanleng hi a, aneipen Dimonim Air kici Company te ii neihsa ahihi. Vanleng sungah Passenger akigawm in mi 7 leh vanlenghawl Pilot mi 2 atuangkhawm uh ahihi.

Tua vanleng akiatna mun ii ageinai aom khuasung mite genkhiatna ah vanleng akiatmadeuh in aginngaih mahmah ahamgawp khat kiza masa in, tuakhitzawh ciangin apuakkham agin kiza cihi.

Vanleng tuahsia cih akitheih ciangin Search and Rescue Teams te’n khetawh zongpheipah uh a, ahi zongin vanleng atuahsiatna aphual taktak atuntheih nading un nai 2 sungbang khetawh paikul hi.

Indonesia gamsung ah tuikulh “Island” tampi om a, tuatetawh kikawm nadingin vanleng kilimzat mahmah hi. Ahi zongin vanlengtawh kisai in Aviation Safety pen gina hetlo ahih manin vanlengkia cihpen kizathei zelzel hi.

More: Update: Mi 113 atuanna Cuba vanleng kiatna pan mikhat bekbek nungtalai

Adiakdiak in Papua kicihna munzong phaknading ahamsa mahmah munkhat ahihi. Nungkum July khasung inzong Papua Province sung aom Wamena kicihna munah vanlengneu khat kia in, mi 5 in sihlawh uhhi.

2015 August khasung inzong Indonesian carrier Trigana kici Commercial Airline khat Papua sungah kiasuk hi. Khuahun hoihlohna hangin akia kici a, vanleng sungah atuang mi 54 te avekin si uhhi. Sawltak #zomidaily