Vanglian Pasian khe in leitung hongsikna banghanghiam? ~ Nang Kam Thang

1969 kum July Kha 20 ni in American Astronaut nih Armstrong le Aldrin te Khapi tung vatung uh hi. Tua hun laitak a America President pa in thupit sak na le pahtawi na tawh “mihing Khe in Khapi tung asik na in Mihing te tang thu sung ah athupi pen hun ahihi” ci in pulak khia hi. Tuahun a Evangelist minthang mahmah khat in zong “akilawm banga thupit sakna le zahtakna mah tawh kagennop in ah, mihing te tangthu ah athupi penpen Mihing te khe in Khapi tung ava sik hilo a, Ciangtan nei lo Tawntung Vanglian Pasian Khe in Leitung hong sikna hizaw hi”, ci in Dawng kik hi.

Hi taktak hi, Ciangtan neilo Tawntung Vanglian Pasian in Minthanna le Vangliatna khempeuh nusia in abawlsa Leitung mihing te khat lel bang cih ciang bek hilo Sila lim taktak la in Leitung hong sikna pen mihing te tangthu ah Athupi penpen tangthu hitakpi hi cih , ka thukim hi. Ahizong in dotna khat hong om hi. Banghang in “Ciangtan nei lo Tawntung Vanglian Pasian Khe in Leitung hong sik mawk hiam?”

Christmas athupitna taktak pen “Zeisu hongsuak hi—Zeisu hong suak khinhi— Zeisu hong suak taktak zo hi”, cih hilo zaw a, “Banghang in Zeisu hongsuak hiam?” cih izaw hi. Ama’ hong suahna ah Gupkhiatna om lo a, Ama’ suah na ciang hang in mihing te in mawhmai sak na ngah zonai lo hihang. Zei su Hong Suahna in: Pasian hihna lak ding ;Thumaan hilh ding hong kum hi mahhi .

Thukham kicingsak ding; Ama’ gam phut ding; ei te nuntak zia ding lam honglak ding; Pasian itna honglak ding; cina damsak ding; mizawngte huh ding; hih tekhempeuh zosaing ding ahongpai hi mah hi. Ahizong in Ahong kumna hite sang abulpi zaw le alian zaw ahang taktak khat om hi: Tua in “Zeisu nang le kei mawhna puakhia ding, nang le kei tang Asi ding Hongsuak” ahihi. Zesu suah ma B.C. kum 700 pawl lai pek in kamsang Isaiah in “ei te mawhna hong puak khiatsak ding Pa” ahihlam nagen khol hi (53:1-12). Joseph tungah Vantungmi in “Amah pen amipawl te mawhna pan honkhia ding Pa” ahih lam na gen kholhi (Mate. 1:21). Tucing te tung Vantung mite in “Tuni in note ahong honkhia ding Khazih Topa asuak zo hi” ci in na tangko uhhi (Lk. 2:11). Tuphum pa John in Zeisu amuh takciang in “En un Leitung mawhna apuakhia Pasian Tuuno” ci in na awngkhia hi (1:29).

Tu in Zeisu Hong suah na ahang taktak honglak khol te tawm bek a en ihihi. Zeisu in tuma kum 2000 lai in hih Ahang taktak sem khin in zosiang zo ta hi. Tua thu tehci apang Thuciam thak bu 27 te ahihi. Hih Thuciamthak Bu khempeuh’ hong gen le hong lak khiat pipen in Hih thu ahihi. Tua ahih man in, kong it Sanggam aw tukum Christmas pen “Zeisu hongsuak hi—Zeisu hong suak zo hi—. cihciang telna tawh adawn hilo in— Banghang maw Zesu hongsuah—- bang deihna tawh hongsuak hiam—Hongsuahna in bang ciang ka nuntakna ah na hong sem taktak hiam? Cih kancian na tawh Zeisu hong suah Lungdam Pawi adawn ding kong han thawn nuam hi.

Amasa le ataktak Christmas zankim in Asuak thak naungek hang a Birthday bawl, bawng kuang kim kot ah mi tam hetlo khading hi—- kuamah phawk khak loh tuucing te le Mary, Joseph khawng bek hikha dinghi. Hihbang kangaih sut ciang Vantung mite’ tangko na aw ka bil kha in za in kamit kha ah hici bangin hong suak hi.

Tuazankim, ihsip dide hunlai tak in – Vangtung tang zihziah ding a – Vantungmi te khempeuh in Vanglian Pasian, mihing te Gumkhia dingin leitung hong sikna- hong lungdam pih in Bethlehem khua Tung Thang Van pan hong en suk zihziah ding uh a, Asuakthak Naungek Zeisu Suahpawi bawl in “Leitungmi te aw banghang ihsip dide mawk nahi uhhiam? khanglo un ! no te ading nakpi lungdam na thu tuzan in hong tungzo hi…….

Van asang belna ah Pasian’ minthang tahen, Leitung mite tungah Nopna om ta hen”. Ci in phat na la hong sak ziahziah laitak un Leitung in ihmut san in Sip dide kha dinghi. Bethlehem kua mite in suah ni khempeuh lak pan alungdam huai pen suahni pawi akhua sung vauh apain lam thei kha hetlo, awlmawh kha het lo ding uha, Ihmut nuam san kha lel ding hi, Khasiat huai mahmah sa ingh.

Ahizong in nikhat ni ciangin, Ama’ mai ah khuk khempeuh khuk din in, kam khempeuh in Amah- Kumpi te kumpi –Topa te Topa – hi ci in pulak ding uhhi (Phi. 2:9-11). Amah a umlah, Amah agal neih, Amah anial te khempeuh in tuani ciangin Ama’ mai ah kunding uh a, Ama’ thukenna thuak ding uhhi.

Nang Kam Thang