Pasian muang inla sem in

Pasian muang inla sem in

Nupi khat in a sep a bawlna ah Pasian thupha sanga a daupai nading ci-in a ihmut hun sung sim loh a hek a tatna peuh ah ama hih theih zah in thu ngen den hi. Mipi lak ah a om hun sungin zong lungsim thungetna tawh hanciam in Pasian kiangah thu ngen den hi.

Ni khat, Pasian vansawltak-te in nupi nu hopih uh hi. “Na sepna peuh ah Pasian in daupaina hong pia takpi ding hi.” ci-in kamciam pia uh hi.

Tua nupinu in zingsang sim in a inn-nung a tungtun tunga a ngah lihliah manta gahte lokhia in bazaar ah va zuak zel hi. A lamdang mahmah khat ah zingsang sim a luzang tawh a puak khop zah ding tua tungtun pan in manta gah khia hi. Tua bek tham loin bazaar a tun ciang midangte vanzuak tawh kibang loin ama vanzuak kileisak nuam zaw ahi manin a vanzuakte khawng khin pahpah lai hi. Tua bangteng tawh hun sawtpi sung hong nungta toto hi.

Ahi zongin hun a sawt ciangin tua nupi nu lungsim sungah ngaihsut ding thu khat hong suak hi. “Ka sep ka bawlna ah ka daupai nading ci a Pasian kiangah thu ka nget zawh kum tampi paita hi. Tua bang hi mah leh bang hanga midangte zah a sum le pai neih le lamh nei lo ka hiam?” ci-in amah le amah dotna khat hong kidong ta hi. Tua dotna pen amah le amah a kidong hi napi a tawpna ah Pasian tungah hong tung sak mawk hi. “TOPA aw, ka daupai nading ka hihtheih zah in na tungah thu kong ngen hi. ka lungsim takpi tawh thu kong ngen a, ka daupai nading nong kamciam khin zo hi. Ahi zongin bang hanga tutan vei midangte tungah hong madawksak lo na hiam? Bang hanga hong hausak lo na hiam ci-in Pasian tungah dotna bawlta hi.

Zan khat a mang sungah Pasian hopihna aw khat za hi. “Na inn nung tungtun tungah manta kung tawmno khat na suan hi. Tua manta kung pan na khut tawh na suan ahi manin thupha ka pia a gah tampi ka gahsak hi. Tua manta gahte na zuak ciangin zong midangte vanzuak sangin kong khawngsak baih zaw hi. Ka sep ka bawlna tungtawn in hong daupaisak in hong ci nahi manin kong daupaisak theih nading a dang bang sem lai na hiam? Midangte sang na gualzawh zawk nading bang sem a bang bawl na hiam? Sem lo bawl lo a mawkngah nopna in huaihamna le duhhopna ahi lam thei lo na hiam ci-in dawng hi.

Hih thu pen gentehna bek hi lel hi. Ahi zongin Sem lo bawl lopi a mawkngah nopna pen duhhopna le huaihamna hi takpi mawk hi. Thu pen nget ding mah hi. Ahi zongin thunget sang a thupi zaw khat om ka sa hi. Hong kipiasa thuphate tungah lungdam koh ding le hong kipia lai dingte ading upna tawh lungdam kohna le tuate i ngah theih nading sep le bawl a kisamte sep khiatna pen sem lo bawlblopi a ngetngetna sang thupizaw dingin ka um hi.

Abaih lua, a olsam lua a ngahnopna zong Pasian in deih tuan lo hi cih pen mikim in i theihsa Pasian kammal Laisiangtho sunga om ahi manin, Pasian muanna tawh mawk om sangin Pasian muanna tawh sep ding pen Pasian zia hi zaw dingin ka um hi. Na up na muan ngam zah na ngah a cih pen ahi lo lam in la kei ni. Sem ngam lo, bawl ngam lo, ahikeh sem nuam lo bawl nuam lo a um cih bang om thei ngei lo hi. Um i cih pen sepngamna bawlngamna tungah zong kinga hi, cih phawk ding thupi kasa hi. Job Cinpi (Zomi Laisim Nuamte)