Vaihawm zia nam nih ~ Tual Khan Suan

Vaihawm zia nam nih ~ Tual Khan Suan

Kipawlna tuamtuam (organizations) leh biakna pawlpi ( churches) sungah vaihawm pawl i vaipuakzia leh makaih zia pen nampi nih in kikhen theih hi. Lam khat pan in a tom in gen leng, mipi deihna tawh kitel khiat thawh ( election) pan ki minvawh makaite vaihawmna leh mi khat in a ma deih teng leh muan teng a seh thawh ( selection/dictatorship) ci’n kilom khawm thei hi. [ Vaihawmzia a dangdang tampi a om hangin hih a tung a nampi nihte pan a hong ka khia a hihi.]

Zomite nuntak khosak zonna leh vaihawmna sungah zong hih kivaihawmna nam nih mah kitam zat pen hi. A beisa hun a i pu le pate nuntakna, nek zonna, khuasung gamsung vaihawmnate i et kikciangin makai khat ( tua hun lai in Hausa/Lengpa kici thei) in a ma thu kuppih ding pen a mau mah in a tel uh a hihi. Kam hoih in gen leng, Makai/ Hausa pa in a thu kuppih ding pen a muan a suan teng a seh mi (selected members) a hihi. Makai / Haupa pen a sangpen panmun a om ( sovereign) a hih manin a mah pen ki lau, ki kihta mahmah hi.

Thukhun leh thu khamte a ma deih bangbang in kibawl a hihi. A hi zongin, a mah bawl mah thukhun, thu khamte in a mah huamkhalo, awksak kha lo in, a mah pen thukhun, thukham tawh kipeng hi. Makai / Hausa pa’n a seppih, a thu kuppih ding a, a seh mite ( selected members) pen a deih kei leh tawpsak thei a hih manin a thu nial ngam ding hilo hi. A ma thu a manglo, a nialkalh om leh gawtna lianpi thuak in, Makai / Hausa pa a lungkim zawh kei leh thahna ciang dong thu pia thei hi.

Vaihawm zia nam khat leuleu ciangin makai / Hausa ding pen mipi deihna tawh kitel khia hi. Hih bangin kivaihawmna ah, makai / hausa pen a sangpen mun ( sovereign) hi lo in, zuih ding thu khun, thu kham om a, tua zui in makai/hausa in a vai hawm a hihi. Mi kim a ding a hoih, a neu a lian a deidan lo thu khun, thu kham pen a sangpen leh a thutawpna in kikoih ahih manin mi nautang khat leh makai khat pen a khial leh a khialhna zui in a kibangin gawtna kipia thei hi.

Makai / Hausa pen mipi deihtel ( elected members) a hih manin damsung makai / hausa cih bang om theilo ban ah, thu khat peuh ah seppih mite tawh kikum khawm in vai hawm khawm hi. Mipi a dingin nekzonna, nasepna khempeuh ah lungkimna om zaw a hih manin mite in nuam sa zaw hi. Makai / Hausa ding pen mite aitang a vaihawm ding leh nasem ding a palai a kitel a hih manin vaihawmna khempeuh ah mi buppi / milip in kihel den kei kul nawnlo hi. Thusia thu hoih khat peuh pen mimal deihna tawh kikhen sat lo a, thu thun leh thukham paizia tawh kituak in kikhen sat a hih manin, muh dah man a gawt bawl cih a om theih loh bangin, pahtak man a gawt lo cih zong om thei tuanlo hi.

Hih vaihawmzia namnih te tuhun ciang dong mihing te nekzonna leh khotang nuntakna, ki makaihnate ah kizang mahmah hi. Kipawlna (organizations) tuamtuam leh biakna sung vaihawmna (church leadership) ah zong nisim in kimu thei hi.

Kipawlna ( Organizations) tuamtuam sung ah vaihawm zia

Zomi sung i et ciangin kipawlna tuamtuam (organizations) om a, tua kipawlnan vaihawm zia pen a tam zaw in mipi deih telna ( election) tawh kigel vaihawmna hi zaw pian ta hi. Social organizaiton tuamtuam leh political party tuamtuam te zong mi khat bek in phuh khia ( founding person) hilo a hih manin a ma deih teng bek pan mun guan cih om thei nawn tak lo hi. [Charity organization pawl khat bel mimal khat in a phuh khiat a hih manin a ma deih teng bek tawh na sem cih a om lai pawl khat bel om hi.]

Mitam tawh nasepna ding leh mipi a ding nasep sawm a hih manin mipi mah tawh vai hawm khopna bek pen kipawlna i ngimna a tangtun na ding lampi man hi bek hi. A zenzen in mipi tel makaite (elected members) sung pan in kipawlna i thu meilet bulpi te a hi thukham, thukhunte tawh kilehbulh in vai a hong hawm hun ciangin kipawlna sungah ki lungsim nopmawhna hong kipan bek hi. Makaite in a mau pan mun tek ah tavuan hong neih ( responsible) tak ciangin kipawlna zong hong khangto zaw leh mapan khopna hangin ma kiliau zaw hi.

Makai te pen a damsung makai ding hilo a hih manin a mau sep sung pen a hoih thei pen leh hanciam tak in hong sem uh hi. Min siat, mui siat ding utlo uhhi. Mipi ten makai te vaihawm zia deih nawnlohna khat a om leh a mau hun ( term) a bei ciang or kitel kik hun ciangin tel nawnlo thei lel hi. Mikhat bek theihna, siamna kizang hi lo a, makaite in a theihna uh hong gawmtuah uh a hih manin khialhna tawm zaw hi.

Biakna pawlpi vaihawm zia( Church Leadership)

Zomi te sungah Pasian thu hong tun tak ciangin Pawlpi ( church) kiphuh a pawlsung vaihawmzia ding pen hong kisam a hih manin Pawlpi makai masate (a diak in sangmangte’n) a mau paidan tawh kituak in vaihawm dan ding hong gel sak uhhi. Pawlpi sungah makai kitel ding hong pattah uh a hih manin makai ding pen mipi in a hunhun in tel khia zel hi. Makai khat bek hi denlo, leh khat le khat thu kikup khopna tawh vai kihawm a hih manin Pawlpi sung pai zia pen kip leh kho thei zaw hi. Paizia kician tawh vai kihawm a hih manin mi mal khat i lung phut leh hoihsakna bek kizang theilo hi.

Tuhun takteh pawlkhat in mipi tel makai pen mipi deih bang leh mipi deihna a zui ding hi cih bek thei in, mipi te in a mau tangmi ding a kitel khia palai a hih lam phawk dawnlo in thu leh vai khempeuh ah uk leh sai ut mawkmawk hi. Mipi deih telna (election) i deihna pen milip in thu leh vai khempeuh ah kikum khawm den theilo ding a hih manin a lem thei dingin palai kitel khia hi a, tua i tel khiat palai te vaihawmna leh gelna i zuih ding pen mipi te tavuan a hih lam kiphawk lo kha hi. Makai ding palai tel khia na pin thu leh vai khempeuh ah makaite sep ding dan mipi in uk den, leh sai den pen palai tawh kitelna vaihawm dan or democracy pai dan hilo a, mihonpi ukna leh vaihawmna ( Anarchy= makai/kumpi omlo vaihawmna) hi zaw hi.

Makaite ding a kitel khia palaite hoihsakna tawh kigel vaihawmna pen mihonpi lungkim loh manin thalnial na pen i tel khiat makaite sim mawhna leh thu simlohna banah thu neihna khengval vatna a hihi. Pawlpi pawlkhat sungah pawlpi makai ding a kiseh thu kikum khawm mite sangin pawlpi mi khat peuh i lungkim lohna leh pawlpi mi tawmnote thangpaihna ki mang kha thei zaw a hih man in pawlpi sungah vaihawmna nawngkai mahmah thei hi.

Pawlpi sung vaihawmna dang khat leuleu pen a beisa hun lai a, Kumpi leh Hausa/ Leng te vaihawm bangin kivai hawm pawlkhat om lai hi. Tua bang pawlpi te pen a phuan khia pa/nu in ukna, vaihawmna leh thu neihna sangpen a vek in nei hi. Tua pawlpi sungah makai ding leh panmun nei ding khempeuh pen a ma deih mite bek seh ( select) khia hi. [ Siapa/Sianu in a ma muante tawh sep ding leh panmun pia ci’n kamkhum tawh kigen thei hi]. Tua a hih manin tua a kiseh khia mite ( selected members) te in zong a pu/pi uh tungah ciampel ngamlo,leh to dan in nei uhhi. Pawl sung vai khempeuh ah a mah omlo in bang mah vaihawm theih omlo a hih manin tu hun pau leh ukpi ( Dictator) a suak a hihi.

Pawlpi sunga mipi te’n vaihawmna khatpeuh mansa lo leh a deih loh hangin hep khiat theihna ding lampi om lo a hih manin pawlpi sungah kikhen khapna piang baih deuh hi. A lungkim lote a dingin a om sun lampi pen pawl tai ding bek hi mawk hi. Pawlpi sungah vaihawmna pen kikup khopna omlo a hih manin pawlpi sung cidam huai lo hi. Tua pawlpi a ci dam mahmah leh Makaipi pa nuntak sung bek hi ding hi. A mah a om nawnloh ciangin pawlpi sung buai ding hi. [Leitung gam ukcip kumpi ( dictator) te gam zong tua dan lamp tawn zaw hi].

A tawpna leh a thupi pen khat ah, kipawlna leh pawlpi sung vaihawm zia pen tua kipawlna leh pawlpi kipat cil dan in sai pen hi. Pawlpi pawlkhat pen mipi tawh kam kikum a kiphuh a hih leh mipi mah in makai ding tel zaw hamtang hi. Mikhat bek in a phuh pawlpi/kipawlna a hih leh a mah bek in makai ding seh ( select) zaw ham tang hi. Pawlpi kiphun dan kibang kimlo a hih manin pawlpi phuh dan paipi te i zuih theih kei leh tua vaihawmzia te gel kigawm tuah thei hi. I gawm tuah leh zong pawlpi sungah buaina om thei lai hi.

Tua hi lo a, pawlpi kilam khiat zaw nam khat pan nam khat ah i laih sawm leh zong buaina piang veve hi. Mipi tawh kam kikum a kilam khia pawlpi pen mikhat bek phuh khiat pawlpi ah laihsawmna leh vaihawm zia laih sawmna a hi zongin, mi khat bek phuh sa pawlpi pan in mipi deih makai tel a vaihawm sawmna a hi zongin hanciamna a om ciangin pawlpi leh kipawlna ah buaina kipan den hi. Mihingte in vaihawmna leh ki makaih dan hoih i sak a tuam tek om a hih manin ei nopsak dan i zuih ding pen a hoih pen a hih sam hangin tua i zuih ding pen ei nopsakna namte a hih hiam cih ettel pen pil vang huai pen hi. Tua in a kisamlo buaina pan kiven kholhna hoih khat a hihi. Tual Khan Suan