Ih neulai-in hatlo pipi i nu in,‘hat lua…hatlua…’ ci-in hong khem ciangin i thaneihzah sitlo in i hatna i lak hi. Ih nu pen midangte’ nu tawh tehkak le’ng hatlo kha mah ding hi. Ahi zongin i nu in ei adingin a tha neihzah sithet lo-in hong khem in hong dal tawntung hi. Ih nu hat nawn kei ta leh, ‘Nu, hatlua teh,’ ci-in i nu khemsin zel dih ni!
Ih neulai-in i duh hetlo nektheih khat peuh i nu in tawmciam in, ‘Awi…limsam ei, ciam kik paksin aw leh,’ ci-in hong khem khit ciangin en zong limsa in i ne kik pah hi. Ansia-a i nek, i lawmte kianga i nek leh i zi i pasal’ mehbawl te banglo-in i nu mehbawl lim kei ta leh, ‘Nu, na mehbawl limsi e,’ ci-in i nu khemsin zel dih ni!
Ih neulai-in i nu in hong puan leisakte gol deta in ahi kei leh neu cekcuk in i silh ciangin kilawm hetlo ding himah leng, i nu in, ‘hih na puan tawh kilawm cei,’ hong ci peuh leh kuakua in bangbang hong ci zongin hoih sa-in i silh denden hi. Ih nu, midang nute tawh kibang lo-in aduang ahoih kei zong, teekta in atha puakte nidang atha puak bang nawn lo-in a silh ateen te tawh akilawm nawn kei phial zongin i nu kiang ah, ‘Nu, hih na puansilh tawh kilawm si cia,’ ci-in i nu khemsin zel dih ni!
Ih neulai-in i nu gei bekbek ah i om nuam-a, daileng in apai na ngawn hong taisan ding sa-in i zuiliang hi. I nu paipai na, omom na-ah i om hi. I goltoh ciangin nuntak haksat na hang maw ahih kei leh thudang tuamtuam hang tawh i nu tawh inn khat ah om thei nawn lo-in inn tuamtuak ah i om a, i nu tawh i kimu pakpak thei nawn kei hi. Khat veivei ciang bangin i nu i mangngilh ni bang om liang hi. Tua bang laitak in i nu in ei hong phawk in i hawhkaal ding, i hopih kaal ding hong na lam en den hi. Ih nu i phawk man ta kei zongin i nu i hopih sunsun ciangin, ‘Nu, hong phawk lua ing,’ ci-in i nu khemsin zel dih ni.
Ih neulai-in i nu in i pa theih loh kal in i deih van le nate, nik le puante hong leisak sim zelna pi-in i nu kiangah lungdam thu i genngei kei hi. Ih nu in zong ei tung panin lungdam ing, i cih ding honglam peuhmah lo ding hi. Ahi zongin i nu hong leisak na leh vante hangin i lung adam takpi kei zongin i nu kiangah, ‘Nu, nong na leisak hangin lungdam lua ing,’ ci-in i nu khemsin zel dih ni!
By,
Dimno’ Pa
Columbus, OH
October 31, 2016
Facebook ah Dimno’ Pa Page non na Like sak ve vua!
https://www.facebook.com/dimnopaa/
Comment piaknop aomleh...