US President kituhna ah amasa pending in Trump Poll Tracking ah hatzawta

US President kituhna ah amasa pending in Trump Poll Tracking ah hatzawta

Nov. 3, 2016: US President ding kituhna ah Republican presidential nominee Donald Trump in May kha panin a masa pen dingin Democratic nominee Hillary Clinton point khat in makhelh hi ci-in (Hillary in sum tawh guai zo mel nawn lo ai tam) amah a sihgup ABC News leh Washington Post tracking poll in zanhal in pulak hi.

Vote pia ding hi’ng a ci-a a lawp mahmahte’ ngaihsutna panin Hillary pen a hatna point 7 in kiasuk hi. Hih pen Hillary in Secretary of State a let lai-in zat dinga kiphat lo private email server a zat thusim a kipholak khiat manin hi ding hi ci-in pollster Gary Langer in ci hi. Hih ABC leh Washington Post-te tracking poll pen Oct. 27-30 kikal sunga kila hi a, hih hun in FBI director James Comey in Oct. 28 in Hillary in a email zat a kikan khinsate panin classified information (thusim) tampi zang hi ci-in pulak hi. A beisa ni sagih sungin Trump’ point pen 46% hi a, Hillary’ point pen 45% hi ci-in Gary Langer in ci hi.

Hillary zong hih thu hangin patau mahmah ta a, zan in Lake Monroe ah a vote zonna ah, “Na naseppihte uh, na lawmte uh, na pawlpi mite uh leh na innkuanpihte un vote a khiatna dingin na zasak un. Gualzawhna i ngah nuam leh vote pia kim tek ni, tua ahih kei leh kiguallel ding hi,” ci-in gen hi. Democrats partyte hat dinga a ki-ummawh Florida leh Michigan ah zong Hillary in vote a ngah theihna dingin nasia takin hanciam in, mivomte tungah huhna ngen hi. Ahih hangin mivom ten Obama in President a ngah (2008 leh 2012) hun bangin mivomte vote khiat ding lawp lua lo uh a, Florida State ah vote khia khin (early voting) tam mahmah ta hi. US kiteelna ah Florida state vote nei a kim khat valin vote khiatni a tun ma-in vote khia khin uh hi ci-in kiciamteh hi.

Behlapna: Florida state bekin Electoral College 29 nei ahih manin Florida pen guahzawhna ngahna dingin poimawh mahmah khat ahi hi. 2000 kiteelna ah George W. Bush in Florida ah vote 573 na ngah in, Electoral College 29 khempeuh ngah a, Al Gore in Bush sangin popular vote (US minautangte’ vote) tam a ngah zawk hangin na lel ngei hi. Trump in Floridi state panin vote 270 bang ngah zo dingin ki-ummawh hi. Hillary in May 2016 in nausukkhia a deihna thu a gupna tawh naungek piang nai lo ten constitutional rights nei lo hi a cih manin nau sukkiat ding a deih lo pawl khat ten na zadah mahmah uh hi. Hillary in Sec. of State a let lai-in a Private Email server zat pen IT aide Bryan Pagliano a bawlsak hi a, a zatna vai thu buai om ahih manin email 30,000 pia khia in, emails 32,000 delete hi.

Electoral College tamna California (50), Texas (38), New York (29), Pennsylvania leh Illinois (20), Ohio (18) leh Michigan (16) state-te ah a hat zo penpen pen a hatzaw ding cihna ahi hi. State 50 sunga Electoral College a neih zah uh na et nop leh hih a nuai-a link na mek in http://state.1keydata.com/state-electoral-votes.php -The Hindu http://state.1keydata.com/ Thang Khan Lian