US leh Canada gamsung ah Romaine kici ankamteh hangin mitampi takin cinatlawh

US leh Canada gamsung ah Romaine kici ankamteh hangin mitampi takin cinatlawh

US gamsung ah “Romaine Lettuce” akici ankamteh namkhat tepen asungah E.coli Outbreak kici lungno namkhat kimukhia ahih manin nek huailo hi ci’n kumpi thunei te’n tangkokhia uhhi. US Health Officials te’n Tuesday (Nov 20) ni in agenkhiatna ah tua Romaine Lettuce tepen E.coli Poisoning om ahih manin, innsung ah leisa nakepkhak uh aomlehzong nekding lauhuai hi, nekei un ci’n pulakkhia uhhi.

US gamsung ah asawtlo in Thanksgiving Holiday atungding hita a, American Families te omkhawm, kikhawlkhawm in pawithupi mahmah apawlding madeuh in Romaine Lettuce ankamte gulut cih Centres for Disease Control and Prevention (CDC) te’n atangkokhia uh ahihi.

CDC te genkhiatna ah tua Romaine Lettuce tepen innah leisa akemkha aomleh nek huai hetlo hi. Azenzen in pawlkhat nekhin in bangmah buaina aomkeiphial zongin, neknailoh in nakep uh aomleh nesuak kei un, paikhiapah un ci’n Warning limpiak mahmah uhhi.

Hih Romaine Lettuce kici ankamteh anekha, E.coli Poison hangin acinatlawh mi 32 bang phakhin hi. Tuate pen US gamsung State tuamtuam mun 11 States pan hi uh a, tualak ah mi 13 tepen huaisia phadiak ahih manin zato ah ki lumsaksuak hi.

Tualak ah mikhatpen huaisia phadiak sawnsawn a, akal “Kidney” in nasemlo in siacip kici hi.

Canada gamsung ahzong Romaine Lettuce hangin Food Poisoning om cih Health Officials te’n genkhia uhhi. Canadan gamsung aom Ontario leh Quebec Province sungpan Romaine Lettuce nekkhakna hangin mi 18 tak cinatlawh uhhi.

Tua ahih manin, Romaine Lettuce khempeuh “whole heads of romaine, hearts of romaine, bags and boxes of precut lettuce, salad mixes that contain romaine, including baby romaine, spring mix, Caesar salad” cihte khatzong nekding hoihlo, lauhuai mahmah hi ci’n kumpi thunei te’n genkhia uhhi.

More: SoyNut Butter te E.coli natna tawh kizopna om ahih manin nekding lauhuai ~ ZD

Azenzen in Mixed Salad naneksawm pen asungah Romaine Lettuce kihel leh kihelloh kiciantak in natheihcian keileh nek hetlohding hoihzaw hi ci’n CDC te’nzong limgen mahmah uhhi. Cina, zato atunlawh tampi kizakhin a, ahi zongin tuciangciang misi aki Report kuamah omnaisamlo hi. Na innsung ah Romaine Lettuce ankamteh nakepkhak leh nekha hetkei in. Sawltak #zomidaily