The Youth of this Generation

The Youth of this Generation

Leitung kinawh khellua mahmah ta hi. Nidang lai in kum 100 ciangin kalkhat suanto hi. Tu hun in kum 10 ah khantohna lianpipi/ki khelna lianpipi piangziahziahta hi.

Nidang lai in thuman khat bek om (absolute truth) kici hi. Tu hunin mikim in thuman i sakbangbang a man hilel (relative truth) cihthu hong lang mahmah ta hi.

Thuman le thumanlo pen i etna tungah kingalo (objective truth) in tua a en nu/pa tungah kinga zaw hi (subjective truth) cih hita hi.

Hibang hunkikhelna sungah Zomi khangno te a’dingin kong gennop thu (5) kong gelhsuk ding hi.

1. Siamsin khangno te in pilna mah bulphuh veva ding hihang. Sangman ding, degree ngahding bek ngaihsun lo in i sinpilna ciatah siampi in siam ding, theihpi in theih ding, i gam i lei a’ding zangkhia theipah ngiat ding cih hong hanciam mahmah un.

2. A nihna ah Pasian mahmah manggilh ngeilo ding khangno te kong deihsak hi. Pasian masak lo in ki khuasuak zolo hi. Gamlelei leh minam kipuah zolo hi. Mikim in hunbit Pasian nasem ni ka cihna hilo hi.

Tulaitak i minam sungah i kisap lianpen in hunbit Pasian nasem ding sangin Pasian bulphuh leitung nasem tampi i kisam zaw pek hi. Tua in tangzai zaw, thukbun zaw hi. Leitung na semcihpen tangpi nasem dingin nungta ding cihna zong a hihi.

3. Khangno te in muhkholhna Vision i neihding kong deihsak mahmah hi. Vision omkei leh minam te kiamsuk duaiduai hi. Ih gam a’ding muhkholhna a nei leh tua muhkholhna tungtawn aa na a semding makai tampitak i kisam lai hi. Khangno te in Vision lianpi a neidingin hong kipan un.

4. Khangno te in gammakai suahding hong hanciam mahmah un. Politic lam hong lunglut un. Pasian nasem ding tua zah in i kisam paknawnkei ding hi. Ahizongin ki ukna leh kumpi nasem milian tampitak i kinaksap mahmah lai hi. A uk lam ah i omkei leh mite nuai ah a om hipah i hihmanin i deihbang kikhelna i ngahzo kei ding hi.

Tua a hihmanin ki ukna lam ah milianpi (politician) hong suahsawm ngiat un. Tua dingin khangno tampi (tampi) hong kipan khia un. Hong panpih dingin ih minam bup in kong ngak uh hi. Hih nasep pen Pasian nasep zahmah in baihlo aa kipumpiak khiat a kulngait nasep a hihi. 2020 kitel hunciangin Zomi khangno te mi 2-3 peuhmah kihelsawm ngiat ding hihang.

5. A ngana leh a tawpna ah, Zomi sungah kibatlohna tampi i nei hi. Tenna munlemual, awsuah, awkaih, upna biakna ah i kilamdang hi. Ahizongin kilamdannate tawh ki gimneihhetlo in i kihuaikim dimdiam ding thupi pen hi.

More: Thai kumpi te photo meitawh ahalsak khangnote kumtampi thong kikiasak

Vaithupi khat, nasepliankhat ah ma i pankhop ciangin kilungtuak in lawngkhat a gingzo ziahziah dingin i omding kisam hi. Tuapen khangno te vaipuak hi ngiat hi. Zomi khangno te’n hong hanciam un.

Tukhang khangno te’ khan Pasian in hong siam ta hen! Rev. Dr. Simon Pau Khan En (Ph. D, D.D) gelh TuKhang Khangno te’ Khan- Article pan tomlakna/ Siamsin Library