US leh apawl te’n naikal 24 sungin Mosul khuapi ah Bomb 21 vei khia

US leh apawl te’n naikal 24 sungin Mosul khuapi ah Bomb 21 vei khia

Nov. 2, 2016: US makaih leh pawlte – US-led coalition kici ten ISte ukna Iraq gam-a khuapi lianpen nihna leh mi million 1.5 kiim teenna Mosul khuapi ah naikal 24 sungin vial 25 kuan in, bomb 21 vei khiat uh hi ci-in Russian Defense Ministry spokesman Maj. Gen. Igor Konashenkov in zan in gen hi.

“US leh a pawl ten US leh a pawl ten nisim in Mosul tung lam panin kap den uh hi. Russia leh Syrian air force ten Aleppo a kikap lohna nipi kal nih cing ta a, ahih hangin USte’ vanleng puakna teembaw Dwight Eisenhower panin USte’ gal vanleng B-52N strategic strike aircrafts leh F/A-18 carrier bombers leng khia den a, Francete’ vanleng puakna teembaw Charles de Gaulle vanleng panin Rafale-M vanleng leng khia den in, Mosul kap cih takin kap ngelhngelh uh hi,” ci-in Russian Defense Ministry spokesman Maj. Gen. Igor Konashenkov in statement a bawlna ah gen hi. A beisa nai kal 24 sung bekin USte vial 25 kuan khia in, Mosul ah bomb 21 vei khiat uh hi ci-in Konashenkov in gen beh hi.

Mosul lak kikna dingin Mosul operation kici pen US galkap 5,000 kiim, Kurdish galkap 4,000 kiim leh Iraq galkapte 30,000 val kuan uh a, Oct. 17 panin galdo kipan hi ci-in Sputnik news in suaksak hi. Mosul khuami million 1.5 omte kihemkhiasak lopi in galdo kipan uh a, Russia in Aleppo nisuahna lam-a rebelste ukna mi 25,000 kiim teenna panin a tai khia nuamte tai khiat theihna hun ding hong zel in (Nov. 4 ciangin hun hong kik ding), a tai khia nuamte tai khiat theihna mun (Aleppo leilu lam leh nisuahna lam) honsak uh a, a taikhia nuam lo teng khual zo nawn loin nung kha in nasia takin bomb khiat a, nitumna gam ten Syria leh Russia in human rights palsat in war crimes gamta hi ci-in na phunciak ngeingai uh hi.

Behlapna : Kua ten “tawitehna man lo leh tawikhaina man lo” zangzaw hiam hiam cih bel thungaihsun thei teng leh history in khentel thei veve sam in teh. -Sputnik/ Thang Khan Lian