Kung lian in kung neu dep
Gammang thukpi ah singkung lianpipite in a neute deplum pahpah a, singkung lian kawm ah singkung neu po zolo in, lopa nangawn gina zolo thei hi.
Information Technology (IT) pilna ong khang semsem a, fax, email leh messaging applications tuamtuam ban ah social media tuamtuam ong khantoh zatzat ciang, nidang a “sikkhau kisat” icih telegraph pilna a kiphiat tawh kibang in abeibei ong suak mawk hi.
Khuahun kikhel mahmah in, 1988 kum a Newin’ ukcip hun ong bei ciang Democracy hun ong kipankik ding bangkhat ong hi hi. Party tuamtuam ong kiphuan hi. Mi pawlkhat in Party lampi tawn in nidang, 1962 ma a MP uliante’ khan zilnopna tawh strategy tuamtuam ong geel uh hi. Gualzo munngah a matutna ding ngimna ahihman in politician mitciim pawl in khuahun zui in ong kilek dialdial uh hi.
88 khit ciang bel Minam min, Minam ki-itsakna mah in politics telluat a haulo Zomi innocent majority lungsim a zo pen ong suak hi.
Ahi zong in, Minam itna bulphuh hi napi khangthakte thuman hilh ding, lamman lak ding cihsang in “kei gualzo ding, MP suak ding, MP khasum leh hamphatna ngah ding” cih ngimna lianzaw ahihman in 1988 ma, (esp. 1970s – 1980s) Newin’ ukcip hun, minam party cihbang a omma a minam vai thute, minam vai veina leh sepna tuamtuamte zaknop kisa lo hi. Ki thupi ngaihsut lo, ki thupibawl lo hi.
Tuaban ah minam itna sung ah a theihhuai gam leh minam vai taktak kigen kihilh ding cihsang in, ei party gualzo ding, ei loteng depgawp ding, a gualzo pawl hiding, shieldpi ngah ding (shield bel kine lian thei hetlo hiven maw) cih tawh ki holhthawh, tha kipia lel ciang nasepna pen minam nasepna lian mahmah bangsak a, tua tung ah a tu phiuphiau cunning political endeavour pawlkhat ong khangkhia hi.
Lamkhat pan, khangthakte’n zong tua khantohna ding political pilna leh thutheihna te ahi zong in, thuman leh tangthute thei nuam in zanuam hileh amau ading mimal meetna omlo ban ah apute uh ading a supna piangsak thei hihtuak zaw ahihman in khangthakte’n a kinloh ban ah, a pute mahmah un thuman hilh ding theisak ding, pantah ding lawp khollo uh hi.
Ukcipna (dictatorship) pan Democracy ah suahtakna pen kikhelna (change) lianpi hi a, ahi zong in change khat peuhpeuh in zungthuk akhak ding kisam hi. Azung omlo in singkung gol theilo a, a golma in keugaw ding hi. Zungthuk khalo, azung teng a kimet maimang Zomite’ kikhelna pen huih tawm nung lel tawh a puuk loh phamawh himai a, kung lian theilo ding mah ahi hi. Khang theilo, lingh thelthal a ahin’ limliam leh zong a lungdam huai himai ding hi. Zungthuk akha kim le pam a singkung liante’n damdam in ong dep ding hi.
Hunpi khat kikhengta a khanlawh hunta hi. Kikhel pi khat kisam leuleu hi hang. Tu a i kisap kikhelna ahih leh mittaw/ mitsi sa a sialkhau letna pan hak ding, i mit nuai in khuadak ding ahi hi.
I kim i pam a kungte a zungkip in leihoih ahihman in khang hathat hi. Ong dep ding in ahiang zaam in alim golpipi pha pianpianta hi. Ei zong zungthuk kha a, i khan kei leh i mailam khangcing lopi lingh thelthal, keugaw lel in ong kideplum ding hi. Takkheh! Khangthak Zomi.. kuamah kidepsak lo e… Pau Khat Suan
Innkuan, Party leh Minam
Minam leh gam vai Politics ah party bulphuh a minam ading na kisem thei ahih hang, party bulphuh teekteek bek a kisem thei hi sese lo hi. Ataktak in mipi a khenkham pen party ultunsak luatna ahi hi.
Bangzahtak in party ngim le tup hoih in, nasep hanciam ahi phial zong in Minam sang Party i bulphuh zawk leh mipi kikhenkham ding cihna ahi hi.
Hoih hetlo hi ci a i ngaihsut Newin’ hunlai nangawn in ” innkuan vai leh party vai teel kul dinmun ah i om leh party vai masak ding, Party vai leh gamvai teel kul dinmun ah i om leh gamvai masak ding” cih thukhun na nei lai sam uh hi.
Zomite’n lumlet zawzen sam kei leng maw… Pau Khat Suan
Comment piaknop aomleh...